٠٤ يونيو ٢٠٠٧

التصويرة الرسمية هى الوجه الجميل لفخر العزبة وأشبب شبابها


قرر البيه جمال وقراره نافد نافد إن كل بيت ودكانه ودوار وأيتها شئ فيه ناس بتقعد إنه يتعلق فيه تصويرة العمدة الرسمية، التصويرة دى هى التصويرة الرسمية ويرجو جناب العمدة تجاهل تصويرة القفا نظرا لأنها قد ثبت يعنى أنها مش ولابد وتم شمط الجدع الخيبان ابو قميص اصفر ده اللى بيدعى انه فنان واقترح على جناب فخامة البيه انه يعمله نيولونك ويصوره لاول مره فى التاريخ من قفاه، وبعد اشتشارة كمال بيه الشتمونى ثبت إن الواد المصوراتى ده دسيسة وجعر وتم القبض عليه وهو بيحاول يهرب وثبت رسمى انه مش ولابد ومخنث وبتاع كلام فارغ وكان هايبوظ أخلاق القرية اللى اتعودنا عليها، وتشير التقارير الأمنية إلى انتماؤه لعيلة أبوسماعين من ناحية الأم وهى عيله واطية ثبت كراهيتها لفخامة العمده محمد حسنى ولولده ووريثه من بعده، وتم إيداع المذكور الزريبة القديمة ليتلقى جزاته من شمط وتأديب، وتم جمع التصاوير اللى بالقفا وصدر قرار بحظر تداول أى نسخ منها وتسليمها فورا لحبقه لعوطلى ليقوم باعدانها بمعرفته
هذا وق التقى فخامة الاستاذ جمال بيه عمدتنا ورافع رايتنا بسفير الدانمارك وزمبابوى لبحث سبل التعاون وتفعيل العلاقات الثنائية بين البلدين كما اعتمد مشروع انشاء مئة كشك على الطريق المتسفلت والتى تقدمت بمقترحات انشائها مبادرة تشغيل العمالة المعطلة وسوف تمنح لشباب القرية باعتبارها قروض ميسره تدفع على عشر سنين بفائدة تكاد لا تذكر ولا تتعدى خمسة عشر فى المية، وتقوم حاليا شركة احمد ابو العز بتنفيذ نموذج الاكشاك وجمع مقدم الحصول على الاكشاك من الشباب الراغبين، كما قام سيادته بتفركد امتحانات الاعدادية واثنى على ناظر مدرسة أم مجاهل المشتركة لتسهيله فهم الاسئلة للتلاميذ وعدم تصعيب الاجراءات وقد وعد الناظر سيادته بأن تحقق المدرسة نسبة نجاح ميه فى الميه على الأقل وجدير بالذكر أن جمال بيه قد حصل على الاعدادية من هذه المدرسة وطلع الاول عليها وشهد له المدرسون والقرناء من التلاميذ بألمعيته ولوذعيته وتفوقه غير المسبوق، وحرصه الشديد على القيم، ومما لا ينسى قيامه بتأديب الطلبه المخالفين بنفسه وهو تلميذ وهو الدور الذى أشاد به ناظر المدرسة باعتباره امتداد لدور والده العمده المسئول عن التربية فى البلد. ومن المتوقع خلال اليومين القادمين أن تشهد العزبة تغييرات مهمة تترافق مع الحركة التصحيحية سوف يتمخض عنها اجتماع هيئة المشتشارين وجماعى السياسيات

هناك ١٣ تعليقًا:

غير معرف يقول...

اليوم الحزين

فى مثل هذة الايام الحزينة فى 6 يونيو فقدت العزبة عشرين الف من شبابها فى رمال سيناء وداست عليهم الدبابات الاسرائيلية ومزقت جثثهم
واصبحت عشرين الف ام من العزبة فى حالة لا يرثى لها
كل ذلك لان الطيران المصرى قد ضرب على الارض بدون اى قتال لان جاسوسة من اصل بريطانى نقلت اخبار زوجها الطربش الى مخابرات بلدها

العزبة تعلن الحداد العام لمدة ساعة على شهداء الخيانة وعلى الذين ماتوا فطيس فى سبيل العزبة

السيد الغضبان

غير معرف يقول...

جمر ياعمدتنا جمر
طول عمرك فته شاشه اول
ماتعملينا فيلم سميا ياعمدتنا

zenzana يقول...

بما ان تصويرة الجفا منفعتش وتم شمط المأسوف عليه ..ينفع بدل ما نرحب بسيادتك ع الجفا نرحب بودان سيادتك خصوصا انها هتفكر العزبة بودان حمار السيد الوالد ..يعني لما الواحد يقابل سيادتك ف الحارة بدل ما ايده تسلم علي جفاك تسلم علي ودانك التي يدل طولها غير المعهود علي الذكاء العالي المتأصل في العيلة
كمان سؤال اللهم ما احفظنا من الشمط
هو ممكن زيادة ف الترحيب بتصويرة سيادتك انها تتعلق في كل حتة زي المطبخ والتواليتات ؟ في التواليت اكيد لو كانت متعلقة قدام عنين المزنوقين هتسهل لهم كتير لانهم هيبقوا مستعجلين يخلصوا بسرعة تقديرا واجلالة لتصويرتكم .
ويجعله عامر

يساري مصري يقول...

هع هع يا عمده
أعلنا مسؤليتنا عن الحادث و الواد هنحرره يا عمده
عشان ولاد ابوسماعين رجاله و بيته مبيجبش غير الرجاله
http://masr-heya-ommi.blogspot.com/2007/06/blog-post_04.html#comments

Alaa يقول...

وشك زفر يا عمدة بلدنا
و سحنتك تلطخ
و تجطع الخميرة م البيت
واحد حاجة ساجعة للبيه يا ولا
و هاتها برتجان
سلامات يا عمدة
و تحياتي لصاحب المدونة الجميل ذو اللمحات الساخرة :)

دماغ ماك يقول...

ellahy ye7'aleholna ya rab we yekatar men ekshakooooo

bahry يقول...

الاستاذ جمال بيه
معلش بعيد عن البوست ده
إيه يا عم الكلام الجامد اللي انتي كتبه عند نوارة ده
علي فكرة انت لو دخلت علي التعليقات عند وائل حتلقي كلامي قريب من كلامك شوية ودخلت عند اللي بيشتموا وائل ورديت عليهم بهدوء
بس في حاجة مضيقاني لما دخلت عند وائل حسييت بجد أن أغلب التعليقات مفتعله ومفيش ولا تعليق واحد ضد وائل وده غريب شويتين
تحياتي
بحري من اسكندرية

الأستاذ جمال بيه يقول...

يا شعب العزبة العظيم
___
أهلا يا اسيادنا
موضوع التصويرة ده بصراحة كشف قد ايه بتحبو العمده فى كل احواله ومن وشه ومن ضهره، وهو بالتأكيد مامسكش العمودية الا لانه بيحبكم من كل كلبه
----
يا مجهول وماضى السيد الغضبان
اوعى تكون السيد الغضبان الصحفى
كنت هاسلم واشد ع الايدين بس كلامك معجنيش صراحه
دايس فى التبكيت الفاضى ده ليه
طب يا عم
الرحمة
أنا فعلا مش فاهم إيه حكاية الناس اللى عايزة تحسسنا إن سبعه وستين لسه عايشه وسطنا
لأ والله ده كتير الرحمة بقى
أنا جيلى وربما الجيل اللى بعدى يعرف اكتوبر ومرتبط بيها ومبيحبش سبعه وستين وبصراحه مابيطقش جيلها لإنهم هجاصين واحنا بطلنا هجص
وعارفين مين القرد وبنحاربه قرد بره وقرد جوه
ومابنهتفش
طب عايزين تعيشونا ليه فى اجواء سبعه وستين
انا مستغرب الكل عدى على اكتوبر وطنش ولما جت يونيو كله فتح الصفحات وهاتك يا لت وعجن فى هزيمتنا
عايوينا نصحى ونتعلم
طب ما صحينا وعرفنا وعملنا واحد مع اسرائيل
فيه ايه بقى
بتنكدو علينا ليه
انا جبت القاهرة والمصرى اليوم والدستور ولقيت الكل عايش ومستمتع فى استدرار اجواء الهزيمة حتى ان القاهرة جابت جرنان جوه الجرنان فيه صفحات الصحف من قبل المعركة والنكسة لحد تلاتين مارس
والمصرى جابتلنا المعرص اللى اسمه امين هويدى
ايه بقى فيه ايه
احنا يا عم سيد ملناش دعوه بنكستكم ومتبريين منها فمتقعدوش تلبسهولنا وتقيمو سرادق عزا وتبكوا وتنكرو علينا اى مجد او تغيير
ملعون ابو حسنى وعمايله بس ماتوصلوناش لكده
احنا بنصغر اوى قدام اسرائيل الوسخة كده ولسه مافاقتش من علقة حسن نصر الله
انت بتحتفلوا معاهم ولا ايه
أحه
ــــ
ودان العمده اشرف من إنك تتكلمى عنها يا زنزانه ياللى دورك فى الشمط قرب والنعمه
____
يسارى بقى كلامه كله كذب فى كذب وراح منزلى بوست فى مدونته التقيله اللى بتفتح فى تلت تيام قال ايه خطفوا ابن ابوسماعين م الزريبه،
ده بعيد عن شعرك المنكوش وكرشك وتيشرتك المعفن يا جعر، انا لسه رقعه كرباجين قبل ما ارد عل التعليقات، نيهههههههههههههههههههههاهاهاهاها
____
طز فى حضرتك يا أستاذ علاء، رغم تشريفك لينا، الادب مع العمده يخليك تبقى ع العين والراس، اما التخبيط فمعناته انك عرضه للشمط، وشكلك كده غلبه وماتستحملش فخش بأدبك بدل ما تتشد

____
دماغ، هو ده لكلام، ابقى عدى بكره العمده قرر يصرفلك كشك وبدون مقدم، اهتف كتير هاتبقى علاوله
___

بحرى
جالك ميل منى
اقراه
وتحياتى
___
عاش شعبنا العظيم

غير معرف يقول...

صورة اسكتلندى زى امة

بما ان الست امة بهانة الزغنونة من داير ناحية العزبة اصلها تمرجية اسكتلندية معتبرة والمفروض ان صورة المحروس تطلع مقبولة شوية الا ان غضب اللة بادى عليها
ويا اهل العزبة المعتبرين الصورة دى تجيب الفقر اللى هيعلقها فى دكان الفقر هيركبة والموظف اللى هيحطها فى مكتبة هييجى لة شلل رباعى وستعلق فى زنازين ومعتقلات العادلى لتعذيب المعتقلين وتكدير صفوهم كما ان الامهات هتقول لاطفالها هتنام والا اجيب لك صورة المحروس
كما ان دكاترة تحديد النسل سيعرضون صور المحروس على الشباب والشابات لينقطع خلفهم
اما لشيخ شمهورش فقد اعد حجاب لصرف شيطان تلك الصورة عن الاماكن الطاهرة
هذا واللة المستعان
وربنا يصرف عن العزبة كل الشرور وصور العفاريت

ابو الدقماق

يساري مصري يقول...

ولاد ابو سماعين بيعلنوا المسؤليه الرسميه عن كل الاعمال المتوقع حدثها في الدوار الاخضر من إستعاده للفدائي الشهم الواد الفنان ابو جميص اصفر
و رجال الضفاضع من ولاد ابو سيماعين و الصاعقه من ولاد ابوعيسى بيندربوا في الترعه الشرجيه

و هتشوف يا عمده

عصر الشمط و الفلكه هينتهي

ابو العربى يقول...

ياسلام يولاد بس مفيش فرق كبير بين الصورة الاولى والثانيه

واحدة متفزلكة يقول...

tesda2 en weshak nafs afak bel ta3lba el 3andak de....
akhabr el mozza 7etatek el taria roudy a ba3d ma ba2et set el 7eta beta3et el 3ezba rasmian ...khlieh atetla3 o teshgena keda hoh aiwa omal

spellz يقول...

aywa kedaa
ana tool 3omry bagool 3l mosawer da msh walabod we mn gama3et ebn abu esma3een
rabena ye5aleelak 7abqa we kol l 7aras we yedawemak fa5r watafa5or lel 3ezba we kol l 3ezab
bs feen kareemat seyyadtak ghayba msh btez-har ?
3alla yakoon l mane3 5eir :D
we hashtekna we bashtekna ya gamaal ya mghadeena ya m3asheenaa ya warethna 3o2bal mashoof a7fad a7fadak maskeen l 3ezba da ba3d 3omren taweeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeel aawi y3ny ;-)