١١ يناير ٢٠٠٨

عيش وشكلاطه ياعزبة الآلاطه.. طب سبتم ايه للاكسلانصات

هالبت ماني مستلخبط ونافوخي مقلوب من ساعة المره المتلومه دي اللي اسمها خضرة مراتي ما قعدت تزن وتقوللي ما تجيبلي شاكالاطه ياحج، طب نوروني ياخوانا اني اجيبلها منين شكالاطه ده، والاسعار ف الطالع والدولارات اللي بضارب بيها ف البورصه مسحوبه، نعمل ايه بس ف نسوان اخر زمن، الله يرحمك ياحج ياكبير ويعمر دارك يا مصونه يا كبيره، مره قالتله عاوزه عنب الديب يا حج فراح لهفها قلم علي بوزها بلعها نص صف اسنانها، ومن يومها ما استجرتش تطلب حاجه لحد ما مات المرحوم رضي الله عنه.

صحيح الا بمناسبة الغلا والاسعار والكلام الفاضي اللي ماشي في العزبه ده
الاسعار لا لهلبت ولا حاجه ياعزبة ما يملاش عينها الا زكيبتين سباخ من زريبه يكون ساكنها حمار نتن وجوفه عفش. آني سألت الرشيدي ابن الرشيدي وزير التجاره بتاعي، حلف تلاتاشر الف يمين وستميت طلاق م الخواجايه الشقرا مراته انو طوابير العيش دي ملعوب عامله فينا الاوساخ ولاد ابو اسماعين اللي بيبيعو العيش المدعم علف للطيور، الله طيور، اني بسأله، رد وقاللي ماهي البلد لساها ياحج بتربي طيور، قلتله واني باتنفض مش اني قررت نقفل علي حكاية الطيور دي لما تعدي الانفلوسه
طلع اني البلد لا بتسمع الكلام ولا دياولو ومقضينها وقفه في طابور العيش عند طابونة مرزوق، البلد اللي كانت بتعجن وتخبز من خيرها بقي عندها طابونه وبطلت النسوان اللت والعجن وقاعدين قدام الطابونه، قلتله بيقولو ان الدقيق غلي وان محدش لاقي اللقمه

حلفلي متين يمين ان الملعوب ده من العالم الجعرات اللي كارهين حكمي والدليل ان الطوابير في العيش بس وبقية السلع متوافره ومافيش طابور واحد
رد مرزوق ابو محمد وقاله يارشيدي بيه انت مش فاضيلنا هو حد يا بيه معاه ملين احمر يشتري بيه جنس حاجه ولولا العيال عليا الطلاق ما كان حتي حد جب العيش وكنا عيشنا علي النفس وكلنا ورق الشجر زي بتوع المجاعات، شخطت فيه وقلتله ماتتلم يا مرزوق ده انته لساك لاهف فدان ارض بحاله قاللي ياحج ده صوت الشعب
قلتله احه يا شعب شعب مين يابو شعب اني اللي عملت الطابونه واني اللي هاقفل الطابونه كله يرجع بقي يخزن كيلتين القمح والدره ويطحن ويعجن ويخبز

فكرني الرشيدي ان احنا بعنا طابونة الحج وعملناها بوتيك البسه وسنتيانات قصدي لانيجلي زي ما بترطن المصونه
قلتله طب خلاص شوفلك حل في الطوابير
قاللي مفيش حل غير برفع الدعم وتحرير سعر رغيف العيش
قلتله اني دماغي وجعاني ومابفهمش كلامكم ده
اعملوا اللي تعملوه بقي وماتخوتونيش اني مشغول بشكلاطة المصونه لحسن سايقه التقل عليا ومش عارف اتلم عليها


هناك ١٢ تعليقًا:

محمود الدوح يقول...

هو يدور على الشوكلاظة وحنا ندور على طابور جديد بدل طابور العيش

غير معرف يقول...

يابني انت اثبت انك أكبر اهبل في التاريخ عايز يعمل شكل في هوجة المدونات انت كده يا بهايم جعرات بمعنى الكلمة الا ما بنشفكش يا جعر عامل ابو الرجالة كده وبتورينا نفسك لا بق على الفاضي بتتكلم من بعيد لبعيد

اجري اتنيل في الزريبة بتاعة العزبة بأف

غير معرف يقول...

المرة المتلومة
المرة المتلومة عايزة تاكل شاكالاطة يا اما تقولى - لا - ياولة
اصل انت مش عارف ان المرحوم جد الحج كان بيسرق الحمير من المربط ويسبغها الوان تانية ويروح يبيعها فى سوق التلات فى قويسنا - يعنى كان حرامى حمير-
انما سبحان العاطى - ابنة بياكل شيكالاطة يا ولة
والمرة المتلومة بتلف على العزب - علشان اشيكالاطة

حسن ارابيسك يقول...

الرشيدي الميزان
بعد ما شبع من الحلاوة الطحينية والحلاوة السمسمية والحلاوة الحمصية والحلاوة الشعر
ودخل على الشيكولاطه الناطه كوناطه
وهو حاسس بالشعب الغلبان اللي ياعيني عايش على الشيكولاطه الناطه كوناطه
شعب مسكين نفسه يعيش زي الناس التانية وياكل اللي نفسه فيه والشعب نفسه يقب على وش الدنيا وياكل حاجه جميله قوي سمع عنها وهي رغيف العيش وبيحسد الناس الهاي فاي عليها
فينك يابا الحاج تيجي تشوف وتسمع

غير معرف يقول...

عبد الله كمال يهاجم الإخوان المسلمين في الفاضية والمليانة ، ومع ذلك تنشر جريدة الراي الكويتية التي يعمل مستشارا لها حوار مع مهدي عاكف يمجد في الإخوان المسلمين ، ولم يفتح عبد الله كمال فمه الذي امتلأ بصرة دنانير طبعا ، مساء الشفافية يا جدول الضرب

غير معرف يقول...

sssssssssoooooooooooo colllllllll
u r a nice person
ur blog is the greatest one
fuuny but hard

ابن رشد يقول...

طب و النبي هو بيدور على الشيكولاتة و احنا بندور على العيش دة كلام ينفع يا راجل

Unknown يقول...

جميل جدا
لكن مين اللي راسم الصور الرائعه ي
؟؟؟؟؟؟؟؟؟؟؟؟؟

غير معرف يقول...

شكلاطة حتة واحدة

اللة يرحم امة والا ستة التمرجية وابوة فراش المحكمة - بقى هو عايز ياكل شيكلاطة واحنا ناكل من المجارى
احنا هنا يا حبيبى الدهل مش لاقيين تاكل وهو عايز ياكل شيكالاطة
كل دة علشان البقر اللى فى العزبة بيعملوا لة حساب للجرابيع اللى قعدوا على الكراسى وحكموا العزبة وجوعوها
شيكلاطة ابن الايدة

غير معرف يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Impressora e Multifuncional, I hope you enjoy. The address is http://impressora-multifuncional.blogspot.com. A hug.

السـيد شبـل يقول...

كويس جدا بجد

غير معرف يقول...

لا بجد بجد مدونتك جامدة وانا من أشد المعجبين بيها


بس ليه انت مش بترد ع الناس ؟؟


المهم ربنا يخلي لنا الحاج العمدة ويطول لنا في عمره يا رب

ويطيب ثراه مقدماً :-)