٢٨ أبريل ٢٠٠٧

يا داهيه دقى

آه ياعزبة الهم
طب ده سؤال أنسأله فى ليله مفترجه زى دى، شفتم العجب بتاع عزبتى بنت الحرام دى، قال إيه جانى عوضين أبو ازدحمد، وده تقولوش قضا، يحط على دماغك وانت قاعد ساعت العصارى متمنجه وبتحبس البطايه بكوباية الشاى ونفسين الجوزه يقوم يهد مزاجك من جدوره ويدردك شوية الانفاس اللى انت ظبطت بيهم الجمجمه وتبقى مانتاش قادر تمسك نفسك من تنسير فرده البلغة على صلعته الكريمه، عوضين ابن سعديه اللى ملهوش زى، قاللى جرى ايه يابا الحاج، قلتله طب ارمى السلام يا جاموس الاول ابن سعديه قاللى لا سلام ولا جله، قلتله جله لما تندفن فيها يابعيد ورميت كوباية الشاى على الارض وانعدلتله قلتله قولى ايه اللى جرى ياغفير النيله
قاللى الناس ماشيه تلسن ف العزبه، قلتله انقطع لسانهم هما مش هايبطلوا العادة المنيلة دى على الطلاق لاقفل كل الغرز العفشه اللى بيقعدو فيها دى
قاللى لا المره دى مش م الغرز المره دى من دوار علوان ابو جمعه اللى فى الناحيه البحرية جنب الترب
قلتله كلام من ناحية الترب يبقى كلام يوغوش
شديته من ودانه وقلت له تعالى هنا يا غفير الهم وقوللى بينى وبينك وبالراحه كده عشان علوان ده تعبان واولعوبان وممكن يكون بيرمى كلام وانت قاعد عشان يلاقى بيه حاجات ومحتاجات وانت غفير جاهل وزى البقر الفريزيان فشل ومخك مغشوش
قول يا حمار بالراحه
قاللى سمعتهم بيتحدتوا فى حق البيه والهانم
هبيت ورحت زاعق فيه وقايل الهانم المصونه مين جاب سيرتها مين ابن الهرمه مين قول يا غفير
قاللى لأ يا سيدنا العمده اللى اتكلم كان مقصوده الست روجى
روجى مين ياغفير معنديش انى حد اسمه روجى
قاللى الست الفانصيه بتاع جمال بيه
فانصيه ايه يا غفير انى مش فاهم حاجه
الفانصيه يا عمده اللى بتعمل تورز فى الورفيناج مع نازمى
رحت شاخرله ولهفته قلم على صرصور ودانه وقلتله اتكلم كلام معقول يا غفير لاحسن اسحبك ع الزريبه طوالى
فهمنى روجى مين وفانصيه مين ونازمى مين يابن المتلومه
قاللى وهو بيعيط الست خضره يا عمده سارحه فى البلد مع نازمى قصدى الحاج نظمى رياده وبترطن خواجاتى وبيقولو ان البيه مش مالى عينيها عشان عنده اربعه واربعين سنه وملهشى فى النسوان يعنى وهى كده لهطه قشطه ونازمى لافف عليها
قلت ياداهيه دقى
البيه مش مالى عينيها عشان عنده اربعه واربعين ونازمى اللى لما وعيت ع الدنيا كان شعره ابيض بيلف عليها حقا بطلوا ده واسمعوا ده
وان فين م الحكايات دى الله هو انا عجزت ولا ايه يمكن عجزت ومش واخد بالى وباجوز جوازات غلط ولمين لابنى ووريثى المهطول واللى بيتاكل على قفاه علنى امال هاكتب كتاب مين الليله
ورحت زاعق جايب المصونه والأخ اللى مش مالى العين وقايلهم ع الحكاية
جمال بص للغفير وقاللى ببرود كده وكلام باهتان
يابا ده غفير جاهل
باد انفورمنت
قلت له لأ لأ حاسب
ده غتت آه وكلامه دبش آه بس والنعمه اللى فى إيدى دى ورحت رامى الجوزه ع الارض مايكدب على فى كلمه هو عارف هاشمطه ازاى فى الزريبه انى مش عمده جعر ولا نايم على ودنى ولا مشغل خرنجات تلملى الكلام م البلد
قاللى يابا الدخول للألفيه لازمن فيه صوره جديدة وهيئة جديدة للحكم فيه يا حاج حاجه اسمها ملكية دستورية بنحكم كعيله حاكمه ومجالس ومؤسسات وفق القانون وبندى للناس حقوق وبنحاول نتفركد الاحوال عشان نعرف الحقوق وصلت لمستحقيها ومتوافره ولا لأ
قلتله امال انى باعمل ايه طول النهار بالكارته
ده جوز البهايم اللى بيجروها والغفير اللى بيسوق بيكلفونى شئ وشويات كل جمعتين ارميهم بقى واقعد اتفركد معاكو ياللى تتفركدو على جنابكم
وبعدين انى شاريلكم العربيات دى كلتها عشان تلفو البلد مع نازمى الرجل الناقص ابو شنب ملهوش مله ومكسوف يبينه فى وشه وعامله زى الخط الكوبيه فوق شفاتيره
انى يا جمال يابنى مافهمش فى لزوميات الافلية دى ولا بيخشوها ازاى ولما طاوعتك قلت انت فكرك جديد وهاتفهم وهاتمش الامور حسب حال الدنيا انما كده فيه انه وفيه حاجه انى مافهمهاش انى عمده عسكرى ماعرفشى غير ثفا وانتباه
بالها الافيه ودخولها الامر سهل ومش محتاج وجع قلب انما صارحنى فى الاهم
خضره اللى سمتها روجى دى ماليه عينك كده ولا مانتاش مالى عينها
يابا حكاية ملو العين دى بقت دقه قديمه احنا هنا بنقوم بادوار سياسية وعلاقات عامه وضبط ايقاع مصالح عشان نتقدم
قلتله لأ الدور ده ميمشيش عندى انى مش هاتجرس قدام علوان وعيلته عشان اضبط مصالح وبعدين مصالح مين دانى الكل فى الكل
قاللى متخافش يابا احنا فى سكه جديده وبنمارس الحكم من مانظور جديد
انى دماغى لفت وقعدت ع الدكه وناديت المصونه تلحقنى
المصونه بنت الهرمه قالتلى اسكت ياعمده ياخرفان جمال بيه كبر وبقى ملو هدومه وطبطت على صدره وهى باصاله باعجاب كده وهو مبتسم ابن الاهطل ومش فاهم انه بقى الخرنج فى عين البشر
قلتلها دا احنا اتجرسنا بلف الفانصيه بتاعته ونازمى
قالتلى نازمى ده راجل اوريجينال وبيفهم فى الاتيكيت والبى آر قصدى العلاقات العامة
قلتلها الله طب مانتى لسانك انعوج زيهم اهوه وبقيتى تلبسى المايوهات امال فين لباسك الدمور يا مره يابنت انجس راجل
راحت راقعه بالصوت وجمال والغفير حاشونى عنها وشدوا البلغه من إيدى
قعدت بعيد وقالتلى انت خلاص خرفت وعياك والادويه غطوا على فهمك ومخك بقى مليان تخاريف سيب الشباب يعمل اللى هو عاوزه
انت مش هاتفهم
واللى بيعمله فى البلد هو الوحيد اللى فاهمه
قلعت الجلبيه وعدلت الشلت ورحت مديهم ضهرى ونايم

هناك ٥ تعليقات:

مراقب مصري يقول...

يا ابا الحاج
هو آه العبارة بالظبط؟
البت دي مش لاقية اللي يلمها ولا إيه؟
وبعدين بيقولوا الواد نازمي ده كان راجل سمعته مش ولا بد من زمان وإنه كان لا مؤاخذة م اللي بيوفقوا راسين في الحرام أيام ما كان الواد صلاح أبو نصر ما كان ماسك خولي العزبة زمان... واللي زي ده عمر ما رب يتوب عليه أبدا... يا حاج إنت لازم تنضف العزبة من كل الأشكال اللامؤاخذة دي وبعدين الحرمة المصون دي لازم تتشكم شوية بدل ماهي طالعة تجري كدة وسط العيال وآل إيه بتعمل مرة سون دي كدة مرة لا مؤاخذة ودا عيب أوي يا حاج

BeLiEvEr يقول...
أزال المؤلف هذا التعليق.
BeLiEvEr يقول...

ألف مبروك يابا الحاج
سمعت إن المحروس ولدكم دخل دنيا و كتب المكتوب و ناقص بس يدخل الدَخلة الكبيرة

أنا بس محرج قوى منك يابا الحاج، هو انا بس عايز أعرف أخبار النقوط إيه.
يعنى هندهوله فى إيدة ولا نلم كلنا و نشترى للعرايس عزبة حدا عزبتكم؟
مفيش حاجة تغلى على الغالى إبن الغالى

يساري مصري يقول...

ماني جلت من لاول نعمل دوخله بلدي
تطلع الست الفيانصيص بختم ربهنا و العلم كلها تشهد و نجطلع لسانتهم

مانتاش عايز تسمع الكلام مانيش عارف ليه

وبعدين اني مش عايز اجول ان ولاد ابو سماعين شافو الست روضي تحت التوته اللي فآخر البلد بت .... بت ... بت .. بتقولو كلمه سر فحنكوا

و آني جيت اجولك قبل المغرضين مايلسنوا

و الدخله البلدي حتماً ولابد منها
ابنكم البار
بنحبك ياحج و نفديج ببهايمنا

الأستاذ جمال بيه يقول...

الغتيت الرخم تانى
يا يسارى هاشمطك شمط الإبل
دى يا حمار اجراءات دخول الالفية وارهاصات الفكر الجديد
يا جاهل يا متخلف يا جعر
لو كررت الحكاية دى تانى انى شكلى هاضحى بيك فى عيد العمال
_________
والله يا بليفر يا بنت أخويا مسألة تلمو النقوط من بعض دى هاتبقى مشكل
ليه
قولتيلى ليه
انى مش هابقى عارف مين اللى دفع شلم ومين اللى دفع جنيه وده هايخلى ناس تخلع م اللى عليها فكل واحد يجى هنا حدا المحصل ويحط المعلوم وانى بقى اقرر نشترى اراضى ولا نشترى التوروماى
_______
يا ريفورمر يا مواليد سته وسبعين آنى هاعمل فيك اللى ما عمل ولا لكش عندى غير لكش الزرايب
انى اتكلم عن حريمى انت لأ
انت تسمع وتخرس خالص
المصونه ذكرها ما يعتبش حنكك يا فلاح يا جربوع