٣٠ مايو ٢٠٠٧

إحترم فخامة العمدة التزام وطنى


لوحيظ فى الفترة الأخيرة أن نبرة النقد والتعالى على شخص جناب فخامة العمدة الأستاذ جمال بيه قد زادت فى الفترة الأخيرة، وقوبلت قراراته الثورية التى تكفل انتقال العزبة بسرعة الصاروخ نحو الألفية بشكل مؤسف من قبل قلة من المارقين على أخلاق العزبة وأعرافها، لهذا وذاكا أخذ فخامة الأستاذ جمال بيه على عاتقه وضع حل عاجل وشامل لهذه القضية التى أرقت شرفاء العزبة، وقرر أن من يزودها ويضبط فى وضع مش اللى هوه سواء قالب بوزه أو بيهلفط بكلام من هذه العينة أن يعتقل ويودع فورا الحجز لحين البت فى أمره من قبل لجنه مشكله خصيصا لحماية القيم، وتتراوح عقوبة هذا الفعل الذى سيتم تجريمه ضمن مواد قانون الارهاب المزمع تحديثها بين الشمط التام والزج فى المعتقل لمدة لا تقل عن سنتين بتهمة إهانة جناب الفخامة، وقد قرر جمال بيه أن يقوم بنفسه باختبار لمدى الاحترام الذى يظهره شعب العزبة له، وتفتك ذهنه المتكد عن فكرة ألمعيه وهى أن يظهر فى الصور بقفاه، ومن لا يحترم قفا العمده قبل وشه يقع تحت طائلة هذا القانون. ولهذا قرر جنابه أن تكون صورته الرسمية التى ستحل محل صورة فخامة المرحوم أبو جمال المعلقة على قارعة البلوج مأخوذه منظر خلفى، ليعلم الجميع كذلك رسالة مفادها أن العمدة يراك حتى ولو أعطى ظهره لك.
هذا وقد أكد المصور المخصوص لجناب العمدة أن الفكرة من منظور فنى عبقرية فعلا إذ يتمتع جناب العمدة برقبة طويلة ممشوقة مع عدم وجود انثناءات أو تجاعيد فى منطقة القفا كما أن الشعر لا ينبت فيه ربانى، كما أن مؤخرة رأسه فيها لون فاتح، أكد البيه أنه ليس ثعلبة بل وحمة، وهو ما يؤكد أن الصور التى التقطت ستحظى بقبول جماهيرى منقطع الفظيع خصوصا وقد أخذت الصورة للبيه وهو ينظر بوجه جاد من المرآه حيث بدا جزء من وجهه فى طرف الصورة فى حين احتل قفاه مجمل المشهد ليؤكد أن احترام العمده هو اتزام وطنى على الكافة الحرص عليه حيث أن فخامته هو رمز العزبة ورجلها الأول.

هناك ٨ تعليقات:

غير معرف يقول...

القفا وابوة

قرارات اية وبدنجان اية ما خلاص يا حبيبى العزبة بتاعتك كلها بقت معتقل كبير والشعب كلة فى العزبة تحت سياسة التجويع والتقريع والضرب بالمركوب وشيخ الغفر حبيب قايم بالواجب وزيادة
وحكاية المعتقلات دى بقت قديمة خالص البلد كلها معتقل كبير
طيب انت فاكر الكلام اللى اتقال على مصطبة ابو سويلم قال الواد ابو لسان زالف قال المرحوم السادات عايز يعمل حديقة حيوان فى المنوفية
الواد ابو لسلن زالف قال الخبير الاجنبى قال للسادات اعمل سور حوالين المنوفية تبقى دى حديقة الحيوان
وبعدين الحاج بيروح الشرم فى وسط الفنادق ويحضر حفلات الديسكو طيب بزمتك بيروح وقاعد فى الشرم لية كل دة علشان الديسكو والبنات اياهم
اما القفا فربنا معاة فدة غلبان خالص وشغال على قدة فى امور البنجو والازم منة

ابو نواس

husam shady يقول...

أيوه أمال لازم الكل كليله يحترم جناب العمده
وإللى مش هيحترمه إحترام من النوع التقيل كمان هيتظبط
وواضح إن قفا جنابكم من النوع المغرى لإحترام
إحترامتنا جايه فى السكه جنابكم

يساري مصري يقول...

هع
قفا العمده المقدس و المؤخره البيضاء
هع هع يا عمده

انا كمان بفضَّل سياية القفا
عشان اللي مخدناهوش من وشّ سعادتكم ناخده من مؤخرتكم ( قصدي قفاكم ) المقدَّس

zenzana يقول...

لامؤاخذيه يا بيه اذا كان لسه السؤالات لجنابك مدخلتشي ضمن قانون مكافحة الارهاب
انا ليا سؤال ممكن؟

هو ممكن احيي سي البيه العمدة الجديد علي قفاه علي سبيل الترحيب والتكريم لقفاه المبجل؟

انا جصدي التكريم والاجلال لجفا سعادته مش جصدي جلة جيمة ولا حاجة من دي خالص
ولا ان سحنت فخامته تجطع الخبيز م البيت مش الخميرة بس

ويجعله عامر بحس جفاه
مرسل وموجع من خدامتكم زنزانة
(اللي لسه مستنيه نفحة من فضلكم مش شمط تام في زريبة المكحوت ابوكم)

غير معرف يقول...

جاسوس فى حكومة السادات

نشرت جريدة الوسط خبرا غريبا ممكن للجميع رؤية الوثيقة على النت فى صفحة الجريدة والخبر يقول ان جاسوسا ابلغ الامريكان بنية السادات تطوير الهجوم لمسافة 20 كيلوا متر

والسؤال من هو هذا الجاسوس الذى كافأة الامريكان بمنصب رفيع جدا جدا

ممكن اى واحد فى العزبة يشاور علية ؟
هل هو المكحوت ؟
سؤال بمليون ؟

الشاذلى القليبى

zenzana يقول...

سي مجهول
لو هتضمن ان مفيش شمط تام ف زريبة المكحوت انا ممكن اجول
ازيك بجا؟

دماغ ماك يقول...

هل هايكون عندنا حرية ان احنا ننضف الصورة بتاعت جنابه كل يوم من التراب يعني
و نضرب التراب ده بإدينا جامد
علشان التراب الوحش ده مايجيش على قفا جنابه تاني؟؟

غير معرف يقول...

الزريبة وسنينها السودة

الحكومة النظيفة بتاع رابسو يغسل اكثر بياضا قررت بيع مصانع الاسمدة اللى بتسمد غيطان العزبة لمجموعة من الخليجيين علشان الفلاح ما يلاقيش سماد والانتاج يروح فى ستين داهية
طيب لية نبيع علشان ناس تاخد عمولات وناس يدخلوا شركاء وناس تسرق والباقى ندفع منهم ال 15% بتوع زيادة المرتبات
ووعد نظيف المدرسون بالعلاوات بعد بيع قناة السويس للخواجات من تانى

امال ابوك الحاج راح فين بيقولوا ساب الشرم والبنات وراح يكمل الكشف وشد الوجة فى المانيا ويزرع شوية شعر علشان يبان شباب ويقعد مع حبيبة بوش ياخد منة شوية تعليمات بعمل فتنة بين الفلسطنيين وتو قيعهم فى بعض امال اية حج بقى ربنا يديلة الصحة والشباب الدائم

ابو بدرية