عزبة الحاج أبو جمال وولده

علمنا بمحضر الصدفه

2009-02-02T03:35:00.000-08:00

توالت الأنباء عن العملية النوعية المسماة بعملية العميد ميت التى ربما تكون قد وقعت فى مكان ما بالعزبة، واهتمت العديد من وكالات الأنباء بتغطية الحادث، وبثت الجزيرة شريطا تسجيليا لزعيم الإرهاب أسامه بن لادن يبارك فيه العملية، وقد أعلنت حركة تلاتين فبراير وجناحها العسكرى المسمى بكتائب الشهيد مالك مصطفى وتابعيهم من جماعة مدونون من أجل الإرهاب، مسئوليتها عن الحادث البشع الذى راح ضحيته ناس كتير ونفوس ياما، وقد جاءنا بيان رسمى تعليقا على ما ورد من أنباء فى الصحف.

قامت فئة منحرفة ببث الذعر وسط صفوف الجماهير المحتشده استقبالا للحج بعد عودته بالسلامه من رحلة علاج البواسير، وحبقه العوطلى يحذر كل من تسلول له نفسه المساس بأمن العزبة واصتقرارها، ويخص بالذكر كل من وائل عباس وجيمى ولد هود، والحج جرجس الشهير بمينا ذكرى وعمر الهادى الشهير بأسد ومحمد الطاهر والبت اسمها إيه اللى مغرغرين بيها والفلول التى تتبعهم من مقاطيع ونوريه وبلوجريه. هذا وتهيب وزارة الداخلية بالعزبة بكل الشرفاء التقدم للجهات المختصه وخصوصا جهاز أمل الدولة وجهاز العروسين وجهاز ان تلاته وتسعين بأى معلومات قد تفيد فى الايقاع بهذا التنظيم كى يتسنى تسليمه لعدالة جناب الحج ليفعل فيهم ما يراه، وياهنيالك يااللى يشمطك الحج.

ونود فى هذا الصدد أن نؤكد باسم شعب العزبه المغوار البطل الصنديد بأننا لن نلين أمام تهديدات هؤلاء الخارجين وسوف نضرب بيد من حديد العز كل خطر يطل برأسه على عزبتنا المصتقره، هذا وبالله التوفيق والسلام عليكم ورحمة الله.

مصادر: جمال بيه في واشنطون قريبا لقضاء ويك إند مع أوباما

2009-01-21T16:34:00.000-08:00

Thousands of journalists from around the World descended on El-Ezba this week, attempting to test El-Ezba's mood, as Barack ibn el-Hagg Hussein Obama starting officially his presidency.
"I don't understand what this fuss is all about?" asked a citizen of El-Ezba who preferred not to mention his name. "Amreeka is happy they have a black president? We already did it before! Other neighboring Ezbas did it too, so what the fuck man?!"
Other Ezba citizens were less cynical, expressing Obama's presidency would indeed signal a new era of change.
"He will bring change," asserted Mahmoud Sa'd, a carpenter who runs a local medical clinic in El-Ezba. "He is a man of change. He changed his mind so many times before. "
Well placed sources in the ruling El-Ezba said diplomatic ties between the two sovereign countries were expected to continue, solid and strong...
"Gamal Beih already has an Obama picture up on his office wall," said one of the Beih's confidants. "They both share a vision for change, that will change a lot of the the things that need to be changed."
While Gamal Beih had been unreachable, spokesperson Abdel Shakour Gobles confirmed Gamal Beih and Diga Hanem will be heading for Washington DC soon for a weekend with the Obamas.
"That will be a test for Obama's commitment to change," said Doktor Baheeg, an expert on El-Ezba affairs, and a senior lecturer at El-Ezba Open College. "Despite our close relations with Amreeka, El-Beih was always given a small room to stay in whenever he visited the White House. We'll see how big the room will be this time, and whether there will be a toilet attached. If Gamal Beih is given the same room, then so much for change."

أربط عندك منك له، بيان هام

2009-01-01T04:05:00.000-08:00

تأييد واسع ومبحبح لخطاب الحاج التاريخى

الحاج بعلو صوته: لن نسمح بزيادة الفرقة بين فصايل العزبة المجاورة المتحاربين
فى كلمات إدانة شديدة اللهجة يالحاج يقول: يا جماعة يا االلى محتلين العزبة اللى جنبنا اختشوا بقى وخافوا الله يا عالم وبلاش إحراج

متابعة: فرشوطى الماحن وبلبع الرغاى

اعلنت الامانة العامة لمجلس الركش المركزية المتحدة برئاسة الحج نازمى ريادة الأمين العام للمجلس تأييدها الكامل للبيان الذي وجهه العمدة أول امس وما تضمنه من رسائل سياسية مهمة الي كل الأطراف فى العزبة المجاورة والي ولاد العم المحتلين هناك، وقد أدان الحج عدوانها الغاشم وقال بالفم المليان عيب اختشوا يا عالم، وهى رسالة سرعان ما وجدت طريقها لدار العمودية فى تل كئيب، كما وجه الحج كلامه لولاد حمساوى وإلي شعب العزبة المجاورة وفصائله المتناحرة، ودعاهم فخامة العمدة لوحدة الصف ووحدة أوسيم، والوحدة الزراعية بكوم آشفين. واتحايل على أمهم لنبذ الخلافات وهدد الجهات التي تسعي لتحقيق مكاسب رخيصة علي حساب الدم بتاع أهل العزبة الغرقانة فى الدم قائلا زريبى تساع ألف مشموط فى الدقيقة يا عالم نجسة.

ودعا الحج شعب عزبتنا المصونة أن يتحمل مسئوليته التاريخية تجاه شعب العزبة المجاورة الشقيق وقضيته العظيمة الجامدة الرهيبة، بكل عزم وتصميم .. جاء ذلك في البيان الذي اصدرته الامانة عقب اجتماعها امس والذي تم خلاله مناقشة الاحداث الجارية في العزبة اللى جنبينا.

إدانة العدوان

وصرح الحج نازمى ريادة بأن الامانة العامة ادانت العدوان بتاع ولاد العم والذى هو مستمر علي العزبة المجاورة واكدت علي ضرورة الوقف الفوري للاعتداءات العسكرية علي الشعب الغلبان ومعاقبة مرتكبي هذه العمليات الوحشية التي تتنافي مع المباديء الانسانية وجميع القوانين والاعراف الدولية.

رفض توسيع العمليات

كما اعربت الأمانة عن رفضها التام للتهديد بتاع ولاد العم بتوسيع العمليات العسكرية في العزبة المجاورة خلال الايام القادمة مهددا بأنه سيقلع راسة ويدعى عليهم وربما يقرا على رؤوسهم عدية ياسين بحالها، واكدت الامانة العامة ان بتوع العزبة اللى جنبينا عليهم تحمل مسئوليات قانونية تجاه العزبة اللى جنبينا باعتبارها سلطة احتلال لهفت الكام فدان اللى حيلة العزبة وأهلها ، وانه وفقا لاتفاقيات جنيف فإنها تعتبر مسئولة عن ادارة العزبة وبالهنا والشفا بس مش كده. وعليهم أن يراعو ربنا فى أوضاع شعب العزبة المجاورة اللى مش لاقى اللضا، واللى عمال كل شويه ينط من على حيطان الدور عشان يجى ياكل حدانا فى عزبتنا. وأضاف الحج نازمى إنه طالما استمر وضع الاحتلال فعليهم بقى تحمل التلسين والكلام الفارغ بتاع عيال ابو اسماعين وغيرهم. وحذرت الامانة العامة من الاصوات الجاهلة او المغرضة التي تدعو الحج لاتخاذ اجراءات يكون من شأنها ان تتنصل الجماعة اللى لهفوا أرض العزبة المجاورة من مسئولياتها وان تعمل علي تكريس الانقسام بين أراضى داير الناحية وغرب الرشاح .

مسئولية ولاد عيلة الحمساوية

واشار البيان الي ان الامانة العامة مع ادانتها للعدوان الهجمي علي العزبة المجاورة فإنها تسجل مسئولية قيادة عيلة الحمساوى عما وصلت اليه الامور فقد انساقت تلك القيادات وراء وعود وهمية من الاطراف وجهات لم تقدم للقضية سوي الكلمات والشعارات حيث افشلت هذه القيادة كل محاولات تحقيق الوحدة الوطنية فى العزبة المجاورة ولم تقبل النصائح بتاعة الحج رضى الله عنه وغيره من حجاج العزبة المطوكرين، حول اهمية استمرار التهدئة وتعاملت مع الوضع بروح المغامرة وعدم المسئولية ولم تقدر العواقب المترتبة علي مواقفها.

صف واحد

وقد دعت الامانة العامة جميع الاطراف فى العزبة اللى جنبينا الي الوقوف صفا واحدا ازاء التطورات المفجعة في عزبتهم ودعم الجهود بتاع الحج الكبير والرامية الي التهدئة وتجاوز الخلافات القائمة فيما بينها وذلك لان استمرار الوضع الحالي يسهم في اضعاف الموقف وبيحرج الحج صراحه ويصب في نهاية الامر في مصلحة الجماعة ولاد العم الذين شغالين فى السعي الي فرض الامر الواقع وتصفية القضية ولهف حيازة الأرض فى العزبة اللى جنبينا بالهنا والشفا. مع الاستمرار في انكار حقوق الناس الغلابة بتوع العزبة اللى جنبينا وتقنين الاستيلاء علي أراضيه والاعتداء علي ابنائه بوحشية غير مسبوقة في عالمنا المعاصر واعربت الامانة العامة عن رفضها القاطع لمحاولات البعض استغلال التطورات الحالية للتشكيك في دور الحج وأهداف الحج وحكمة الحج. الحج تاريخ بيفرض نفسه على أى واحد بيتكلم فى القضية. واكدت ان وصف الحج وسياساته بالتعريص ما هو إلا محاولات بائسة تستند الي اكاذيب ومغالطات تتجاهل ما قدمته العزبة علي مدار العقود الماضية من ماء وكلأ وزكاة فطر ولاتزال تقدمه من اجل القضية بتاع ابناء الشعب الغلبان اللى جنبينا دهوه، أشقاء برضو هانعمل إيه، سواء في كفاحهم من اجل نيل حقوقهم السياسية والوطنية المشروعة أو لرفع المعاناة المستمرة التي يعانون منها من جراء الاحتلال وتؤكد الامانة العامة مشاركتها لشعب عزبتنا العظيم بمختلف طوائفه وفئاته ورفضه التام لحملات التشهير والتحريض التي تستهدف تشويه صورة الحج.

واكدت الامانة العامة ان العزبة تتعرض لحملة منظمة تشارك فيها قيادات من ولاد حمساوى وغيرهم من بلاد تانيه مش هانسميها عشان عيب، وأول حرف من إسمه نصر، والحدق يفهم، وهى عناصر تسعي للتقليل من دور الشعب بتاع العزبة وحجه الحاكم، والتضحيات التي قدمها الراجل من اجل قضية الأرض المنهوبة، وهى عناصر تسعي للاثارة والتحريض بما يؤدي الي مزيد من الانقسام بين العمد لخدمة اغراض حزبية وفئوية ضيقة كما اكدت الامانة العامة ان شعب عزبتنا علي بينة من حقيقة اغراض تلك الجماعات وان العزبة لن تتورط في مغامرات أو تتخذ قرارات غير محسوبة العواقب وتدعو كل المواطنين والقعدات ورعاة الجاموسراتية السياسية الي اليقظة وان نقف جميعا وقفة رجل واحد في مواجهة الاكاذيب التي تروج لها فئة في بلدنا وضرورة التحرك لوضع الحقائق في نصابها دعما للحج وحكمته وموقفه الثابت في مساندة ولاد العم، قصدى شعب العزبة المجاورة الشقيق.

واعربت الامانة العامة عن بالغ اسفها الشديد لضرب الغفير زيان أبو آليطه نتيجة لهجوم بالنبابيت من جانب ولاد الحمساوية وقع علي أول داير الناحية داخل اراضي عزبتنا ، وحذرت الأمانة من اي محاولة للعبث بالسيادة بتاع الحج عبر المحدة وزمام البلد اليمين، لأن أمن العزبة واستقرارها وحياة ابنائها خط احمر مرفوض تجاوزه واكدت الامانة العامة في ختام بيانها ان شعب عزبة الحج أبو جمال وولده لا يخضع للضغط السياسي او الابتزاز الاعلامي ولا ينجر وراء دعاوي المغامرين واوهامهم وان القيادة ممثلة فى الحج وولده وحرمه ومجلس الركش المطوكر والأمانة والغفر تدرك جيدا واجباتها ومسئولياتها وتمارس دورها الوطني العزباوى وانها ليست مستعدة للدخول في معارك صغيرة أو مهاترات اعلامية

بس خلاص

العزبة ليست معرصة، وأبدا لن تكون.. والحج ما ينقالش عليه كده

2008-12-28T01:49:00.000-08:00

كالت الأقلام الماشبوهه النقد لسيد العزبة وقائدها ومجلس خفرها، واتهمتهم بالعمالة للعزبة إياها اللى جنبينا اللى محتلينها ولاد الاسمه إيه. عيب والله العظيم عيب يا بلد. الكبير مش نتن ولا وسخ ولا لا سمح الله عرص للدرجة دى، زى ما انقال وانكتب على حوايط البلد.

كل ما فى المحدت يعنى إن المرة لما جت وطلبت اللقا، وانتم عارفين اللقا نصيب، كان لازمن وحتما اوافق، عشان المصلحة، وعشان كمان أراضى العزبة اللى جنبينا ما تروحش كده، واعلنت وقلت وانكتب عن لسانى ان البيه حذر وقال، وعاد. طب العيبعلى مين بقى.. العيب - يا صاحب العقل منك له - على اللى ما سمعش التحذير وكابر. أيوه.

المدبحة اللى جرت امبارح دى دى مالناش فيها، عملنا الى علينا، وقلنا هانفتح ممرات انسانية للى ينصابو واللى يتعورو، لكن ما نتدخلش، نتدخل ليه، ما هو لما جينا نتدخل قبل كده الجماعة ولاد ابو حماسه فشكلوا الحوار، واتهمونا ان احنا بنعمل عليهم ملعوب، ملعوب ايه يا مقاطيع، اهو، ودلاديلهم مستغلين صورة يعنى للحج بيقابل المرة اللى هاتمسك عمودية العزبة اللى جنبينا (مبروك النسوان بقت عمد، هللوا وكبروا)، وعمالين يقولو اهو العمده بيعرص، العمده بيبيع اخواتنا للعدا، ده كلام مايتردش عليه غير بالشمط، وهاجيب اللى انسحب من لسانه وقال كده، وبعدين ماله يعنى إن حمد الغيطى الجدع الدلبوماسى بتاعى يسندها، المره كات هاتنكعبل فى القناية، يسيبها لما تنوحل، لا طبعا ما تنوحلش، ينوحل ولاد ابو حماسه واللى جبهم راخر.

هاتقولولى كلامك مش واضح يا حج، مش فاهمين، وهو فيه جديد، طول عمركم كده والبهايم البكم بتفهم احسن منكم، بس اقول ايه مانتم قدرى.. هحاول افهمكم يا عزبة الهم.

أولا ولاد ابو حماسه نطرو عباس من الارض اللى خدها من ولا دا لإيه الحج عرفه طيب الله ثراه، زى مانتو خابرين، واشتغل فيها بمساعدتنا وعمله كام سبوبه ومربط حمير والذى منه، ولاد أبو حماسه وعائلات تانيه فى البلد قالوا ده عباس وشوية الحرامية اللى لاممهم حواليه، زحلان وخريان واللى زيهم هايطرمخو على حقوقنا وعلى اراضينا المنهوبة وعلى ارواح ولادنا اللى راحو عشان نرجعها. آنى ما عجبنيش الكلام، عباس راجل من رجالتنا، وشريكى فى الطابونة القبلية زى ما انتو عارفين، وراجل، على الطلاق م المصونة راجل، قوم الواد ابن هنية قالب على عباس وطارده م الارض وعملى فيها عمده، فاكر ان العمودية بالساهل، ولا يمكن هى بالساهل، يمكن بالساهل وانا مش عارف ونايم على ودانى.

المهم جونى ولاد العم قالولى يرضيك يا عمده، قلت لا لا لا لاه، قالولى انفاق يا عمده، قلت نهدها، قالولى حصار يا عمده، قلت نحاصر وماله، قالولى اتدخل وصالح يا عمده، قلت اصالح.

المهم وانا باصالح دولم على دول، ابن هنية عمل فيها دكر، وعباس كان خايف وقلقان، وولاد العم عاوزين عباس، عشان مريحهم وعشان راضى بقليله وراجل كمل يعنى وماتطلعش من بقه العيبه، وكبر وبقى مش غاوى تنطيط ونقرزه وقلة ادب بيسموها قال ايه مقاومة. لا القعدة عندى فى العزبة ولا الرجاله اللى بعتهم للعزبة اللى جنبينا نفعوا، قلت لابن هنية ما تاكل عيش يابن هنية وخلينا عايشين، عاجبك يعنى اللى جرى للعمدة ابو حسين يعنى، قاللى يا جناب العمده احنا لينا حق ومش هانسيبه، قلتله اخد الحق حرفه يا خايب ... ماتبقاش حمقى ، ماهو محدش هايديك حاجه بالطريقة دى، قاللى مابنشحتش يا طيب ده حقنا، قلتله اتعلم طب من عباس، قاللى علام عباس واللى شبهه ده هو اللى ضيع ارضنا، قلت له طب خف شويه من الهجوم على زرايب ولاد العم، قاللى هو ده اللى حيلتنا، ما عندناش غيره، وبعدين يعنى تجريدة الغفر بتاعتك عندها أوامر تبعد، أعمل ايه أنى بقى، قلتله له هايبهدلوكم يابن هنيه، وغفرهم هاينزلوا عليكم يدبوكو العقلة المتنية وساعتها انى مش هاتدخل، قاللى كانك بتهددنى يا عمده، قلت له افهمها زى ما تفهما يا ابن هنيه، واوعى تفتكر الشيخ سعودى هاينفعك، ده حلنجى زيه زينا قاعد ياكل عيش، وهو بيزقك لمصلحه، والمنجد بتاع السجاد برضو مش هاينفعك، ولا حتى سيد أبو أسد، كلهم بيستخدموك يا عبيط عشان يخففو الضغط اللى عليهم. قاللى بلا يستخدمنى بلا ينيلنى، هى لعبه يا حج، دى ارضنا وراحت .. راحت يا عالم، وانت ماترضاش بكده، يا عمده يا كبير احنا صحاب حق، بس لازم تظبط نفسك بحيث ما تنحسبش على حد، هب فى وقال دى مشاكل بينكم ما تحشرنيش انى فيها، انى غلبان وماليش فى الشغل بتاعكم ده، م الاخر، اللى هايدينى نبوت ولا لقمه لرجالتى يبقى حبيبى، انما حساباتكم ومشاكلكم خلوها، ما تبعتوهاليش، إنتو كبار العبو مع بعض، انا مشكلتى صغننه، أرضى، قلتله ما فيش مشاكل ولا حاجه ربنا ما يجبش مشاكل، وهو حد هايفرط فى الارض يعنى، انى معاك بس انت عامل ازعاج وولاد العم نسايب الباشا الكبير وانت عارفه إيده طايله، قاللى ما أوخذ بالقوة لا يسترد إلا بالقوة، قلتله وتضرب اخواتك، قاللى عباس واللى زيه ما ينفعوش يبقوا اخواتى، دول شغالين عند ولاد العم، دول دلاديل يا عمده وانت مقويهم علينا ليه مش عارف. قلتله ما قرايبك برضو قرفينى يا ابن هنيه . قاللى يا حج دول ناس عزبتك، من حقهم يقولو اللى شايفينه صح ويشاورو على الغلط ويقولو غلط، هبيت واقف وقلتله غلط، غلط مين ويشاور مين يا ابن هنيه، المقابله انتهت يا خويا وابقى ورينا مرجلتك بقى، قدامك يومين يا حبيبى مافيش غيرهم و المره ام ليفه بلغتنى الخبر وقالتلى اعمل حسابك، وانا بصراحه اديتها الاذن، انت لوحدك يابن هنيه

قاللى ربنا مع المظلوم والغلابة جابر يا حج

سلام

قلتله فى ستين ياخويا

اهه عدانى العيب وقزح يابلد ولا برضو يقولو ماقلتلهمش، طب على الطلاق ولا ليكو عليا حلفان أنى برضو قلبى رق للعيال والنسوان والغلابه اللى هايروحو ف الرجلين، فقلت للمره ام ليفه، يا ست الكل يعنى لو تخليها علقه محدودة وتقبضو على ابن هنيه وشويه من الاضيشه وتلبوهم العلقه المعتبره هاينكنو وتفضوها سيره، قالتلى ايمبوسيبل يا جراند، دول ولاد مره لبوه واحنا هانربيهم كلهم، قلتلها كلهم، قالتلى ايوه كلهم كبيرهم فى صغيرهم، مش هانعتق، قلتلها تقدرو النهارده بس بكره الكل هاينقلب عليكو، قالتلى البركة فيك يا عمده، امال احنا بندعمك ليه، قلتلها يعنى ايه بتدعمونى، انتى هاتعيرينى بالكام ملطوش، ولا بالعباية الجوخ اللى جبتهالى، قالتلى عيب يا عمده، احنا بنراهن على حكمتك. والباشا بيمسى عليك، بصراحه كده لما سيرة الباشا هبطت على القعدة، نزلت على الحوار بردا وسلاما، اى والله بردا وسلاما، ولقيتنى باسلم عليها وباقولها باللاوندى اوكى مسز ليفه. وزعقت فى حمد الغيطى وقلتله قوم يا نطع وصل الهانم.

طب بعد كل ده يقولو على العمده معرص
يرضى مين ده
يعنى بعد كل ده انى معرص
واللى عملته ده ينسمى تعريص
بقى دى اخرتها يا عالم
انى ينقال عليا معرص

اخس يا بلد

الحمد لله مجلس العزبة الموقر يقر تمديد حالة الطوارئ عامين تانيين

2008-05-27T04:31:00.000-07:00

الثيدات والثادة أعضاء المجلث المطوقر: - منذ ثنتين بالتمام والكمال وقفت أمامكم وقفتى اللى ما يعلم بيها الا ربنا دلهين أطلب باثم العمودية مد حالة الطوارىء لمدة عامين..أو لحين ثدور قانون مكافحة الارهاب أيهما أقرب..وقلت فى ذلك الوقت والمظبطة متظبطة وشاهدة.. أن هذه المدة ليثت طويلة بالنظر الى مايتطلبه اعداد هذا القانون من تعديلات فى الطثتور وبعض القوانين. ومع ادراكنا-منذ الأول خالث- لثعوبة المهمة التى كانت تنتظرنا، بل واثتحالتها، وهى تحقيق وعد الثيد عمدتنا وتاج راثنا وحامينا وراعينا ومالينا ونافخنا، الحج جمال بيه، الذى شمله بورنامجه الاثنتخابى.. باعداد قانون لمكافحة الارهاب.. يحقق التوازن بين حريات المواطنين واثتقرار مجتمع عزبتنا وأمنه وثلامته..ننهى بيه حالة الطوارىء التى طالت مدة اعلانها وشغاله منذ أيام خامل الذكر الحج الكبير..فقد كان بحدوتنا الامل فى أن تثاعدنا تجارب الدول التى ثبقتنا الى اعداد مثل هذا القانون فى ثرعة انجازه وحثن اتمامه، وبفلوث المعونة وثعات الثفير كرم الله وجهه ووجه اللى جت بعده، ولكن تبين للجنة التى كلفت باعداد هذا القانون أن الدول التى ثبقتنا الى ثن تشريع لمكافحة الارهاب، زى مانتو خابرين بتعمل حاجه غريبة، فماتلبث أن تثتقر على نثوث تبغى بها تحقيق توازن بين حقوق المواطن وأمن المجتمع، حتى يكشف لها التطبيق العملى أنها قد مالت الى جانب على حثاب جانب. ومرة تميل هنا ومرة تميل هنا ولا فيش اثتقرار. وأخفقت فى تحقيق هذا التوازن، دول زى أمريكا وفرنثا وانجلترا وايطاليا والنمثا وحتى عزب جنبينا هنا، كلهم ثقطو فى الامتحان بتاع الارهاب، المهم هذه الدول تثارع الى تعديل نثوث القانون، لندرك مافاتها أو لتثتكمل النقث الذى بدأ أمامها..، لقد حدث ذلك عدة مرات فى انجلترا منذ اقرار أول تشريع لها فى مكافحة الارهاب فى عام 2000 .. وكذلك فى فرنثا والولايات المتحدة الامريكية وغيرها من الدول..التى مازالت تدرث ادخال تعديلات جديدة على قوانينها فى هذا الشأن.. وعندى دليل إنها بتدرث دلقتى وندمانه أشد الندم على إثدار مثل هذا القانون الاغبر، وهو ترف لانملكه فى مثر. قطيعة تقطع لثانى، قصدى العزبة. فقد تعودنا على ضرورة اثتقرار التشريع ولا نغيره ما حيينا.. وأن القانون اذا دخل الى حيز التنفيذ من الشباك لاينبغى النظر فى مراجعته قبل انقضاء مدة طويلة على تطبيقه وبذلك لا يخرج حتى لو ثبت إنه مش ولابد، مش لعبه هى حط تشريع هنا وعدل تشريع هنا وفثلولنا تشريع على مقاث ده أو دلهون، لا مش لعبه، ونعمل هذا حتى لايوثم قانونا بثوء الاعداد والتثرع فى مناقشته (وزى مانتو خابرين قوانينا بثم العاطى الوهاب، اللهم لا حثد، بيحثدنا عليها طوب الأرض).. ومن هنا كان ثعى اللجنة التى كلفت باعداد قانون مكافحة الارهاب..وبحثها الدؤوب لايجاد ثيغة التوازن المطلوب.. من كل حدب وثوب وعشان محدش يحدف بالطوب، التى نكفل لهذا القانون توافقا حول نثوثه.. وتجنبه الانتقادات التى كانت قد بدأت تنطلق أثناء بحثه (رغم أننا والله العظيم لم نثرب منه مثودة ولا كلمة، عرفو منين ولاد الكلب مش عارف، المهم ) وقبل أن تتكشف نثوثه ويثتقر على مضمونه..كنا نثمع هذه الانتقادات ولانثتنكرها،ورغم قيامها على الظن والتخمين وعدم اثتنادها الى الحق واليقين.. كل واحد اتمرع ورقعله بقين، ولكننا كنا نتفهم مراميها..وهو خلق رأى عام ضاغط..يدفع عن هذا القانون شبح تقييد الحريات وانتهاك الحرمات..فثعوبة اعداد هذا القانون تتمثل فى أن الجريمة الارهابية تعتبر من الجرائم الخطرة والوحشة ومفيش داعى أشرح بتحصل ليه وعشان إيه..والنثوث التى توضع لمكافحة هذه الجريمة.. لاتتبدى فاعليتها الا بقدر أثرها فى الحيلولة دون وقوع هذه الجريمة وعدم اتمامها.. فاهمين بقول إيه، يعنى مطلوب تتطير رقاب لظبط الكلاب لان الجريمة الارهابية اذا وقعت أحدثت-بغض النظر عن نتائجها-أثرها فى زعزعة أمن المجتمع واثتقراره.. ومن هنا جاءت القواعد الاثتثنائية فى قوانين مكافحة الارهاب.. التى يراها البعض أفتئاتا على الحقوق والحريات..ويراها البعض الاخر كفيلة بتحقيق الامن والاثتقرار..وهو اعتبار-فى نظرهم-يعلو على مادونه من اعتبارات، ولأنه كث ام دولا على أم دول فى نظر الحج، وعلى الرغم من أن اللجنة التى كلفت باعداد مشروع القانون..قد بذلت جهودا مضنية فى البحث والدراثة والمقارنة..الا أن الحج رأى أن الوقت لم يثعفها للاثتقرار على ثيغة تحقق التوازن المطلوب فى هذا القانون.
ده أول هام،
الثيد الطكتور رئيث المجلث... الثيدات الثادة أعضاء المجلث الموقر..
ازاء هذا الوضع كان أمام حكومة العزبة التى أشرف بركوبها قصدى برقيادتها خياران لاثالث لهما: -(الخيار الاول) أن تنتهى اللجنة من اعداد مشروع قانون مكافحة الارهاب فى أثرع وقت..وتنتهى من اثداره قبل 31 من مايو 2008..على أن نعدل ونبدل فى هذا القانون.. فى ضوء مايكشف عنه التطبيق العملى من ثغرات وعثرات..وما يوجه الى القانون من انتقادات. -(الخيار الثانى) أن نمد حالة الطوارىء مدة أخرى.. ولانثتعجل تقديم مشروع القانون فى الموعد الذى حددناه. ونبحبح ونرحرح، بدل ما ناخد تمديد طوارئ مثلا شهرين تلاته ليه ما يبقاش ثنتين زى ما عملنا فى لعبة الملحليات إياها، ظبط الشغل أهم مالشغل، ثح ولا إيه، .حتى نمنح أنفثنا الفرثة لمزيد من الدراثة..ومزيد من النقاش . والتروى والتووووؤادة .ومزيد من الحوار المجتمعى حول مشروع قانون هو الاخطر والادق فى مثيرة الاثلاح الديمقراطى التى تضمنها البرنامج الانتخابى للثيد العمدة.
اتجه نظر الحكومة الى هذين البديلين ولم يتجه الى انهاء حالة الطوارئ والاكتفاء بالقوانين العقابية والاجرائية القائمة لمواجهة ظاهرة الارهاب. لم تتجه الحكومة الى هذا الحل لانها لم تكن على اثتعداد للتضحية بالاثتقرار الذى ننعم به، والامان الذى نشعر به، والنمو الاقتثادى الذى تحقق فى ظلهما. لم تتجه الحكومة الى هذا الحل لان رياح الارهاب عاتية من حولنا والاعداء يتربثون بنا، (ممكن حد يصد الشباك اللى جايب ارهاب ده يا عم ياللى هناك انت، ايوه انت هاتستهبل والله اعملك امر اعتقال حالا) والقوانين العادية لاتكفى لردعهم وتوقى خطرهم..وقد حثمت الحكومة فى النهاية أمرها، واختارت على بركة الله أن تطلب من مجلثكم الموقر مد حالة الطوارىء وهو كره لها (عيط يا محمود معايا ونهنه) .. فالحكومة لاترغب فى العمل فى ظل أوضاع اثتثنائية وكفاية عليها تسعة وعشرين سنة طوارئ.. ولكنها تضع فى المقام الاول أهمية تحقيق التنمية فى ظل مناخ امن ومثتقر يشجع الاثتثمار الذى يخلق فرث عمل لمئات الالوف من الشباب ويرفع من مثتوى دخل الاثرة فى العزبة لمواجهة أخطار الغلاء الذى يعانى منه عالم اليوم والغد وفسخانى النصر.. لقد اختارت الحكومة أن تطلب مد حالة الطوارىء وأن تتأنى فى اثدار قانون مكافحة الارهاب،وأن تجرى حوارا مجتمعيا حوله، تشارك فيه جميع الفئات ومنظمات المجتمع المدنى، وكل مهاطيل العزبة، حتى يثتجمع أثباب الرضا بأحكامه، وتزول الشكوك والمخاوف التى تثاحب اعماله.
الثيد الحج الطكتور رئيث المجلث.. الثيدات والثادة أعضاء المجلث..
قلت أمامكم منذ عامين أننا نعلم-قبل غيرنا-أن تطبيق قانون الطوارىء لن يقضى على الارهاب تماما ولكنه يجهض الكثير من عملياته، ويتيح للاجهزة الامنية بعض التدابير واجراءات الشمط الاحترازية التى تعينها فى مواجهة عناثره الوثخه (حتى اسألو ولاد أبو ثماعين)،التى تطور فكرها وتثتعين بالقتنيات الحديثة فى اجرامها. ووعدت الحكومة عند طلب مد حالة الطوارىء الا يثتخدم قانون الطوارىء أبدا الا بالقدر الضرورى اللازم لحماية أمن العزبة والمواطنين،ومواجهة خلايا وتنظيمات وموجات الارهاب التى لم تهدأ حتى الان (مش قلتلك يابن المرة تقفل الشباك اللى حادف علينا الموجات دى) .وأحثب أن الحكومة لم تخلف وعدها فى هذا الشأن، فلم تتعثف فى اثتخدام المكنات التى يتيحها قانون الطوارىء، ولم تثتخدم هذا القانون الا فى الغرض الذى حددته وهو مواجهة الارهاب واجهاض مخططات عناثره. واليوم ونحن نطلب مد حالة الطوارىء لمدة عامين أو لحين الانتهاء من اعداد قانون مكافحة الارهاب،تجده الحكومة الوعد بألا يثتخدم قانون الطوراىء الا فى مواجهة الارهاب، وبالقدر الضرورى اللازم لمواجهة هذه الظاهرة
-عم الطكتور رئيث المجلث.. -الثيدات والثادة أعضاء المجلث الموقر..
ما أحوجنا اليوم أن نرتفع فوق خلافاتنا الحزبية والثياثية، ومش هانساكم فى المهلبية، وأن تتوحد كلمتنا فى مواجهة خطر الارهاب الذى يهدد أمتنا،ولنتجول ببثرنا فى العالم من حولنا، حتى ندرك نعمة الاثتقرار التى من الله بها علينا.. ماأحوجنا اليوم أن تتثامى مطالباتنا، وأن نبذل جهدنا ومثعانا لاثتكمال مثيرة الاثلاح والتنمية التى بدأت تؤتى أكلها بعد حين، وندعى للحج وفكره قديم وجديد، وآديكو شايفين، بدأنا نجنى ثمارها، فلا تثمحوا لقوى الشر أن توقف مثيرتنا، ولا تمكنوا قوى الارهاب من زعزعة أمننا واثتقرارنا.. ولتكن الموافقة على مد حالة الطوارىء مناثبة لاظهار وحدتنا فى مواجهة الاخطار التى تهددنا، ولتكن كلمتكم اليوم أغلبية ومعارضة رثالة الى أعدائنا الذين يراهنون على تفرقنا، لانهم لايدركون طبيعة هذا الشعب الاثيل الذى نجمعه المحن وتوحده الشدائد. -
. -حفظ الله لعزبتنا أمنها واثتقرارها فى ظل فخامة جلالة عمدتها
والثلام عليكم ورحمة الله وبركاته...
أحمد العفش
كبير الوزرا

كل سنه وانت طيب يا حج

2008-05-03T21:36:00.000-07:00

يوم أن ولدت العزبة ‏..‏ من جديد

صراحته ترياق أفقنا به من وهــم طـــويل‏..‏
وواقعيته صمام أمان لحلول الأزمات
بقلم: شفيق أبو ضب


من حق آهل العزبة الشرفاء الغيورين علي وطنيتهم أن يعلو اليوم صوتهم فوق أصوات صدعت رؤوسنا نضالا وكفاحا‏,‏ ادعاء وبهتانا عبر الفضائيات وفي المنتديات‏,‏ وجرت بأوهامهم أقلامهم علي صفحات الصحف التي أصدروها من أجل أغراضهم‏.‏ فاليوم هو يوم عرس للشرفاء الوطنيين من أبناء العزبة‏,‏ يسترجعون بكل العرفان والتقدير والامتنان والاحترام مسيرة رجل خرج من بين صفوفهم‏,‏ نذرته الأقدار لمرحلة حاسمة في تاريخها‏,‏ ودفعته المقادير لخوض معارك الانفلوسه وطرد ولا ابو سماعين وكل الغجر من عزبتنا الامنه سيدة العزب الشرقية اليوم هو الرابع من مايو‏,‏ يوم ميلاد عمدتنا‏.‏ ولد يوم كانت عزبته ضيعة بتانونية تكافح من أجل الاستقلال وإنهاء احتلال طال مداه‏.‏عايش في سني حياته ظروف المد والجزر في الحياة السياسية العزبجية وسنوات الصعود والهبوط والنصر والانكسار‏.‏ خبرات طويلة تراكمت وسنوات طويلة مضت قبل أن يحمل عنا مسئولية قيادة بلد كانت في خطر‏.‏ وفي يوم من الأيام سقط الحج الكبير غدرا بيد البتنجان الأسود‏.‏ كانت العزبة في تلك اللحظات تترنح تحت ضربات تلك الشرذمة من الإرهابيين الذين اغتالوا شيخ الغفر العظيم ونشروا الرعب في أرجاء العزبة الآمنة ‏‏ وهددوا أمنها ومستقبلها‏,‏ وكادوا يطفئوا وهج العطاء الحضاري لها ولأهلها‏.‏ دفعت الأقدار بفخامة الحج إلي مقدمة الصفوف ليقيل عزبة من عثرتها‏,‏ ويمنع سقوطها بين يدي قوي الظلام المتربصة بكل عقل سو ي وبكل وجدان ومزاج عالي‏.‏ وليقود عزبته في طريق شاق وطويل من تحرير ما تبقي من أرضها‏ ‏ وأعاد للعزبة سيادتها كاملة‏,‏ إلي مواجهة حاسمة لمشكلات كانت قد تراكمت فتشابكت وتعقدت‏.‏ في ذلك اليوم ولدت عزبتنا من جديد‏.‏ ولدت حين اندحرت قوي الإرهاب بمؤسسات العزبة القوية التي أقامها الحج بفلوسه قوية قادرة بالإرادة والشمط علي أن تستأصل ذلك الوباء الأسود‏.‏‏ ولدت حين بدأنا عصرا من النهضة والعمران والبناء‏,‏ وعصرا من الحرية والتطور الجاموسراتي‏ ولدت يوم عرفنا طريقنا إلي ما نحن فيه اليوم‏.‏ لايحتاج منا الحج أن ندافع عما وعد فأنجز‏,‏ وعمل فأعطي‏.‏ ولكننا نحتفي اليوم بما حققناه تحت قيادته‏.‏ نحتفي بسجل طويل ومشرف من الإنجازات به ومعه‏.‏ فالرجل الذي ولي الحكم ورؤوس كبارات العزبة يرزحون في أغلال الحبس والاعتقال فأطلق سراحهم وظبطهم وتجاوز كثيرا عن مساوئهم ليس بحاجة إلي من يدافع عنه‏.‏ والرجل الذي ولي حكم العزبة وليس فيها مرفق واحد لايعاني وهنا أوضعفا‏, لا ساقية شغاله ولا طابونه عمرانه‏ له فيما نحن فيه اليوم شاهد علي روعة الأداء وعظمة الإنجاز‏. العزبة التي وليها الحج كانت شبه عاجزة عن تدبير فاتورة الغذاء لشعبها‏,‏ ‏ هي اليوم بعد سنوات حكمه في عيشه هنيه وفرحه نيه وسعادة متنيه‏.‏ الحال اتغير ولدينا قائمة طويلة من الإنجازات يصعب حصرها أو حتي الإشارة إليها جميعا في هذا المقال‏. لذا سنبث طوال اليومين القادمين تقارير مفصله عن الانجازات وسيذاع فيلم الناصر والرصاصة لا تزال في رجلي‏ عرفه اهل العزبة وخصوصا اكابرها منذ بداية عهده واقعيا وصريحا‏,‏ وهما صفتان كانتا من الفرائض الغائبة عن الخطاب السياسي العزبجي زمنا طويلا‏.‏ كانت صراحته ترياقا أفقنا به من وهم طويل علي حجم ما لدينا من مشكلات‏.‏ وكانت واقعيته صمام أمان لحلول لتلك الأزمات‏.‏ لم يغامر بمصير عزبته يوما ولم يقايض علي مصالحها بفدادين الدنيا‏.‏ سوف يظل الحج جزءا عزيزا من تاريخنا المعاصر في قعوده وسلامه‏.‏ فهو جزء من التاريخ المعاصر لنا في سنوات الانكسار والبناء والانتصار فوق الرمال في الصحراء وتحت أشعة الشمس الحارقة‏.‏ وسوف يظل رمزا لوجودنا وجهودنا علي مدي سنوات مضت‏.‏ وجزءا من ضميرنا الوطني في مواجهة الأزمات‏.‏ وراية نهتدي بها في مساعينا وتحقيق أحلامنا بالعبور إلي الأمان والاستقرار لأجيالنا القادمة‏.‏ سيادة الحج كل عام وأنت بخير فمادمت بخير فإن العزبة وشعبها بك ومعك بخير دائما‏.‏

اللى هايضرب هاينضرب

2008-04-03T02:40:00.000-07:00

على الطلاق منها وتبقى التالتة تابته وأروح زى النطع أجيب محلل لوعملتها العيش متوافر متوافر متوافر، آنى كلفت الواد الجعر عليوة ابن ابوك المصيلحى اللى اشترى الطابونة بعد خصخصتها بتوفير العيش للخلق، ومشكل لجنة عزباوية لبحث أسباب ارتفاع أسعار الغموس بتاع البهايم والعلف بتاع اهل العزبة الأبرار، قصدى علف البهايم وغموس أهل العزبة، لخبطوتنى الله يقلب دماغتكم يا بعدا

أنى لسايا نافوخى مش جايب الفولة، هما التلاتين شوال دقيق ما بيكفوش العزبة ليه، الطابونة لساها موجودة، اتخصخصت ماتخصخصتش ده مش مربط الفرس، لساها موجودة، وفضوكو مين صاحبها، وبتخبز عيش، غفير جعر من ولاد المتولمة اللى ابتليت بيهم من ورث الحج قاللى عليوة بيهرب الدقيق وبيحجز العيش اللى بيخبزه من الشوية اللى فاضلين م الاشولة ومابيبعهوش لحد ما ينشف ويبعته ينجرش فى الطاحونة ويعبيه فى الشاولة تانى ويغش بيه العلفة بتاع البهايم، قلتله طب والناس بتاكل إيه، قاللى خلى الطابق مستور يا حج، قلتله طابق إيه ومستور إيه يابن المرة خد هنا تعالى واترزع قول الحال ماشى ازاى، قاللى الغلبان بياكل من تحت رجليه زى الكلاب واللى حالته مستورة بحتة أرض ولا ببهيمة أهو بيعافر وماشى على فيض الكريم، ويعمله مرقة على رجلين فراخ من اللى بيدبحهم سويلم بعد ما حظرنا بيع الطيور ودبحها بسبب الالفونزة، أما الجماعة اللى حوالين جنابك فدول عايشين عيشة الملوك يا جناب الأستاذ، قلتله يعنى إيه ياد يا جعر، قصدك تقول إن البلد جعانه ورجالتى نهبينها، قاللى آديك قلتها بلسانك ياحج وفهمتها لوحدك، رحت راقعة بالعكاز فى ام نافوخه رحت مسيح دمه وندهت حبقه حطه فى الزريبة وقلتله يا حبقة اعملى تحريات عن العيش بيروح فين، رجعلى بعد يومين وقاللى متوافر يا حج متوافر، وجاب فى إيده عليوه المصيلحى وأكدلى إن العيش زى الفل وجاب قفص عليه ألفين عيش مزهزهوملفوف وكبير قد اطياز المصونة

فليه بقى الكدب اللى ماشى فى البلد ده، الناس لا جعانه ولا حاجه هما اللى غاويين طوابير، عارفين بيقفو طوابير بالساعات ليه عشان يرغو يجيبو فى سيرة الأكابر ويحقدو، بلد بنت كلب صابها الحقد وعمى قلوب أهلها، ما الرغيف متوافر والدقيق موجود ولا اتهربش ولا حاجة

ثم إن الأسعار طلعت مازادتش قوى يعنى ولا الناس كلت بعضها ولا حاجة دى موجه عالميه واحنا قلنا هاندخل العولمة وهانبقى من العزب المتقدمة ودى الضريبة تغلى الأسعار شوية بس الخير كتير ومغطى وآنى سايب الدعم ع الرغيف والباقى حرية اقتصادية مش هو ده اللى حلمتم بيه، وبعدين لا استغلال ولا دياولو اللى مش عايز مايشتريش واللى معهوش مايلزموش، العمودية مش مسئولة عن إنها تطعم كل واحد، طب ما تنكنو فى بيوتكم واشتغل انا بدلكم وابطل العمودية يا عرر يا كسالى

واحد هبط عليا فى مغربية غبره زى وشه وقعد يقولى شفافية ومكافحة فساد واجراءات أبصر إيه لمنع مدرك إيه، قلت له فز قوم جاك خابط وفضك من كلام الحقودية ده، شفافية يعنى إيه يعنى اقلعلك لباسى، ماتحترمو نفسكم يا عالم يا اللى مايملاش عينها إلا السباخ، وفساد إيه اللى منتشر ومتفشى، كلهم بيعملو زى ما انى باعمل وماشيين على دربى وربنا عشان كدهه رزقهم من وسع، والغنى مش حرام يعنى، اللى عاوز يتعب ويجتهد، قاللى فيه ممارسات ضد القانون، قانون ايه ده انشالله أنى القانون واللى يبقى ضدى يضيع، مين بقى فى رجالتى ضدى، وكل الخير ماهو برضو موجود فى البلد، يعنى عندك زكريا ولا ابو سرور ولا الحج صفوان ولا الرشيدى ولا غيرهم وغيرهم هات أيتها واحد فيهم هاتلاقيه مشغل خمسين نفس ومأكلهم بعيالهم، طب ده مش سبب ربنا جاعله عشان يرزق دولم، اكفروا بقى بنعمة ربنا، قاللى الناس مش لاقية، قلتله اخرس بقى لاشمطك عشان الكلمة دى بتنرفزنى، انى مليتهلكم خير، وبنية تحتية وفوقية عايزين ايه تانى

قاللى الواقع بيكذب، قلتله بيكذب يابن المنيوكة طب تعالى بقى لما اشمطك، قاللى هانضرب قلتله أحه يا إضراب اللى هايضرب هاينضرب وهاتك يا شلاليت ولكاكيم ورميته لحبقة العوطلى يعرف شغله معاه

عيش وشكلاطه ياعزبة الآلاطه.. طب سبتم ايه للاكسلانصات

2008-01-11T13:30:00.000-08:00

هالبت ماني مستلخبط ونافوخي مقلوب من ساعة المره المتلومه دي اللي اسمها خضرة مراتي ما قعدت تزن وتقوللي ما تجيبلي شاكالاطه ياحج، طب نوروني ياخوانا اني اجيبلها منين شكالاطه ده، والاسعار ف الطالع والدولارات اللي بضارب بيها ف البورصه مسحوبه، نعمل ايه بس ف نسوان اخر زمن، الله يرحمك ياحج ياكبير ويعمر دارك يا مصونه يا كبيره، مره قالتله عاوزه عنب الديب يا حج فراح لهفها قلم علي بوزها بلعها نص صف اسنانها، ومن يومها ما استجرتش تطلب حاجه لحد ما مات المرحوم رضي الله عنه.

صحيح الا بمناسبة الغلا والاسعار والكلام الفاضي اللي ماشي في العزبه ده
الاسعار لا لهلبت ولا حاجه ياعزبة ما يملاش عينها الا زكيبتين سباخ من زريبه يكون ساكنها حمار نتن وجوفه عفش. آني سألت الرشيدي ابن الرشيدي وزير التجاره بتاعي، حلف تلاتاشر الف يمين وستميت طلاق م الخواجايه الشقرا مراته انو طوابير العيش دي ملعوب عامله فينا الاوساخ ولاد ابو اسماعين اللي بيبيعو العيش المدعم علف للطيور، الله طيور، اني بسأله، رد وقاللي ماهي البلد لساها ياحج بتربي طيور، قلتله واني باتنفض مش اني قررت نقفل علي حكاية الطيور دي لما تعدي الانفلوسه
طلع اني البلد لا بتسمع الكلام ولا دياولو ومقضينها وقفه في طابور العيش عند طابونة مرزوق، البلد اللي كانت بتعجن وتخبز من خيرها بقي عندها طابونه وبطلت النسوان اللت والعجن وقاعدين قدام الطابونه، قلتله بيقولو ان الدقيق غلي وان محدش لاقي اللقمه

حلفلي متين يمين ان الملعوب ده من العالم الجعرات اللي كارهين حكمي والدليل ان الطوابير في العيش بس وبقية السلع متوافره ومافيش طابور واحد
رد مرزوق ابو محمد وقاله يارشيدي بيه انت مش فاضيلنا هو حد يا بيه معاه ملين احمر يشتري بيه جنس حاجه ولولا العيال عليا الطلاق ما كان حتي حد جب العيش وكنا عيشنا علي النفس وكلنا ورق الشجر زي بتوع المجاعات، شخطت فيه وقلتله ماتتلم يا مرزوق ده انته لساك لاهف فدان ارض بحاله قاللي ياحج ده صوت الشعب
قلتله احه يا شعب شعب مين يابو شعب اني اللي عملت الطابونه واني اللي هاقفل الطابونه كله يرجع بقي يخزن كيلتين القمح والدره ويطحن ويعجن ويخبز

فكرني الرشيدي ان احنا بعنا طابونة الحج وعملناها بوتيك البسه وسنتيانات قصدي لانيجلي زي ما بترطن المصونه
قلتله طب خلاص شوفلك حل في الطوابير
قاللي مفيش حل غير برفع الدعم وتحرير سعر رغيف العيش
قلتله اني دماغي وجعاني ومابفهمش كلامكم ده
اعملوا اللي تعملوه بقي وماتخوتونيش اني مشغول بشكلاطة المصونه لحسن سايقه التقل عليا ومش عارف اتلم عليها

لا تعذيب ولا دياولو

2007-11-24T11:21:00.000-08:00

بيان هام من الحاج حبقه العوطلي

علي الطلاق ماني فاهم حاجه م اللي بيقولوه العالم النتنه ولاد الصرمه دولم اللي سارحين ف كل مطرح يلسنو عليا وعلي فخامة الباشا الحاج

آني مش عايز اقل أدبي وادحدر لمستواهم دولم عناصر فاقده الوطنيه والمروه وبيقودوا حمله مشبوهه ومتموله من ولاد ابو سماعين اللي طردناهم السنه اللي عدت م العزبه بعد ما كلو الطريحه اللي هي
منضميلهم الواد الجعر ابن ابو عيسي وعندي التسجيلات ماني مراقب كل همسه ولمسه فيكي يا بلد ولا ابقي خرنج ونايم ف الطاطوره ام مهلبيه
اني علي الطلاق ما عذبت حد
ولا رجالتي يعرفو حتي ينتفوا ريش فرخه
احنا ناس مسالمين
مهمتنا حماية العزبه ومستقبلها م الغشوميين اللي بيستهدفو استقرلنه وتقضومنه
ومن ناحية الجدع اللي سلم السر الالهي واحنا بنحقق معاه فده مش دليل يعني علي اننا بنعامل شعب العزبه معامله مش ولابد زي ما بيقولو المداعيق ولاد الجزمه دولم
طب وراس الحاج ولا ليكم عليا يمين الوله مات من انفلوزا الطيور
ايوه هي انفلوزا الفراخ دي اللي ودرته
الوله سريح بيبيع فراخ وبيعاشر الفراخ وبينام معاهم ف مطرح واحد ولما عكمناه الاسبوع اللي فات بتهمة البيع بازيد م التسعيره كان سخن ويخطرف ولسن وخبط ف الحاج والمصونه وقال كلام مش ممكن ينقال يعني
فاني اوامري لرجالتي واضحه اللي يمس العمده يبقي ملهشي ديه والعيال يعني كانوا حنينيين معاه رقعوله صداغه وزقلوه ف الترعه
بس ربكم الحق رجع علي رجله لبيته
وهي يومين واعراض انفلوزا الطيور بانت عليه
اشي كحه واشي عطسه واشي نفسي هفاني علي سريس وحب قمح ومسقة ميه
لقوه بعد اسبوع ف عشة الفراخ خلصان ومسلم الروح للي باريها
طب ليا اني دخل ف الاعمار
نكفر بقي ونقول كلام فاضي من ده ولا نسلم بالقضا ونقول ونعم بالله

كلام نهائي يا عزبه
اني باراقب الكل وماحدش يقدر يضحك علي يعني الظابط ولا العسكري ولا المخبر ولاا الغفير النظامي ابو حديده ده ميجرؤش مخلوقن خلق فيهم يجي كده ولا يعمل كده من غير ما اشوفه
واني ما اكدبش ولو السيف علي رقبتي
علي الطلاق مره عاشره ما حد انعذب ولا بهدلنا كرامته
كلها حالات فرديه
وميه من عشر تلاف ف العزبه مش رقم يعني
واللي ماتو م الكوريره السنه الي فاتت اكتر م اللي فطسو ف ايدينا
طب تسيبو الكوريره وتمسكوا فينا
طب يرضي مين ده يا عالم
حسبي الله ونعم الوكيل

جمال بيه يحذر ... أنا النوواواووووووووووى

2007-11-22T06:55:00.000-08:00

إلى كل شعوب العزب الاحرار

خلاص يا عزب الهم الغلبانه هاتتنطأووتخشوا الألفيه من أوسع وأجدع أبوابها

خلاص يا عزبة الحاج الكبير اللى مات وفى قلبه كل الامنيات الحلوة لهذه العزبة الطاهرة

خلاص بعد ما استخرت ربى

وشاورتهم فى الأمر

المصونه كبيرة وصغيره وحبقه والشتمونى والندل نازمى ومجلس الركش

وقعدة السياسيات بتاعتى الله يقطع عنهم النور قادر يا كريم والنيوز برودقسط كونسيلور بتاعى

وكل كليله فى العزبه

اتكلت على الله

احم احم

....

قرار من عمدة العزبه

بتأمين النووى بتاع العزبه

واستيراد مفاعل تقفيل مفتاح بقوة تلمتاشر ريخطر أمبير من أبو ميه خفيفه

ودخول العزبة فى مصايف العزب المتقدمة من اللى عندهم عتبه نوويه

لتحيا العزبة وليحيا شعبها ابن الحلال

العزبة تمضى فى طريقها نحوحاضر رائع و مستقبل أفضل

2007-11-07T12:47:00.000-08:00

الحاج جمال بيه فى ختام مؤتمر قعدة السياسات وحزب الهلاهؤة الوطنى العزباوى

العيش والبتاو أساس العدل الاجتماعى وتوفيرهم للمواطن محدود الدخل هو أساس سياسة الحاج

الحاج يقولها دون وجل:

أطالب الحزب والحكومة باتخاذ خطوات جادة لجذب الاستثمارات للعزبة والاسراع فى بيع أراضى عواد

تدعيم قطاع الزراعة بتوفير قروض جديدة للفلاحين ومضاعفة الفوايد ع المتأخرين وحبس المستهبلين والسايقين اللبط

الحاج يطالب بسرعة الاسراع فى تسريع المخاطيط الاستراتجية لتوسيع كردون المبانى فى الارض التى يملكها سيادته وقفل الاحوزه فى المناطق الخاصة بعيلة ابوسماعين

واستكمالا للمسيرة

جمال بيه عمدتنا يعد بالنظر فى موضوع توفير الصرف الصحى الحقيقى بدلا من الطرنشات

الحاج يدعو لاعادة النظر فى سياسات تسعير الكبد والكلاوى اللى بيتبرع بيها ابناء القرية ويعد بالنظر فى تعديل مرات الحد الاقصى للتبرع بالدم مقابل فلوس التى تدر دخلا جيدا على فقراء القرية

الحاج يعلن انه لا عودة عن دعم قطاع تسفير ابناء العزبة رغم منع الهجرة غير الشرعية ويعد باعادة النظر فى سعر الفيز المضروبة وسيضرب بمرزبة من حديد على يد من يخالفون هذه التسعيرة

ويعد

عوائد خصخصة الوحدة الصحية ووابور الطحين والمعدية والفرن الآلى وسنترال العزبة سنستخدمها فى تمويل عملية دهان الدوار وشراء وحدات اضاءة جديدة للشارع اللى فيه الدوار ونقوط سبوع ولى العهد المنتظر باعتبارها مشروعات قومية ذات أولوية بحسب توجيهات الحاج

الحاج فى ثوب الوا ثقين

سنواصل اشراك القواعد العريضة فى الانتفاع بمنافع الاستنفاع الخصخصى

تساؤلات للمستقبل

طرحنا رؤية لمستقبل العزبة فهل هناك سبيل لتحقيقها رغم التحديات

نجتاز مرحلة استتقالية من خلال الاصلاح فكيف نتغلب على تحدياتها

اقتصاد العزبة تجاوز مرحلة الركود فأين نحن مما كان ايام الحاج الكبير

قطعنا شوطا كبيرا وبخطى واثقة فما هى خطواتنا المقبلة كى نتقدم نحو المستقبل

سنوزع ثمار التنمية بالعدل على كل المواطنين بعد ان يحظى احباء الحج بما يستحقون

سنرتقى بالخدمات المقدمة للمواطنين وسنطور الكتاب وسندعم الصيدلية بادوية الضغط والسكر باسعار مقبولة للجميع

الحاج للمغرضين

نرفض اى تدخل فى شئون العزبة

عبرنا معا المنعطف التاريخى الذى تمر به منطقتنا دون ان تصيبنا العاصير ولم نقبل بضغط ولا دياولو

حفظنا استقرار العزبة وامنها وضربنا بيد من حديد على الخاسئين وشمطنا المتمردين

سنقيم محطة نواتية لتوليد الطاقة فى العزبة باذن الله عما قريب

الحاج يزور آلمانيا والولايات المتحده اللي هي امريكه وكندا

2007-10-17T09:51:00.000-07:00

بون برلين فرانكفورطر
وكالات النباء
كتب حمدان ابو طاقيه

يتوجه فخامة الحاج مساء اليوم لآلمانيا التي يدشن بها زيارته التاريخيه لعدد من الدول الغربيه وقد صرح الحاج انه سيتوجه لهذه الرحله في الخارج من اجل دعم القضايا العزباويه ذات الاتجاه المشترك مع المانيه وامريكه وهايمر علي كندا لتفرقد احوال ابناء العزبه ف الخارج ولجمع بعض الموالد اللازمه لبناء البنيه التحتانيه ف العزبه التي ستسهم في دفع العزبه جوه الألفيه ودعم تقدمها المضمون باذن الله
ونحن ندعو للحاج ان يمتعه الله بكل الصحه والعافيه وهو بصحه جيده وكويس وليس هناك اي داعي لتكرار الشائعه المغرده اللي اطلقها المدعوق ابن ابو عيسي واللي من عينته الزياره تفرقديه ولعم المشتركات ف العلاقات البنات العزب الكبيره
الحاج سيزور تجمعات اهل العزبه ف الخارج لربط اواصل الصله مع ابناؤنا ف الخارج وتشجيعهم وتعريف العزب الاخري ان عيالنا لهم هر ودهر جامد يا وشوش كالحه
عاش الحاج ودعواتنا ان يكلل الله رحلته التفرقديه بكل الخير والسلامه
آه الحاج يصطحب معه وفد فظيع المستوي من كبارات العزبه وسيكون ف استقبال جلالته ممثلين رفيعين المستوي وسيسبق رؤساء تحرير ورؤساء محطات التلفزيون والاذاعه جلالته للمهيد لوصوله بالطبل والزمر والذي منهه

مسيرة التقدم مستمره في ظل قيادة جمال بيه

2007-10-13T23:07:00.000-07:00

من خطاب سيادته المطول أمام مجلسي الركش والأندال
ف افتتاح الدوره الرمضانيه البلرمانيه الثالثه

يا شعب العزبه الحبيب
سلام الله عليكم جميعا كبيرون وصغنن
مرت الشهور ولازالت الرائحه العطره لانفاس الحج تغشي القلوب وتعطر المندرات والقاعات ... لازال طيف الحج عابق في كل مكان كأنه بيننا
عليا اليمين الحج بيجيني ف المنام كل يوم لابس ابيض ف ابيض وراكب كارته دهب ف دهب وليها حصانين مش حصان واحد لونهم ابيض وعليه سرج م الديباج والحج ماسك اللجام وعمال يقول شي يا بهيم منك له سيروا ف جنة الله الواسعه
ألف سلامه ونور ياحج ورضوان الله عليك وحواليك يا غالي

(بكاء جماعي انتاب جميع اعضاء المجلسين)

آما بعد
من هنا ومن فوق هذه الدكه أريد أن أقولها عالية مدويه لكل من تسولن له نفسيته الجبانه العبث واللعب في حالة الاستقلار إلا أمن العزبه وشرف وكرامة استقرارها الذي رعاه وحافض عليه الحاج الف رحمه ونور عليه وآني مش أقل م الحج ف المسأله دلهين

يا خير عزبه بين العزب يا شعب مفيش احلي منه آني عمري حشت عن أيتها حد ايتها حاجه
اني علي الطلاق م المصونه نمبر تو ما حايش لنفسي حاجه هاخرج منها بهدمتي دي ومش سايب مرايا ملين احمر كله باصرفه علي امن واستقلار العزبه عدو كدهه كام نفس بتحرس الدوار الاخضر رمز عزتكم وكام مخبر سهرانين علي امنكم وراحتكم مش ناس دولم بياكلم ويشربم ولها مصاريف
طب اجيب منين
العيال المخابيل اللي عمالين يلسنوا عليا وعلي ماليتي وصحتي مش فاهمين الفوله وبيبصوا بس تحت رجليهم
اني اصدرت اوامري بتشديد الحراسه علي المنشآت العامه وهانعين ناس كتير في وظايف الغفر يعني باوجد فرص عامل للعطلانين
(تصفيق حاد)

موضوع الميه ده مش من اختراعي
العزبه ماشاء الله ف الزياده والنسوان ما بتبطلش خلفه والعيال نازله عمايل علي روحها وهاتي ميه شطفي العيل واملي من حنفيه الناحيه واغسلي هدوم العيل ورشي شويه ميه ماطرح العيل ما عملها كل دي يا مؤمنين ميه بتستهلك ومع الزياده السكانيه الرهيبه الحنفيه اللي ف الناحيه القبليه مبقتشي تكفي والطرمبه اللي دقينها ناحية الترب طلعت ميه صرف لان ارض البلد مع الازديان السكاني طبلت م المياه الجوفيه وصرف البني ادمين و الطرنشات
اني طلبت م الحكومه تمد خطين ميه جداد واحد للناحيه البحريه يعملوا بيه حنفيه عموميه والتاني لزريبه البهايم بتاعتي ماهو لكم في كل ذات كبد رطبه اجر مش كده
أومال نبقي كفره ونسيب البهايم تنعذب م العطش
يبقي البلغه ابن البلغه اللي كاتب علي الحيطان انتظر يا جمال بيه ثورة العطش ده اعمل فيه ايه
حبقه عارفه وهايجيبه وهاشمطه ومش هارحمه
(تصفيق حاد)

اما بالنوسبه للحاله الصحيه
فانا بااااأكد وبااااكرر
مفيش ايتها امراض ولا مبيدات متسرطنه واللي بيتكلمو عليه ومسمينه تفشي الامراض المستعصيه من كبد لكلي لمرض بطال ده محط افترا
عليا الطلاق افترا واني مكدبش ولو السيف علي رقبتي
اني هاغشكم يا بلد
التحاليل اثبتت ان الوجع اللي جه لناس كتير فر الجهة بتاع الساقيه القديمه ده بسبب انهم كلم جعضيض
ايوه هو الجعضيض
مبقاش ذي زمان بقي بيشيل سمية الارض والناس لساها علي قديمها بتحب الجعضيض طب اعمل ايه
امرت بتقليع الجعضيض م الارض
بس الجعضيض بينبت شيطاني ومنعرفش اماكن وجوده بالتحديد
نعمل ايه
توعيه ووعينا
حديت ومهاتيه مبطلناش
شعب ابن لبوه اعمل فيه ايه يعني
(تصفيق حاد)

وبرضك قلبي الحنين استمع لنداء المصونه بعمل برنامج للكشف المبكر عن الاورام
طب اللي ثبت انهم مرضانين اعمل ايه
اني بانشئ بالتعاون مع هيئة المعاونة العزباويه وحده صحيه جمب الورش بتاعتي اللي في غيط شرق
معلشس عيا بعيده عن البلد حبتين بس العيان محتاج
والمحتاجه ايه يابلد
ايوه غناجه
(تصفيق حاد)

وهانطور نظام التأمين
ايوه التأمين الصحي
كفايانا بقي ضوحك علي روحنا
ابو بلاش مبقاش
خلاص بح ولا فيش علاج لناس تتاجر فيه
مخائيل بتاع الصيدليه قالي ربكم الحق يا عمده البلد دي ما وسخهاش الا قلة الضمير
الجدع من دول يروح يستعبط ع الدكتور ويقله اني جنبي هايموتني يا دكتور
يقوم صارفله البراشيم والحقن
يجيني جري ويقوللي الروشته اهي تاخدها وبدل م تديني اللي فيها تديني كام
امد ايدي واديله اللي فيه النصيب واصرف تمنها اني من التأمين من غير ما ينصرف علاج ولا يحزنون
خبطت كفوفي وقلت يا بلد ملهاش غير الهم
بتتاجرو ف العلاج المجاني
ورحت راقع يمين اللي يتعالج يبقي يتعالج علي طربوش ابوه وابو بلاش مبقاش
وهايبقي فيه نظام تأمين صحي جديد فعال ومحكوم ومفهوش سبهلله
الحبايب المحترمين هافضل اصرفلهم العلاج اللي علي حساب العزبه
وهانراعي الشفافيه
(تصفيق حاد)

أما بالنوسبه لحكايه الغلا والكوا ف الاسعار فاحنا ملناش دعوه بيها
ده عرض وطلب يا بلد
اه كلو اللحمه بقي الشئ الفلاني بس تتدردع لحمه ليه وتتسمم كرشه ليه
امال الفول اللي انا شاريه ده يروح فين
وياسيدي ياللي نفسك هفاك ع اللحمه ابقي ادفع من جيبك
السعر ده سعر عامي مش من عندياتي واني بابيع البهيمه للدبح بسعرها العالمي وعلي الطلاق ساعات ف المواسم بانزل م السعر
مانتم شعبي برضك ولا تهونوش عليا
وبعدين اني امرت ينفتح محل لبيع اللحوم المجمده ومنتجاتها ودي لحمه عال والله وتمنها علي قد الفقير
ايشي كبده علي وراك رومي علي جوانح علي سقط كرشه وكله حلو
تاكل وتتهني وتدفع علي قد فلوسك
(تصفيق حاد)

بطاقات التموين هالغيها واديكو بدل الدعم نقديه مش احسن بدال ما عوضين الماحي بقال التومين يضحك عليكم ويغشكم وابقوا اشتروا ماطرح ماتحبوا
اني باكره صراحتن حكاية الدعم دي
بتعود الناس ع البطر
نفسي تتعلموا من رجاله الاعمال المكافحين اللي ف البلد من شطارتهم بنوا علوا وركبوا العربيات لو كانو نامو للدعم ماكانوش كبرم وبطرخم وبانت عليهم النعمه
اني باديهم سابورت في اسعار المازوت والجاز عشان المكن يشتغل وتشجيعا للتصدير يعني مكافأه مش دعم وعشان العجله تشتغل والفقير يلقي شغل ولقمه شريفه
(تصفيق حاد)

البطاله سببها العيال العفشه اللي المدارس والجامعات بوظت فكرهم (تصفيق حاد)
ماله يعني لما تبقي متعلم وتيجي تشتغل نفر عندع ف ايتها ورشه
الباشمهندس نجيب ابن سعدالله الغفير قاللي يا عمده محتاجين انفار بتفهم يشتغلم ع المكن الجديد قلتله طب ماتشغل فوج القهرانين المرشقين علي القهوة دولم قاللي ماينفعش لازمن حد بيستقرا
قلتله ماهو فيهم اللي بيستقرا
قاللي اللي معاه دبلون ولا بكابراويس
ده واللي مادري اسمه ايه ما بيرضاش يقدم علي شغل قال ايه مايناسبش مؤهلاته
مؤهلات مين يابو مؤهلات مانت مرزي قاعد مستني المراكب ع القهوة ومش عارف تدفع اللي عليك لسمندلي القهوجي والشكك مابتبطلهوش
ايه ميه وتلاتين جنيه ف الشهر وحشين
طب قول انهم وحشين
بس ابدأ وشوف لما تنعدل وتبقي اسطي كويس هاعمل معاك ايه
اني مشهور بين التجار اني ايدي فرطه وسايبه
علي اليمين الحاج نادي المنهراوي قالي ذات يوم يا جيمي العموديه افسدت فكر البيزنس بتاعك وبقيت بتراعي البوعد الاجتماعي وده مش كويس
شفتم بقي بقيت صورتي وحشه ازاي
كل ده ليه
عشانكم طبعا
(تصفيق حاد)

انا اقبل ينقال علي فكري انه بايظ ولا اشوفش شاب عطلان وبيشكك
(مقاطعه من القاعه متقولش علي نفسك كده يا حج ماعاش ولا كان اللي يقول كده) مانتم شعبي هو انا لقيت احسن منكم وماحكمتهوش (هتاف عاش الحج .. بنحبك ياحج ... حج يا ملك يابو قرار زمبلك) ... انتم قدري وانا انكتبت عليكم عشان كده لزمن نرضي ببعض وبلاش نتمرع علي بعض ونشيل بعض آني اعلي وانتم تعلو معايا ونباهي العزب بتقدمنا

(تصفيق حاد)

بقيت كلمه عن التعليم
العلم نورون والعلم سيد الاخلاق كما كان الحج بيقول
كان نبراص العلم ف البلد وبيحترم اهل العلم واسألو الفسايوني ملا الحج اداله عشره جنيه حته واحده لما خد اجازة الدعوه م المعهد الديني ايام العشره جنيه ماكات تشتري نص فدان
كان راعي العلم والعلما
الف رحمه ونور تتنزل عليك يا حاج يا عالم يا متنور
المدرسه القبليه شققت وهاتتدردك علي روس العيال
اني قررت وقف الدراسه لحد ما تترمم وهانبني جواها مبني جديد يساع الزياه المطربه ف اعداد التلاميذ بسبب الكسافه السوكانيه وهاناخد منها الملاعب نعملها مشاريع للشباب ،هانبنيها
الي بيتكلموا عن الالعاب هاتتلعب فين اني مش فاهمهم ناس فقيره ومش لاقيه اللضا عيالها تلعب ليه هاتبوظو فكر العيل بدال ما يطلع عفي وناشف وبتاع شغل يطلع لعبي وبتاع قعدة قهاوي
الجرن موجود للي عايز يتنطط شويه والعيال مابطلتش ممارسه هوايه السابحه ف الترعه فلزمته ايه ابور فدانين ف المدرسه قال ايه عشان اللعب
ياخي بطلوا بقي افترا
(تصفيق حاد)

الكتب المتأخره الحج نايل ناظر المدرسه اكدلي انها ف المطبعه وهاتتورد ف غضوم شهرين قبل امتحانات نص السنه فمتقلقوش

(تصفيق حاد)

وأخيرا كل عامون وانتم بكل خير
وعاوز المجلسين يتعاونوا ومحتاجين قوانين فعاله مصداقا لاهداف الدخول ف الالفيه وترسيخ قواعد الجموسراتيه وعزبة القانون والمؤسسات

وفقكم الله وسدد علي طريق النصر خطانا اجميعين
وعاشت العزبه وشعبها المن المطمئن

وقل اعملوا فسيري الله عملكم ورسوله والمؤمنون
صدق الله العظيم

(تصفيق حاد)(تصفيق حاد)(تصفيق حاد)(تصفيق حاد)(تصفيق حاد)(تصفيق حاد)(تصفيق حاد)

مبادرة لحل أزمة الحكومه مع الصحافه

2007-10-11T00:25:00.000-07:00

حد من لقابة الصوحافيين جه اشتسارني وقاللي يا جلالة جناب حضرة العمدة ايه العمل في ازمة الصوحف اللي مبطلتش تلسين علي كبارات العزبه الكرام الافاضل
اني زي مانتو عارفين مبقراش الكلام الهايف ده وحتي لما باحب اعرف الاخبار مابانبسطشي الا من تقارير الهمام الشديد حبقه العوطلي ولما باحب اعرف اكتر بابعت سعديه الدايه مرات الجعر الاهيف الله يكحمه نازمي
مره ودانها ولا ردار من بتوع الحرب
يعني المختصر آني مبقراش الصحف بس في الفتره الاخيره جاني من مصادري
ماني ليا مصادر برضك قالولي يا جناب العمده الوله ابراهيم ابن ابو عيسي قال ايه فاتح جرنان وغيره شلة مقاطيع قفف من عينة حموده علي لبراشي وشويه م العيال اللي ملهمش كبير وقال ايه بيقولو حرية تعبير
طب يا عالم اني منعت حد يبعبر عن حالته
اللي زعلان بيشتكي لغفير يقوم الغفير يقوللي اقوم اقول الغفير الرد
اني فيه حد اشتكي لغفير وسكت علي قحقه ابدا والله يا بلد
صراحه كدهه زعلت وشلت جوايا انهم يالسنوا عليا وعلي ماليتي اللي جامعها من عرق ولاد البلد الطيبين اللي بيدعموا اهداف الالفيه الجديجده وعاوزينها تبقي خضرا
نرجع مرجوعنا
اللي سألني قلتله طب فين شله العس المقاطيع اللي فتحتلهم جرايد تسد عين الشمس
عملوا ايه
سكت وخرس ذي ما يكون نزل عليه سهم الله
قلته والمركز والحكمدار والنيابه
قاللي ما حضرتك عارف منقدرش يعني نزود العيار عن طريق دول فلابد يعني منعرضش نفسيتنا لملامة العزب العظمي وانت جنابك اللي اشرت بكده ولا نرجع لعهد الشمط ده والله محبب علي قلوبنا
قلتله بس العيال دولم نسيم نفسهم عاوز شمط بالمحسوس كده من غير زرايب واللي يعصلج فابو محسوس نشده ع الزريبه طوالي
وابعت دكرين بط للحكمدار وسعات وكيل النيابه وقلهم العمده مش مبسوط وان ما عملوش اللازم قل لحبقه العوطلي العمده لغي اوامره القديمه والعيال الصوحافيين دولم بقم شغلتك
قاللي ما ناخد واحد ولا اتنين ف صفنا والباقي الاوساخ يعني نرقعلهم سداغهم وبعد كده ان ما انعدلوش نيجبلهم حبقه
ونسمي الكلام ده مبادره من سعاتك للحفاظ علي حرية الرأي والتعبير فر العزبه اللي دخلت الالفيه وانضمت لمصايف العزب الديمقراطيه
واللي يخبط يتلعبط بقي يا جناب العمده

اني عجبني الكلام
علي فكره اللي كان بيتكلم معايا هو المستر جوبلز مستشاري الاعلالي اللي مسكته ايزبا انطرلاشونال

التهنئة بمناسبة العيد الصغنن

2007-10-10T12:52:00.000-07:00

يا شعب العزبة الكرام
كل عامون وانتم بخير
بمناسبة العيد الصغنن اعاده الله عليكم باليومن والبركات
الكحك يا بلد
ماتنسوناش ف الكحك
اللي ما فتتش كحك تبعت سمنته ودقيقه ع الدوار الاخضر طوالي واللي فتت تبعت سبت محمل من خيرات الله
المخبرين واقفين بيعدوا الصاجات المعديه ف حواري البلد واللي هايستهبل ولا هايحمرأ ملهوش عندي غير الشمط

وعيد مقندل علي روسكم باذن الله

الله ... العزبة ... جمال بيه

2007-10-09T00:27:00.000-07:00

بعد مداولة مطوله مع عبشكور مشتسارى الإعلالى ورئيس تحرير العزبه انطرناشولان اللى عملها بفلوسى عشان غجر العزبة يخشوا العالميه من وسع قررت اعتماد الشعار الجديد اللى هو الله.. العزبة... جمال بيه، و اللى لزمن من هنا وجاى يتقال بكل المحبه والصدق والإيمان والعزيقه قدام العلم بتاع العزبه، العلم فاكرينه، راجعم البوسطاط القديمة، كنا اتكلمنا أيام المرحوم الحاج رضوان الله عليه عن نشيد قومى وعلم، آيوه العلم اللى أنا اقترحته على المرحوم رضوان الله عليه

وبهذا وذاكا وتلكم وتلك يكون كل متطلبات إدخال العزبه لمصايف الدول المتقدمة قد اكتملت ومبقاش فاضل غير عمله جديده وبورصه نضارب فيها ويبقى يا عزبة الهم وعدى الرئاسى اكتمل ومحدش له عندى وعود يطالب بيها

أما من ناحية اضرابات العمال، عمال ايه واضرابات ايه آنى مش فاهم الخلق دى، دولم حبة مقاطيع لمتهم من ع الرشاح وعملتهم مصنع طوب ومفرزة خضار وفاكهة وورشتين تقطيع خردة يقومو يفتكرو نفسهم انفار على آنى، طب يا عزبة متعرفش الوفا
على اليمين م المصونه نمبر تو لاخليكم تستنو الجنيه م العيد للعيد ولما تشفوه تغنوله باحلم بيك

العامل أجرى، ياخد اجرته وينسك على قفاه، أومال، احنا نشأنا على كده من زمن، ولا عمرى سمعت ولا شفت نفر بيقول كلمة حقوق دى والحاج رضوان الله عليه لو كان بينا كان شمط العمال دى ف الزريبه بس آنى قلبى ابيض صرفتلهم من فلوس الزكاة خمشتاشر جنيه للنفر رحمه ونور وغير كده اللى هايقول تانى على الطلاق مره تانيه م المصونه نمبر تو أكون شرمه مش شمطه بس

المندسين بقى والقله الحاقده وولاد ابوسماعين وشويه العيال العفشه اللى مسمينلى نفسهم العزباويه الاحرار ملهمش عندى غير انى اسيب عليهم حبقه العوطلى، وايده طارشه كلهم عارفينها، وانا قثتى فى كفاءته ملهاش حدود، والنقطه البحريه ياما ضاع ت فيها رجولة رجاله بشنبات ومش هازيد عن كده

نرجع مرجوعنا
مبروك ع العزبه وأهلها التي فى الجديد والجرايد العالمية متصله بيا عايزه منى لقاءات وانا باتشملل وعامل فيها مشغول وبادى مواعيد بعد تمن تشهر

شفتم بقى يا عزبة الهم
كل عامون وانتم بخير .

Ezzba International العزبة تطرق أبواب العالمية

2007-10-08T19:19:00.000-07:00

Faced with a vicious onslaught on the Ezzba's honor, conducted by ungrateful journalists and evil bloggers, who think of nothing but defaming the Ezzba's achievements under the leadership of Gamal Beih... The EBC (Ezzba's Bullshit Council) has decreed the following:
1-Launching an English Satellite Channel, with the aim of highlighting the miracles achieved under the reign of the previous Hagg (allah yer7amo and yebashbesh el-rock that is beneath his head), and the current Beih
2-The immediate appointment of Abdel Shakour Gobles, the winner of the International Bullshitting Award in 1934, given only to young gifted journalists who show promising signs of a career full of hallucinations

Abdel Shakour trained generation after generation of Egyptian journalists, who went on to assume the highest positions in Maspero, Farafero and el-3asafra.. Some of his most faithful disciples run prestigious international networks like Fox News and CNN.

It's time for the Ezzba to assume its position among the other glorious nations under the sun (or the moon for that regards, since the difference is hardly noticed by the Ezzba's loyal citizens)... And as all civilized nations, we will speak nothing but English, have croissants and cappuccino in the morning, followed by a sip from flatfoot juice...

God... Country... Gamal Beih...

مبروك عودة الكهربا

2007-10-07T14:50:00.000-07:00

الكهربا رجعت بس النور لسه ما جاش
قولو يا مسهل
سألني أحدهم هو العمده كان اعتزل وخلع م العزبة
شخطت فيه طوالي وقلتله يا جعر يا بهيم هو فيه عمده بيعتزل
انت ايه
فاكره احمد حسام حسن بتاع المخروبه الكوره
دي العموديه يا ولا
اللي بتنورث آبا عن جد
تنساب كدهه بالساهل
لا ممكن طبعا
ولا ف الاحلام يا خلق
العمده كان ف فتره نقاهه وعاد بعد مصابه الاليم ف وفاة المغفور له خالد الذكر طيب الريحه ابو جمال الكبير رضوان الله عليه
عاد بكامل قواه المدنيه مصمم علي دخول الالفيه والانتقال بالشعب لبلوغ سن الديمراطيه زي كلات العزب المتقدمة
وهايمشي علي توجيهات ونهج الحج وصحبته الكرام عشان تستمر مسيرة العطاء
وذي ما قال ربك الكريم
ذريه بعضها من بعض
صدق الله العظيم

عفوا ... النور قاطع في العزبة النهاردة

2007-10-06T22:45:00.001-07:00

لا مؤاخذه يا اخوانا
النور قاطع ف كافة آرجاء العزبه النهارده
وقانا الله والكل كليله شر المستخبي وضلمة العقل
وبالمناسبة العتمة دي
قرر فخامة العمده المبجل جمال بيه اعتبار اليوم كأن لم يكن
آي ورحمة ستي سريه الله يبشبش الدبشه اللي جوه راسها كأن لم يكن
هو جاللي أقول كدة وكلام العمد لا يرد
وهاتتعوض بإذنك انت بس يا رب

ملحوظه حطوها حلقه في وداناتكم
انقطاعة النور عن العزبه ملهش أي علاقة باحتجاب الصحف عن الصدور في العزبه المجاوره
احنا أساسا يا عالم مابنقراش
وبطلوا تشنيع واشاعات بقي
مش كفايه انكم هولتم من موضوع وعكة البيه العمده
وقلاو ياللي تنخرس لسانتكم النجسه دي فين العمدة بيناته مات وشويه تعب وكانت الحكايه كلتها كلام ابن عم حديت لا يودي ولا يجيب واهو العمدة ظهر بكامل لياقته المدنيه ف دورة آبو جالوص الرمضانيه
النور جاي متقلقوش
ه هاتققولو طب ولزمته ايه بقي البوسط الخره ده طالما النور قاطع
هارد بالصمت الجميل وهاسيبكم تهرو كده يا عزبه فقر

فتوي اخراج الزكاه للصالح العام

2007-10-05T07:32:00.000-07:00

الشيخ عثمان الفاسايوني من أهل الطريق وراجل بركه شاف للعمدة منامات ياما وكلها والله خير ف خير ، جناب العمده استدعاه علي عجل عشان يفتيه في مسأله مهمه والعمده ما يخالفش شرع ربنا ف البلد، احنا بلد ملتزم ونخاف الله، المهم الشيخ عثمان حضر بالعجل وقعد تحت رجل العمده وقاله اسأل تجاب ياسعت البيه، العمده فرك دقنه وقاله هو احنا ف شهر ايه يا فاسايوني، قاله وهو مبتسم رمضان يا كبير العزبه كل عام وانت بخير والعيد خلاص اهو قرب يهل، العمده قاله طب يا فسايوني ايه فروض ربنا اللي ف الشهر الفضيل ده، قاله الصوم وقراية القرآن والصلاه، وايه كمان يا فسايوني رد والزكاه يا عمده
نورون علي عمتك الفخيمة يا فسايوني يعني لازمن كل مسلم يدفع من ماله لاعمال الخير
ايوه يا كبير العزبه يا مؤمن كل واحد يدفع خمسه وعشرين ف الألف
طب هو آني يا فسايوني لزمن برضك ادفع زيي زي غيري
الفسايوني قطع نفس ومفهمش العمده عاوز ايه قعد يتهته ويعيد كلامه الاولاني
العمده شخط فيه ونغزه ف جنبه ببوز البلغه وقاله مترد ياشيخ الغفله انا زيي زي غيري
اتنفض عثمان وقاله ماعاش ولا كان الل اللي ينطق جنس كلمه بالمعني دهون انت كبير ولوحدك مين يقدر يوصلك
انت هنا ولي الأمر ليك الطاعه واجبه
طب يا فسايوني انا محتار لو علي زكاه ادفعها لمين ماانا مكفي البلد ومش عايز خيري يطلع لبره
يبقي تحط حضرتك زكاتك كلها ف مشروع كبير للبلد ومتوجهاش لحد بعينه
فرك العمده دقنه وقاله كلامك عال
انا هاعيد بنا الزرايب بتاعتي
الفسايوني قاله يامولانا البيه اني قصدي تبقي الزكاه للبلد مش لشخصك
اخس عليك راجل ناقص ابن مره لبوه
قوم فذ يا كلب يابن الكلب من قدامي
الفسايوني كان هايشخ علي روحه وقام خد بعضه وزحف جري
العمدة ناداني وقاللي هات لي الجعر ده تاني
شاورت للغفر قامو جبهولي هيله بيله رحت لفعه علي قفاه ومصدره لوش العمده العمده بصلي وهو بيبتسم وقالي عيب كده ياعليش ده راجل بركه
قام موطي وبايس علي بلغة العمده وقاله مقصدتش والله يا كبير العزبة انا قصدت
راح العمده مقاطعه وقايله مفهوم يا عثمان بس انت عارف اني انا العزبه واللي باعمله سوا للدوار ولا للناس كله للعزبه
مفيش فرق بين اللي عندي واللي عند الناس
كلنا ولاد العزبه وخيرنا لبعضنا
انا عايزك تطلع ع المنبر بتاع الجامع بعد آدان الضهر قبل ما تقيمو الصلاه وقول للعزبه انك اقترحت علي ما اخرجش الزكاه وافتفتها علي عيل يتيم هنا ومره غلبانه هنا ولازمن اخصصها لشئ ينصلح بيه حال البلد ويعم خيره ع الكل
الزريبه بينحط فيها بهايم اللي عليه ايجاره واللي مدي،ن يعني زريبتي مرفق عام ويجوز اخراج الزكاه لاصلاح المرافق العامه
هلل عثمان الله واكبر ايه الفقه والفتوح النورانيه اللي حلت علي جنابك دي
دي بركات الشهر الفضيل ونفحاته
وخد بعضه هوا ع الجامع
العمده قالي تصلي الضهر وراه وتجي تقولي قال ايه بالحرف
الادان ادن من هنا ولقيتلك عثمان فط من مكانه وقزح الدرجتين بتوع المنبر وصلي وسلم وبص وهو مبتسم وفرحان وقال
اخراج الزكاه فرض
للفقرا والمساكين والعاملين عليها وبقيت اللسته اللي انتم عارفينها
بس فيه اولويات علمهلنا الدين
العمده شكالي من ان المرافق بتاع البلد حالتها مش ولابد
قلتله يا كبير العزبه انت راجل مؤمن والمؤمن كيس فطن
ليه تبعزق زكاتك علي عيل يتيم ولا مره مش لاقيه اللقمه
حط فلوس الزكاه ف المشروعات القوميه بتاع العزبه ابني الزريبه اللي فيها امانات البلد والدوار لازمه تجديد ده واجهة البلد وجدد وسائل المواصلات بتاع البلد واشترينا توكتوكين الناس يتنقلو بيهم ويدفعو اجرتهم للصالح العام ويخش الايراد لخزينة الدوار
وباناشدكم يا مسلمين متآخروش الزكاه واللي بيحب العمده يروح يسلمله الزكاه بتاعته ف إيده هو أدري واحد البلد محتاجه ايه
آلا هل بلغت اللهم فاشهد وراح باصصلي رحت هززله راسي راح قعد يدعي

اتنين ونص... وتعالى بص

2007-07-10T02:05:00.000-07:00

بعد انتهاء الجزء الأول من حكاية عزبة الحاج أبو جمال وولده

وصدور تدويناته فى كتاب يخرج للنور قريبا من مطابع هونج كونج

ننتقل إلى

عصر التليفزيون الانترنتى الفضائى التدوينى الجامد

تعالى معنا لتشاهد بنفسك

تليفزيون

اتنين ونص

يبدأ البث التجريبى فى أغسطس 2007

قناة إخبارية اجتماعية سياسية نفسية مهلبية

كله عندنا فى اتنين ونص

اتنين ونص

وتعالى بص

مصر الآن: رواية تبحث عن مؤلف

2007-06-15T03:14:00.000-07:00

عزيزى المؤلف المجهول

كلى ثقة فى قدومك يوما لتكتب هذه القصة العبقرية التى تفوق كل واقع وخيال. أسطورة إغريقية فى ثوب عصرى، إنها مصر اليوم، أهديها لك باعتبارها رواية طويلة تبحث عن مؤلف، جاءتك وجذبت غطاء القلم وقالت هيت لك وتمددت على الورق، حرك أصابعك ووجه سن القلم إلى السطور واكتب ماترى، هذا آخر الإبداع الروائى فلا تبحث عن رواية بعدها، لعلك تتفق معى، فلن يمكن لمبدع مهما علا إبداعه أن يبتكر شخصية أفاق فاسد تفوق فى تركيبيتها وغناها وتعدد أبعادها وخصوصية لغتها وتعبيرها ولزماتها شخصية كمال الشاذلى أو قانونى مناور وغويط يكذب كما يتنفس ويغضب وهو لا تفارقه الابتسامه مثل فتحى سرور ولن تجد مداحا وحابك مؤمرات من الطراز الأول أكذب وأشر من صفوت الشريف، وأظن وربما تظن معى أنه لن يجئ مبدع مهما شطح خياله بشخصية فقيه سلطة تفوق فى هزليتها سيد طنططاوى، أو شخصية نساج كلام يدعى أنه مفكر وهو موظف أبدى بائع لضميره وكلمته تفوق فى غناها وحركيتها مصطفى الفقى أو من تراه يرسم ملامح محترف لألعاب السيرك السياسى مثل شخصية على الدين هلال، أو كاتم أسرار وحارس لعش الفساد مثل زكريا عزمى أو ممثلى طبقة منتفعين تبيع كل شئ بما فيها الأوطان تفوق أحمد عز ومنصور والمغربى وحسين سالم، وفوق هذا وذاك لن تجد بالطبع من يستطيع أن يبدع شخصية عسكرى محدود العقل والفكر موضوع دون أن يدرى لماذا فوق منظومة للنهب ويحركونه من بعيد لبعيد مثل مبارك الذى تجاوز فى نهبه وعبادته لنفسه وظرفه وزلات لسانه وارتماءه فى احضان ناهبى البلاد من الخارج والداخل شخصيات من عينة موبوتو والقذافى، ولن أحدثك عن غنى شخصية الزوجة المتسلطة على هذا الطاغية فالسيدة سوزان جعبتها مليئة بالمفارقات والأحداث التى تغنى أى رواية محتملة، ربما تسألنى عن الكومبارس والمجاميع التى لا تخطئ فى حركتها وتقدم مشاهد الزحام والاندفاع والتصارع أين تجدها، صديقى صدقنى لن تجد حشود كومبارس أبرع فى حركتها وعفويتها ودقة آداءها خير من هؤلاء المارين أمامك فى ميدان التحرير المندفعين على سلالم المترو أو المهرولين محاولين القفز فى أتوبيس محشور بغيرهم وهو يهدئ فى الإشارة، شعب مصر سيصنع لك أجمل وأحلى خلفية، ولن تجد حبكه أبرع من أحداث توريث الدولة ومرحلتها الساخنة التى بدأت مع 2004 حتى اليوم، وهل هناك شاب أكره من جمال كى يكون الفالن مركز الرواية وممثل جانب الشر فيها جاهز بوجهه الجامع لملامح العنف الكامن والخبث والاضطراب النفسى وصوته الحاد الذى يعكس عنجهية واندفاع وكلماته التى تؤكد أنه مستعد لبيع كل شئ من أجل الاستمرار، علاوة على نظرات ذاهلة وعينان غير مستقرتان تمنحه بعدا عجائبيا، الرواية مكتملة زمانا ومكانا وأحداثا وشخوص، بقى مؤلف ينتقى من الحوارات والأحداث التى تختصر الرواية وتمنع ملالتها له عين مصور يحرك الكاميرا ببراعة لتنتقى من هذا الجمع الهائل من المناظر وفكر مخرج سينمائى يقود الحركة والفكرة، ماذا تنتظر إذن أيها المؤلف المجهول، أرجوك إظهر قبل أن يختطفها أحد التافهين فيفقدها عبقريتها المعاشة وتفردها الواقعى، إسطورة تدور وقائعها فى الواقع وليس فى السموات أو العوالم الأخرى، أليس هذا ما حلم به أعظم الكتاب عبر التاريخ، طابت لك فاقتطفها.

أما أنا، لقد حاولت أن أكون أنت، أن أكون المؤلف المنتظر، لكننى لم أحسن الصنعة ولا أكن بارعا على نحو يكفى لرصد بارع لاحداث وشخوص الإسطورة، حاولت مداراة الواقع واختصاره فى مساحة صغيرة، نجح الأمر إلا قليلا، لكن أصل الرواية الذى هو مصر وأحداثها كان أبرع وأكثر إبداعا وأغنى أحداثا، عجز خيالى عن مجاراة ما يحدث وتقليده، الآن أشعر بالعجز التام عن الاستمرار، كنت أظن أن الرواية الموازية قد تفعل فعلها وتلم الموضوع، لكن الرواية التى تبحث عن مؤلف كانت أسرع فى تداعى أحداثها وتنامى شخوصها وتعقد حبكتها وتجلى صراعها، وأمام هذا وجدتنى فى لحظة ضيق أستعجل النهاية، فضلت موت البطل واستمرار الوريث القائم بدور الفالن الثانى واختصرت الواقع بصورة فجة. أنا فاشل ولهذا أعلنها أمامك واستعجل قدومك لتنقذ هذه الرواية من الضياع والوقع فى يد كاتب فاشل مثلى، إن لم تجئ – صدقنى - قد يخطفها مخرج هوليودى حقير من محترفى قنص الحكايات العبقرية ليقدمها فيلما يحتل صدارة الشباك، ويحصد المليارات،

أيها المؤلف المنتظر... أرجوك تعالى.

التحولات الكبرى تؤكد الاستمرار على نهج الحج

2007-06-12T02:55:00.000-07:00

قرر الأستاذ جمال بيه أن ينشر الوعى الثقافى بين جموع العزباوية واجتمعت بناء على رغبته لجنة روفيعة المستوى لوضع الخطوط العريضة لهذا البرنامج الثقافى الكبير القائم على النشر، أنظر حوار الحاج رحمه الله السابق حول الثقافة ودورها فى النهوض بالعزبة من كبوتها الراهنة وإدخالها فى عمق الألفية القادمة، وقد رأت اللجنة أن خير ما تستهل به برنامجها الثقافى الهادف للارتقاء بوعى العزباوية شعبا وأمه وتنويرهم بالعلم بعدما دخلت الكهربا وأضاءت البيوت

وكان الرأى أن يصدر كتاب يؤرخ للعزبة ومسيرتها نحو الجاموسراتية ودخول الألفية والدوار الرائد الذى قام به الحاج رحمه الله ووريثه عمدتنا جمال بيه من بعده وكبرات العزبة ممن أفنو أرواحهم وناضلوا وجاهدو بالعرق والدماء والدموع للخروج من عنق الزجاجة وجعل سفينة العزبة تمخر عباب بحر الظلمات الذى تغرق فيه المنطقة بكاملها

وقد أصدر الأستاذ جمال بيه توجيهاته بأن يتوخى القائمون على هذا العمل التأريخى الكبير الدقة والحذر وأن يضعوا الحقائق التى تثبت صدقية الحج وتاريخه ونضاله هو ورفاقه منذ توليه المسئولية وحتى تولى أجيال جديدة ترغب فى العمل والبناء بروح وثابة وأمل فى غد جديد وبفكر يتجاوز كل العوائق والصعوبات، فكر جديد يمنح الشعب أمل كبير فى استمرار مسيرة الحج بذات نهجه القويم

وقد خلصت اللجنة لضرورة تبنى منهج عقلانى رشيد يبعد عن التهويل يتحرى الصدق بناء على أوامر فخامة العمدة، وقدمت اللجنة باكورة إنتاجها كتابا يرصد التطور الديمقراطى الأخير الذى جاء مع قدوم فخامة البيه وريث الحج من الخارج وصعوده لولاية العهد العمدوى وانتقال العمودية له، على أن تتولى لجان أخرى للتأليف رصد المراحل السابقة على ذلك لتصدر الكتب تباعا فى مشروع الخراءة للجميع

التصويرة الرسمية هى الوجه الجميل لفخر العزبة وأشبب شبابها

2007-06-04T03:45:00.000-07:00

قرر البيه جمال وقراره نافد نافد إن كل بيت ودكانه ودوار وأيتها شئ فيه ناس بتقعد إنه يتعلق فيه تصويرة العمدة الرسمية، التصويرة دى هى التصويرة الرسمية ويرجو جناب العمدة تجاهل تصويرة القفا نظرا لأنها قد ثبت يعنى أنها مش ولابد وتم شمط الجدع الخيبان ابو قميص اصفر ده اللى بيدعى انه فنان واقترح على جناب فخامة البيه انه يعمله نيولونك ويصوره لاول مره فى التاريخ من قفاه، وبعد اشتشارة كمال بيه الشتمونى ثبت إن الواد المصوراتى ده دسيسة وجعر وتم القبض عليه وهو بيحاول يهرب وثبت رسمى انه مش ولابد ومخنث وبتاع كلام فارغ وكان هايبوظ أخلاق القرية اللى اتعودنا عليها، وتشير التقارير الأمنية إلى انتماؤه لعيلة أبوسماعين من ناحية الأم وهى عيله واطية ثبت كراهيتها لفخامة العمده محمد حسنى ولولده ووريثه من بعده، وتم إيداع المذكور الزريبة القديمة ليتلقى جزاته من شمط وتأديب، وتم جمع التصاوير اللى بالقفا وصدر قرار بحظر تداول أى نسخ منها وتسليمها فورا لحبقه لعوطلى ليقوم باعدانها بمعرفته

هذا وق التقى فخامة الاستاذ جمال بيه عمدتنا ورافع رايتنا بسفير الدانمارك وزمبابوى لبحث سبل التعاون وتفعيل العلاقات الثنائية بين البلدين كما اعتمد مشروع انشاء مئة كشك على الطريق المتسفلت والتى تقدمت بمقترحات انشائها مبادرة تشغيل العمالة المعطلة وسوف تمنح لشباب القرية باعتبارها قروض ميسره تدفع على عشر سنين بفائدة تكاد لا تذكر ولا تتعدى خمسة عشر فى المية، وتقوم حاليا شركة احمد ابو العز بتنفيذ نموذج الاكشاك وجمع مقدم الحصول على الاكشاك من الشباب الراغبين، كما قام سيادته بتفركد امتحانات الاعدادية واثنى على ناظر مدرسة أم مجاهل المشتركة لتسهيله فهم الاسئلة للتلاميذ وعدم تصعيب الاجراءات وقد وعد الناظر سيادته بأن تحقق المدرسة نسبة نجاح ميه فى الميه على الأقل وجدير بالذكر أن جمال بيه قد حصل على الاعدادية من هذه المدرسة وطلع الاول عليها وشهد له المدرسون والقرناء من التلاميذ بألمعيته ولوذعيته وتفوقه غير المسبوق، وحرصه الشديد على القيم، ومما لا ينسى قيامه بتأديب الطلبه المخالفين بنفسه وهو تلميذ وهو الدور الذى أشاد به ناظر المدرسة باعتباره امتداد لدور والده العمده المسئول عن التربية فى البلد. ومن المتوقع خلال اليومين القادمين أن تشهد العزبة تغييرات مهمة تترافق مع الحركة التصحيحية سوف يتمخض عنها اجتماع هيئة المشتشارين وجماعى السياسيات

إحترم فخامة العمدة التزام وطنى

2007-05-30T05:51:00.000-07:00

لوحيظ فى الفترة الأخيرة أن نبرة النقد والتعالى على شخص جناب فخامة العمدة الأستاذ جمال بيه قد زادت فى الفترة الأخيرة، وقوبلت قراراته الثورية التى تكفل انتقال العزبة بسرعة الصاروخ نحو الألفية بشكل مؤسف من قبل قلة من المارقين على أخلاق العزبة وأعرافها، لهذا وذاكا أخذ فخامة الأستاذ جمال بيه على عاتقه وضع حل عاجل وشامل لهذه القضية التى أرقت شرفاء العزبة، وقرر أن من يزودها ويضبط فى وضع مش اللى هوه سواء قالب بوزه أو بيهلفط بكلام من هذه العينة أن يعتقل ويودع فورا الحجز لحين البت فى أمره من قبل لجنه مشكله خصيصا لحماية القيم، وتتراوح عقوبة هذا الفعل الذى سيتم تجريمه ضمن مواد قانون الارهاب المزمع تحديثها بين الشمط التام والزج فى المعتقل لمدة لا تقل عن سنتين بتهمة إهانة جناب الفخامة، وقد قرر جمال بيه أن يقوم بنفسه باختبار لمدى الاحترام الذى يظهره شعب العزبة له، وتفتك ذهنه المتكد عن فكرة ألمعيه وهى أن يظهر فى الصور بقفاه، ومن لا يحترم قفا العمده قبل وشه يقع تحت طائلة هذا القانون. ولهذا قرر جنابه أن تكون صورته الرسمية التى ستحل محل صورة فخامة المرحوم أبو جمال المعلقة على قارعة البلوج مأخوذه منظر خلفى، ليعلم الجميع كذلك رسالة مفادها أن العمدة يراك حتى ولو أعطى ظهره لك.
هذا وقد أكد المصور المخصوص لجناب العمدة أن الفكرة من منظور فنى عبقرية فعلا إذ يتمتع جناب العمدة برقبة طويلة ممشوقة مع عدم وجود انثناءات أو تجاعيد فى منطقة القفا كما أن الشعر لا ينبت فيه ربانى، كما أن مؤخرة رأسه فيها لون فاتح، أكد البيه أنه ليس ثعلبة بل وحمة، وهو ما يؤكد أن الصور التى التقطت ستحظى بقبول جماهيرى منقطع الفظيع خصوصا وقد أخذت الصورة للبيه وهو ينظر بوجه جاد من المرآه حيث بدا جزء من وجهه فى طرف الصورة فى حين احتل قفاه مجمل المشهد ليؤكد أن احترام العمده هو اتزام وطنى على الكافة الحرص عليه حيث أن فخامته هو رمز العزبة ورجلها الأول.

قرارات هامة يصدرها العمدة الأستاذ جمال بيه

2007-05-25T02:18:00.000-07:00

فى ضربة معلم تدشن لعمودية قوية وجراءة مشهودة، أصدر فخامة العمدة الأستاذ جمال محمد حسنى قرارا عموديا بحل مجلس الركش فوراً وتشكيل لجنة تضم عددا من كبار أبناء العزبة الوطنيين لمراجعة أعمال هذا المجلس منذ إنشاؤه حيث ثبت أنه كان مركزا للفساد والاستبداد وعمل ضد الجاموسراتية التى حاول الحاج رحمتو الله عليه تثبيت اركانها، لكن هذا المجلس باعضائه المخذولين قد خان الامانة وأظلم الدنيا فى عصر الحاج رحمه الله ومارس عدد من اعضائه ممارسات أدت لتعطيل دخول الاعزبة الألفية وضم بين جنباته أشخاص تبرأ العزبة الآمنة والمستقرة من أعمالهم حيث سرقوا البهائم وحرقوا الزروع وروعو الامنين وزجو بالابرياء فى الزريبة الخاصة بالحاج وشمط العديد من شباب القرية غدرا فى حين كانو يطالبون بمزيد من الحريات، وعليه قرر الاستاذ جمال بيه عمدة العزبة وكبيرها القبض على يوسف موافقة وأحسن فتحى أبو شرور والحاج نازمى ومصادرهم أموالهم هم وزويهم حتى الدرجة الراعبة وشمطهم هم واعوانهم شر شمطة، وقرر فى ذات الوقت تعيين كمال الشتمونى مشتشارا للبيه للشئون البرلمانية بعد أن أثبت أنه الاكثر ولاء وانتماء ومحبة للعزبة وكبيرها وقدم معلومات غاية فى الاهمية تسهم فى تقديم طيور الظلام واعمدة الفساد لمحكمة عزباوية قرر البيه ايضا انشاءها لمحاكمتهم لما تسببوا فيه من افساد لحلم أبيه الحاج رحمه الله فى عزبة يفاخر بها عزب الأرض الأخرى، وقد أشار الحاج كمال الشتمونى الوطنى الكبير إلى انه لم يصل إلى هذا الامر بنفسه بل جاءه هاتف بالليل حيث رأى المأسوف عليه المرحوم الحاج تغمده الله برحمته فى رؤية رآها فجر الخميس الماضى حيث قال له انت يا كمال كنت اخويا متسبش الخاينين وسطيكم وخلى بالك من البيه والعزبة امانة فى رقابيكم، فما قام من ليلته حتى استخرج الحاج كمال ملفات هامة كان يحتفظ بها لهؤلاء الخونة ومستندات نادرة تثبت فساد هذه القلة المارقة وحينما عرضها على البيه قرر لفوره المضى فى حملة أيادى بيضاء لتطهير العزبة من المفسدين القدامى

وقد خرجت الجموع مهللة بالحركة التصحيحية وحملة مكافحة الفساد الذى زكم الأنوف، وقد تصدرت إعلانات ضخمة طبعها الأستاذ أحمد أبو العز والحاج رشيد حمدان رشيد والوجيه حامد المغربى تصدرت مداخل العزبة ومخارجها وشوراعها الرئيسية تحى العمدة جمال بيه على جراءته وخرجت جموع الطلاب تقول إدى إدى إديها حرية، واقطع الايد الخفية وياجمال دوس دوس واحنا وراك من غير فلوس، وبث التليفزيون برنامجا وثائقيا عن القضايا الملفقة التى قام فيها هؤلاء الاخونة بأدوار فاسدة، وقد صرح معتز ابن كمال بيه أن السيد جمال بيه كان قد أسر له قبيل وفاة الاحاج بأن الحاج نفسه يشعر بأن حلقة الخونة التى حوله سيجئ يوم ويفرتكها لكن القدر لم يمهلة وسلم الراية لابنه الذى حرر العزبة من المفسدين

ومن المتوقع خلال الساعات القليلة الاقادمة أن تصدر عدة قرارات تصحيحية مهمة

وداعاً أبو جمال

2007-05-17T03:53:00.000-07:00

بقلوب عامرة بالإيمان، ملؤها التسليم بقضاء الله وقدره، ننعى لجموع الشعب فى عزبة الحاج أبو جمال، وللشعوب المحبة للحاج كافة فى مختلف أرجاء المعمورة جلالة وفخامة وسمو الحاج محمد حسنى أبو جمال الذى انتقل لجوار ربه فى تمام السادسة من مساء أمس دون أدنى صراع مع المرض، ننعى رجلا من أشجع الرجال، وأجدع الرجال، قاد بلاده عبر الآنواء والعواصف وكان خير ربان لسفينة العزبة، وقد اختاره الله لجواره فى يوم مشهود قام فيه الحاج بآداء كل الصلوات وأتم الجزء التلاتين للقرآن، وتبرع لعدد من محدودى الدخل بالقرية بغذاء وكسوة، كأنما كان يعرف أنه سيلقى ربه فى ليلته، وهو العابد الزاهد الذى لم يفته فرض.

بهذه الكلمات المؤثرة نعى الأستاذ جمال ابن فقيد العزبة الغالى وعمدة قريتنا الحالى ووريث عموديتها العالى أباه فقيد الأمه الذى رحل عن تسعة وسبعين عاما، قضاها فى خدمة العزبة وأهلها منذ كان طفلا رضيعا وحتى رحل عنا شيخا جليلا.

وقد عم الحزن البلد عقب اعلان وفاة المغفور له الحاج أبو جمال، وعرض التلفزيون لقطات مؤثرة لحشود بالآلاف غالبيتهم من شباب العزبة الذين لم يعرفوا عمدة لبلدهم غير أبو جمال، الذي ظل في الحكم لمدة تناهز الثلاثين عاما، وقد أخذوا يرددون هتافات مثل لا إله إلا الله والحاج أبو جمال حبيب الله، وإلى جنة الخلد يا حاج، ومن لنا من بعدك يا حاج، وخرج المواطنون إلى الشوارع والساحات الرئيسية فيما وصفه مذيع بالتلفزيون العزباوى بأنها مسيرات تلقائية، تعبيرا عن حزنهم لفقدان الحاج، ومروا من أمام زاوية عليوه الشامي حيث يرقد جثمان الفقيد تمهيدا لدفنه، وأجهش الكثير منهم بالبكاء وفقد عدد منهم الوعي، كما خرجت الكارتات والدواب الحاملة للأفراد إلى الشوارع وقد رفعت الأعلام السوداء وارتفعت آيات القران الكريم من مكبرات الصوت فى كافة المنازل والمحال بالعزبة،

وتوجه تلامذة العزبة فى كتاب حمدان إلى الدار الأخضر في صفوف طويلة متشابكي الأيدي يرددون هتافات مثل يا عزبتنا اليوم مالك فقدتي أغلى رجالك والحاج لم يمت بل باقي معنا في الحياة

كما خرجت فتيات وسيدات ترتدين الملابس السوداء ويلطمن خدودهن ويحملن صور الحاج، في مقدمة حشود تحمل الأعلام السوداء

هذا وقد أعرب شعب العزبة على الفور عن تأييده لجمال نجل الحاج الراحل رحمه الله، فقد خرج الجميع يرددون هتافات بالروح بالدم نفديك يا جمال وشد الهمة يا جمال كلنا وراك رجال

وكانت محطات التلفزيون قد أذاعت في وقت سابق جلسة مجلس الركش التي تلا فيها رئيسه أبو شرور نعيا للحاج وعرض اقتراحا بتقليد الأستاذ جمال العمودية فورا، وهو ما وافق عليه أعضاء المجلس بأغلبية ساحقة

وظهر عدد من الأعضاء ينتحبون بشدة أثناء إلقاء أبو شرور للنعي. كما أذاع تلفزيون الجميزه مرارا برقيات العزاء التي أرسلها رؤساء وعمد العالم للإعراب عن حزنهم لوفاة المغفور له أبو جمال وتأييدهم لإبنه من بعده، وأعلنت العزبة الحداد العام فى كافة المصالح والغيطان لمدة أربعين يوما، ومن المقرر إجراء مراسم جنازة الراحل اليوم بعد العصر، وتقول مصادر عزباوية مطلعة إن الحاج سيدفن على قمة قرافة زنار الاعرج المطلة على حوض العلاونه إلى جانب نصب الجندي المجهول، أي أنه لن يدفن كما كان مقرر في بلدته محلة مكلوم كما كان متوقعا

ردود فعل دولية

وأثارت وفاة الحاج ردود فعل دولية واسعة النطاق إذ قدم الرئيس الأمريكي فاكن إيديوت العزاء لأفراد أسرة الحاج خصوصا المصونة ولشعب العزبة المكلوم

وقال إيديوت في بيان صدر عن البيت الأبيض إن نبأ وفاة الحاج قد أحزنه شخصياً، وإن الحكومة الأمريكية تتطلع لمواصلة العمل مع حكومة العزبة الجديدة بقيادة جمال بيه من أجل تحقيق السلام الشامل في منطقة العزب الشرقية

وفي إسرائيل ذكر بيان أصدره مكتب رئيس الوزراء نتانة حزقيل أن الحكومة الإسرائيلية تتفهم حزن أهل العزبة الجارف على وفاة المغفور له الحاج أبو جمال الذى كان صديقا للدولة العبرية، وأضاف البيان أن إسرائيل سعت في الماضي لدعم العلاقات معه، وأنها ستواصل عملها من أجل مزيد من هذا التعاون البناء مع الحكومة الجديدة بقيادة نجل الفقيد فخامة العمده جمال بيه

وقال رئيس الوزراء البريطاني دوجى بارك إن العمدة الذى لقب عن حق بحكيم المنطقة الشرقية كان من عوامل الاستقرار في هذه المنطقة، وإنه حظي بالاحترام فى داخل العالم العزباواتى وخارجه،

وفي جميع العزب الشرقية قطعت محطات الإذاعة والتلفزيون بثها الاعتيادي لإعلان نبأ الوفاة، وتقدم قادة العزب بالتعازي، فوصف عمدة مطاعن السو وفاة الحاج بالكارثة على بلاده، وأعلن الحداد الرسمي لمدة سنه

وفي شبرا النمله قال السكرتير العام لجامعة العزب عزت عبحميد إن الحاج كان من أبطال الحرب والسلام الذين كرسوا حياتهم لخدمة الأمة، وللكفاح من أجل استعادة أرض الحوض الشرقى وأرض عواض

وأبلغ العاهل الكومبرى الحاج عبد الله تعزية شخصية أثناء مكالمة هاتفية أجراها مع نجل الحاج أبو جمال أعرب فيها عن بالغ تعازيه هو وبلاده فى وفاة المغفور له محمد حسنى، وأعلنت كومبره الحداد لمدة أربعين يوما

وبعث التعازي أيضا رئيس السلطة الفلساوية، الذي كانت تربطه بالحاج علاقة وطيده عكس العلاقة المتوترة التى ربطت الحاج بسلفه، وأعلن الحداد لمدة ثلاثة شهور

وفي ميت سخام أعلنت الإذاعة الحكومية نبأ رحيل الحاج دون تعليق، في حين وصف التلفزيون الجروانى الحاج محمد حسنى بالمناضل العظيم ووفاته بالخسارة الضخمة للشعبين الجروانى والأبو جمالى

وفي سندنهور الكبرى ذكر بيان أصدرته الحكومة السندنهورية أن الوحدة المحلية بسندنهور وجميع العاملين فيها تشاطر الشعب الابوجمالى الشقيق حزنه العميق، وتعهدت قيادة سندنهور بالوقوف إلى جوار الشعب العزباوى ومن يختاره لخلافة العمده الراحل فى إشارة قوية لدعمهم للأستاذ جمال

وصدرت بيانات العزاء في كل من طما ونوى ومحلة مكلوم وطناش والغريانية وعزبة شلبى وسخا وكفور الذل وإيطاليا وفرنسا والصين والرئاسة النمساوية للاتحاد الاوربى

وفي موسكو أعربت الحكومة الروسية عن حزنها لوفاة الحاج وأملها في ألا تؤدي وفاته إلى انهيار عملية السلام في منطقة العزب الشرقية التى كان هو بشخصه سندها وداعمها

الحاج حى .. الحاج حى

2007-05-16T05:57:00.000-07:00

كتب بلبع الرغاى وملؤه السعادة والحبور

شهدت العزبة لحظات من البلبلة والارتباك عقب قيام مدونة أسد ومواقع أخرى بتداول خبر كاذب عن صحة الحاج زعيمنا، هذا وقد صرح مصدر أمنى رفيع المستوى لبولج الحاج صباح اليوم إن الدوار الأخضر قد فوجئ بتداول هذه الشائعة على المواقع والوكالات بعد نشرها علي موقع أسد ذلك الإرهابى الآبق، وبدأ المراسلون الأجانب، خاصة الفرنسيين، يستفسرون عن مدى صحتها، بناء على طلبات من حكومات بلادهم. وأضاف المصدر أن ما زاد من حالة الارتباك، ما تردد من أنباء عن أن جمال بيه، نجل الحاج، وأمين قعدة السياسيات قد غادر جمصه التى يقضى فيها شهر العسل قاطعا استمتاعه بعروسه دون أسباب وإذ فجأة، وبعدها طلبت بعض الوكالات الأجنبية من مراسليها الاستفسار عن حقيقة ما يتردد.
وقد جاءنا بيان تفصيلى عن كذب هذا الخبر وكونه مدسوسا ويستهدف استقرار العزبة العامرة الآمنة. هذا نصه

رددت بعض المواقع المشبوهة على شبكة الانترنت وبعض وكالات الانباء المغرضة شائعة مفادها أن الحاج قد تعرض لوعكة صحية مساء الأمس، وهو خبر عار تماما وبلبوصا من الصحة، وكذبه ظهور الحاج فى التليفزيون مستقبلا الحاج سيد الضمرانى عمدة هطوله المجاورة وقد بدا فى غاية الصحة والنشاط، كما أجرى الحاج زيارة تفقدية للوحدة الصحية رافقه خلالها عدد من كبار رجال العزبة يتقدمهم السيد عوضين الدهل كبير التمورجية، وقد شهد عدد من كبار رجال القرية بأنهم قد رافقو الحاج فى هذه الزيارة التفرقدية.

وأوضحت عدة مصادر أن دار العمودية فضلت فى الأول عدم نفي الشائعة بشكل مباشر، تاركين للناس تقدير حقيقتها من خلال التقرير المصور عن جولة الحاج التفرقدية واستقباله لكبار ضيوف العزبة، لكن المغرضون لم يهدأ لهم بال وقالوا أن اللقطات أرشيفية وليست حديثة، ومن هنا جاء البيان الذى تلاه حبقه العوطلى وجاءتنا صورة منه. وهو ما أجبر بعض المواقع والوكالات على سحب الشائعة فوراً.يذكر أن الحاج كان يسجل كلمته للشعب بمناسبة الذكري السادسة والعشرين تقريبا لجلوسه على عرش العمودية في التوقيت نفسه، الذي كانت فيه المواقع والوكالات تتداول الشائعة.

ام اه هابي برايد

2007-05-08T14:28:00.000-07:00

بون سواغ
الله يبارك فيكوا
نزمي بيقول لي ان كلكوا بتباركوا لي
جاله اس ام اس كتيييييييير عشان يباركولي
يوم الفرح كان جنان
اخدت انا ونزمي بلين سريعة كده عشان ننقى الفستان من باغي
اسل نزمي قال لي ان في العيزبة لو العريس شاف الفستان قبل الفرح
يبقى باد اومن...قسدي فول وحش
عشان كده قلت لجيمي خليك انت انا ونزمي نسافر نجيبه بسرعة
اسلي باسق في رأي نزمي
نزمي بيفهم في كل حاجة
حتى هو اللي اختار مكان الودينج
تبعا يا حبايبي انا كنت مشغولة كتير عنكوا
اي ميسد يو سو ماتش
كلها عشان استعدادات الودينج
انا سمعت انكوا كنتوا ح تعملوا ودينج في الشارع عشاني
بس السكيوريتي خافوا عليكوا من الحر وقالوا لكوا انهم وسلوا التهاني اون بهاف اوف يو
وسلتني يا حبايبي
السكيورتي قالوا لنزمي ونزمي قال لي
المهم تبعا نزمي اختار الفستان وكان تشويس يجنن
كمان راح للبيوتي سنتر وقال لهم انهم دحكوا عليا ومش نفخوا شفايفي كفاية
فنفخوهالي ببلاش المرة دي
رجعنا بقى
ورحنا على منتقة شرف الشيخ
كل السكيورتي كانوا واقفين يقولوا لي شعب العيزبة بيبوسك يا رودي
تبعا مش وريت جيمي الفستان
قلت لنزمي تعالى معايا
ودخلت اودة اللبس وكان الكوافير مستنيني
تبعا نزمي قالهم على احدث تسريحة تليق عليا
اي واز فابيلس
كنت زي القمر
نزمي قال لي كده
اسل نزمي بيفهم في كل حاجة
جيمي تبعا ما علقش
ولما قلت له: هاو دو أي لوك
قال لي: مش نزمي قال لك؟ اسكتي بقى
عيتت شوية بس نزمي تبتب عليا
البوفيه كان كله من باغي
نزمي عمل لي تبق عشان الدايت
قال لي ما تقوميش انتي احسن ممكن مش تكاومي الاكل واحنا لسة شافتينك
فرحت اوي لما المترب عدلي كباب غنى وقومت ورقصت
قلت لجيمي يرقص معايا بس قال لي ان ركبه واجعاه
ونادى على نزمي عشان يرقص معايا
المهم
انا في الهني مون دلوقت
نزمي مخليني اسعد عروسة في الدنيا
اه
وجيمي تبعا
باي فور ناو

السقافة كنزل لا يفنه: أول حوار سقافى للحاج منذ سته وعشرين سنه

2007-05-07T01:22:00.000-07:00

مجدى الدقماق رئيس تحرير الهلاك ينفرد بأول حوار ثقافى على الاطلاق يجريه الحاج منذ توليه العمودية من سته وعشرين سنه، وينشر هنا بالتزامن مع الهلاك عدد مايو وموقع الحزق الوطنى وعدة مجلات دولية وده راجل

عمت مساءً يا جلالة العمدة قصدى يا فخامة الحاج
أهلا يا حبيبى مرحبتين منور العزبة

أعلم حجم مسئولياتكم ومشاغلكم وضيق وقتكم، ولكننى أطمع فى أن يكون الحديث أول حوار فكرى وثقافى معكم ، حول قضايا الفكر

والابداع والفنون ، وبعيدا عن السياسة

وليه يابنى بعيدا عن السياسة كله على كله زى ما المرحوم عدوية قالها زمان مفيش فرق بين سياسى وغير سياسى، أن هنا موحد كل حاجه مع غيرها فى بعضياتها يعنى، فالقضايا كلها متشابكة، وقضايا الاقتصاد والعلوم والفنون والسياسة مترابطة، وفكر الإنسان نتاج كل هذه الحاجات والمحتاجات التى تشكل - مع تأثيرات الواقع والممارسة والتجربة والحياة - ثقافة البشر ، فاسأل كما شئت وأهلا بك وبالهلاك

سيادة العمدة : أولا كل سنة وحضرتك طيب بمناسبة عيد ميلادكم ، واسمحوا لى بأن يكون سؤالى الأول عن ذكريات النشأة والتكوين .. القرية .. الأسرة .. سنوات الدراسة الابتدائية .. هل ذهبت إلى الكتاب؟ كيف انتقلت إلى المدينة ؟ ذكريات الطفولة والشباب ؟

كل سنة والعزبة وشعبها بخير .. ويسعدنى أن ألتقى من خلالك بقراء " الهلاك" ، فقد ساهمت فى ثقافة أجيال متعاقبة من الفلاحين الغلابة منذ صدورها .. بما فى ذلك الجيل الذى انتمى إليه .سخصياً
لاتزال ذكريات الطفولة فى "كفر عجيزة" تلازمنى إلى الآن .. كنا نسميها آنذاك "كفر فيينا" لأنها نجحت تماما فى القضاء على عدم المفهومية .. وكنا فخورين بذلك .. ولا زلت أتذكر كتاب الشيخ بعجر فى الكفر ، ثم التحاقة بنحو الأمية عشان اعرف اتطوع فى الداخلية وابقى غفير نامى أو بللوك كامين، الايام دكهية الله لا يرجعها كان النفر منينا يقعد ينتع فى الارض تجيب ايه يعنى اخرة الموسم، ولا حاجه قرصين جله على كوزين دره على إيشى شوية خضار على نيلة من دى وسباخ من ده ودومتم .. آنى كنت طموح ومتنور، قلت العلام هو الطريق والسبيل، فكنت أمشى على قدمى دى حافى ولابس الجلابية الدبلان ع اللحم من كفر عجيزه إلى محلة مرحوم فى طريق الذهاب ثم العودة من المدرسة حوالى 6 كيلومترات .. أذكر أننى تعلقت آنذاك برياضة الحكشه وكنت كابتن فريق المدرسة .. وجاء الانتقال إلى المدينة بعد أن التحقت بمركز تدريب الغفر عام 1927 ثم قسم المخبرين عام 1939

قالها بكل الحسم: القراية تنور وتزود مفهومية النفر

سيادة العمده : أثناء رحلة الدراسة الأولى .. كيف كانت اهتماماتكم بالقراءة ؟ وكيف كان تأثيرها على تشكيل شخصيتكم ؟

القراية كانت المصدر الأول للمعرفة .. قبل عصر التلافزيون ونانسى .. أتذكر "روايات الجيب" وآرسيم نوبيل وماظنطر وكابتن ماجد.. ومجلات "الرسابة" للمرحوم الدقاك و "السقافة" للمرحوم حمد أبو أمين .. كانت هذه الإصدارات فى مرحلة الصبا والشباب هى التى قدمت لجيلنا روائع الأدب العالمى .. وعرفتنا بشخصيات عظيمة مثل عليوه باشا ومصطفى أبو كامل وزغلول بيه وزكى جمعه والحاج الكبير رحمتو الله عليه، وكتاب عظماء كتير بس والله مافكرهم إسأل صفوا عقله دفتر ومابينساش وسهن

.
سيادة العمده : بهذه المناسبة .. يرى البعض أن الأجيال الجديدة لم تتعرف بالقدر الكافى على أعمال رواد العزبة ومفكريها العظماء رموز الفكر والأدب والثقافة ..ألا ترى جلالتك أهمية إعادة نشر إبداع هؤلاء الرواد وإتاحة أعمالهم لأجيال الشباب؟

اتفق معك تماما .. بس أوضح إن ماعندناش فكر ليه النفر يكون عنده فكر ويسهر الليل وتفضل الحجة تزن فى نافوخه إحنا مرتاحين وبنام متعشيين ليه بقى يجيلنا الفكر ده، أما النشر فماشى بس تنشرو الحاجات الحلوة اللى تنور اللى تقولكم عليها الحاجة ماهى خدت الابتدائية كانت اشطر منى والوله جمال برضه ده طلع من تانيه اعدادى يعنى مسكف
وابدأوا بأنفسكم فى دار الهلاك .. لماذا لاتعيدون طباعة الأعمال الأدبية والفكرية الناجحة فضلا عن الإصدارات الأخرى لسلسلة كتب "إفهم واستقرا" و "أعلاف العرب" وغيرها .. إصدارات فى طبعات شعبية تكون فى متناول الشباب بأسعار رخيصة .لمحاربة أفكار ولاد أبو عيسى والعيال الملاحيس بتوع الانطرنط اللى قال إيه جيل جديد، اسفوخس على الجيل الجديد لو كان بالشكل ده ناقص ومايعملشى حساب الكبير
العلام حلو بينور والكتب مهمه وزى مابتقولو الكتاب أجدع صديق
الحج يؤكد: توفير السقافة والفن لجميع اهل العزبة لنحو جهلهم

سيادة العمدة : على مدار رحلة الحياة .. نتوقف عند فنون الكلمة والصورة .. نعلم أنكم تشجعون الفنون والآداب وتقفون إلى جانب الكتاب والمفكرين والمثقفين .. هل وجدتم وقتا عبر مسيرة حياتكم للاستمتاع بفنون الرواية والشعر والمسرح والسينما والغناء والموسيقى ؟ ومن هو المفضل لديكم فى هذه المجالات؟ .

الفكر والثقافة والفنون والآداب تمثل ذاكرة الأوطان وتراثها وعماد نهضتها .. ولدينا فى العزبة الكثير مما نفخر ونباهى به من حملة الأقلام والمبدعين .. كنت فى مرحلة نحو الأمية معجبا بشعر أبا الحاج طنطاوى أبو دومه فارس السيف والقلم كان غفير وشاعر.. .. كنت حتى صرت قائدا للغفر اصطحب أسرتى لدور السينما والمسرح .. وتراجعت فرص الاستمتاع بهذه الفنون مع تحملى المسئولية .. أسعد من آن لآخر بالاستماع للست شفيقه ومشاهدة القناة التامنه بالتليفزيون وحكاوى القهاوى للست الله يرحمها سامية اسموكيه دى .

سيادة الحاج: نتابع جهودكم لتخفيف المركزية فى المجالين الاقتصادى والاستثمارى ولتعزيز اللامركزية على مستوى المحليات .. وعلى الرغم من ذلك فلا تزال هناك مركزية شديدة فى مجال الثروة الثقافية تتركز فى داير الناحية وشرم الحاج .. هل آن الأوان لتوزيع الثروة الثقافية على كل نواحى العزبة ؟

الله ده كلام حاقدين يا دقماق انت كده بتتكلم زى ولاد علوان والعيال بتوع الانطرنط، فز قوم جاك خابط عيل نتن

لا ياحاج مش قصدى والله آنى اقصد إنك يعنى تعطى كل فلاح من خيرك يعنى ويتنور زى مانت اتنورت

آه قول كده واعدل لاخنفك

هذا صحيح .. وتذكر أننى قلت فى كلمتى فى الدوار الاخضر اللى بثتها ع الهوا عبر الفضائية العزباوية الجديدة الشهر الماضى أن التحدى الأكبر أمامنا خلال المرحلة المقبلة هو الاستمرار فى تحقيق معدلات مرتفعة للاستثمار والنمو وإتاحة فرص العمل، والاهتمام فى ذات الوقت بتحقيق عدالة توزيع ثمار التنمية بين المحافظات .. وكان ذلك من وراء طرح حزمة الحوافز الاضافية لتشجيع الاستثمار فى الــ آنى مابعرفش افتكر الكام المجعلص ده خلى صفوان ابو شريف ولا جمال يملوك باقى الكلام المفتخر ديه
وافهم انت وهما إن آنى بابذل جهدا ضخما ومتواصلا للوصول بالثقافة لأبنائنا بفى شتى أنحاء العيزية .. خص الثقافة لعب دورا مهما لتحقيق ذلك .. ومبادرة الحاجة "القراية للكل" .. والتلافزيون يا حلاوة ياولاد.. هناك حركة نشطة لأعمال أدباء العزبة تتولاها الجماعة بتوع السقافة اللى دايرين ورا المصونة ..
ثروة العزبة الثقافية ـ كباقى ثرواتها ـ ملك لى ولأبنائى بس ما اعزش حاجه عن أهل العزبة دولم برضك أهلى وعزوتى ولا ينبغى أن تكون حكرا على أحفادى وأحفاد أحفادى .. ولابد أن تصل الثقافة بمختلف أنشطتها لكل مكان وآنىهامر بحناطير توصل السقافه للى عايزها فى بيته ومن غير أجرة توصيل

.
سيادة العمده : إيه رأيك فى جوايز موبيل. خدها كام نفر هنا م العزبة م المسقفين والسياسيين وغيرهم، كيف تنظرون إلى هذا الانجاز الكبير ؟ وكيف تفسرونه ؟

** أشعر ككل أبناء العزبة الابرار بالفخر والاعتزاز .. فهذه هى قيمة العزبة .. وهؤلاء هم أبناؤها .. العزبة هى مثال حى لعبقرية التاريخ الذى ولد على أرضها .. وعبقرية وستظل دائما غنية بأبنائها .بس اللى مش قادر افهمه هما ليه مادونيش الجايزة دى بتاع موبيل رغم انى جايب طوموبيل علاوله م اللى هوه ومليه زيت موبيل م الغالى

الحاج قارئا ومفكراً

سيادة العمدة : هل يمكن أن أسألكم عن الكتاب الذى تقرأونه الآن ؟

خلصت المطالعة الرشيدة من يويمن ودلوقت ماسك فى كتاب الحاج طرطر (الجاموسراتية للأشبال) .. قرولى ملخصه عند صدوره منذ بضعة أشهر ، وأعكف الآن على تهجى نسخة أهداها لى الحاج طرطر بذات نفسه

سيادة العمدة : بعد توقف لبضع سنوات .. أعدتم إحياء الإحتفال السنوى بعيد العلم منذ عام 2004 ، هناك من حصلوا على جوائز الحاج للتفوق منذ سنوات ويشكو من عدم حصوله على شهادات هذه الجوائز .. ليس لديهم ما يثبت حصولهم على هذه الجوائز ؟

أيوه فكرتنى بصح

من حق كل واحد خد جايزه يرجعها وقت ماهو عايز وياخد بدله أردب دره وتلاتين قرص جله ينفع بيهم بيته وعياله وفضوكم بقى من الكلام الفارغ ده، إنما تسلم الشهادة لهذه الجائزة مايضرناش يعنى.. ومكتب فاروج أبو حسنى ابن أخويا ودوارى مفتوح لتلقى هذه الشكاوى وحلها .

الحاج مبرزا فكره السكافى: مينفعش الحضارات تصطدم ببعضيها ولازمن تهدى شويه وتخلى بالها

سيادة العمدة : كيف ترون الانفتاح الثقافى فى صلته بحرية التعبير والإبداع كحق من حقوق الإنسان ؟ وكيف ترون صحافتنا الآن ؟ وما رأيكم فى الجدل الدائر حول حوار الحضارات والأديان أو صدامها ؟

** الرأى رأى الأكابر يا دقماق والأدب يقول إن التعبير حق بس يكون بالحسنى يعنى ومايجرحش فى الخلق حاكم البلد دايره فيها شوطه طولة اللسان من ساعة ما قولنا يا جاموسراتية. أما حكوم الإنسان دى فآنى أول نفر طبقها فى العزب كلاتها وإسأل حبقه العوطلى، طول عمرى أقول كل حق يقابله التزام ، وحريتى تقف عند حدود حرية الآخرين يعنى غفير ضربك تقف وتعظم له لإن ده بيمثل العمدة وتقف كده عند حدودك.. ومن الأنانية أن ننشغل بممارسة حقوقنا وحرياتنا دون الالتفات لالتزاماتنا تجاه الآخرين وتجاه المجتمع وولاة الأمر اللى هما آنى،
كمل يا حاج صفوان ومليه الكلمتين الباقيين لاحسن نفسى انقطع م الكلام
اكتب يا دقماق ينطبق ذلك على الانفتاح الثقافى وحرية الإبداع .. فهى مكفولة للجميع شريطة ألا تتجاهل خصوصيات مجتمعنا وموروثه الدينى والثقافى .. فهذا ما حدث عندما غضبنا لما اعتبرناه مسيئا لمقدساتنا ، واعتبره آخرون من خارج منطقتنا حقا أصيلا فى ممارسة حرية التعبير والإبداع .. أما عن الجدل الدائر حول حوار الحضارات والأديان .. فنحن فى حاجة لحوار حقيقى يلتقى حول القيم المشتركة للانسانية، يقوم على قبول الآخر والتكافؤ والاحترام المتبادل ، ويسعى لتحقيق المصالح المشتركة .. لأن نظريات صدام الحضارات تعبر فى حقيقة الأمر عن صدام فى المصالح.
حاسب يا حاج صفوان
مافيش اصطدام حضارات ببعضياتها ولا حاجه ده كلام فارغ اللى يخبط يخبط المهم انت تمشى فى حالك وتسيب الحضارات دى فى حالها والكل يعيش انما تصطدمو ليه وتكسروا الرفارف بتاعة بعض
كمل يا صفوان قول لدقماق بقية الكلام
الصحافة فى بلدنا الآن تعكس حركة وحيوية المجتمع .. البعض يسىء ممارسة حرية الرأى والتعبير .. وينظر لكل ما يجرى على أرض مصر من وراء منظار أسود .. ولكن العمل الصحفى يزخر بالعديد من الكتاب الجادين الذين يلتزمون الموضوعية وسلامة القصد وشرف المهنة وقواعدها .. والقارىء من ابناء العزبة ذكى ويستطيع أن يميز بين هذا وذاك ,بيحترم الحاج فوق كل حاجة ولا يرضاش عليه العيبة ابدا بتاتا الفته

سيادة العمدة : ونحن نهنئكم بعيد ميلادكم بعد أيام قليلة .. وبعد هذه الرحلة الطويلة من العطاء للعزبة وبأفراح الانجال .. كيف ترون هذه الرحلة ؟ وماذا تقولون لشباب العيزية ؟

كانت رحلة شاقة .. ولا تزال .. أعتز بسنوات طويلة قضيتها بين صفوف الغفر .. أستعيد ذكريات ما خضناه من ملاحقة للاشقياء والخارجين عن القانون وحرامية البهايم .. وأحمد الله على رعايته وتوفيقه منذ تحملى المسئولية غفيرا ثم شيخ غفر ثم قفزى للدوار وأخدى للعمودية بنزاهة واقتدار ورجوله ..
فلقد مررنا بمراحل متعاقبة وواجهنا صعابا وتحديات عديدة فى الداخل والخارج .. شاءت الأقدار أن أتحمل المسئولية فى ظروف صعبة .. وكانت عناية الله معى ومع العزبة على الدوام .. فحققنا معا إنجازات عديدة .. ولا نزال على الطريق لسنين جايه بس ادعولى بطولة العمر وان أمر الله نفذ آدينى سايبكم فى يد أمينه جمال بيه ابنى ووريثى اللى واخد منى النباهة والمفهومية
أقول لشباب العزبة إنتم أملنا فى الحاضر والمستقبل .. أقول لهم إن العزبة غنية ويمكن انتم مش حاسين بغناها بس آنى حاسس .. انتم ثروتى الحقيقية .. وإن مستقبل الأوطان يظل فى أيدى شبابها خصوصا جمال ابنى، وليس فى أيدى الحظوظ أو المصادفات وولاد الكلاب وأكرر مفيش مكان عنى لولاد الكلب

فخامة الحاج : نشكر لكم تكريمنا بهذا الحوار الخاص .وهات إيدك أبوسها

اللا معقول في قول الدلدول

2007-05-06T05:09:00.000-07:00

أكد مصدر غير مسؤول
يدعى ناشف المبلول
بكفر ماسبيرو المشمول

أن دلدول ابن البهلول

مستشار الإعلال الهلهول

أكد أن إعلالنا المهول

يمتلك كل قبول

لمكومات السدارة والحصول

و لسياسات الحاج والديول

في عزبة ولده الشملول

وفي التخطيط والوصول

لنقطة المجهول

في عالم الدوش والسيول ..

هذا ولم ينف ابن البهلول

مقولات ناشف المبلول

وعلى المشككين العدول

النكوص والأفول ..

كما أفاد أخرس البكمان أن ابن البهلول الندمان طرح للبنات والغلمان المنكوش منهم والفرقان هيكلة إعلالنا الهلكان بالعدل والميزان ليتولى البس والإعلان جهاز كومي عطلان لمنح التراخيس والصكان ووهب ملكية القنوان الأردية والدشان للكطاع الخاس النهبان في عزبة أبو جمال المرضان وأن مدينة الإعلال الفلتان ستشهد بين حين وآن طفرة في الإنتان وتنكيد الأبدان على كل إنسان في عزبة الرعيان بلا مواتنين بلا ظربان والسلام ختان

حشود قوات الغفر النظامية تقيم احتفالا مهيبا بميدان طلعت حرب

2007-05-04T09:34:00.000-07:00

رغم أنف الحاقدين

وحقد وترهات المرجفين

تمت أفراح العزبة الميمونة

وبصورة مهيبة

أقامت قوات الغفر النظامية احتفالا مهيبا فى ميدان طلعت حرب شاركت فيه فرق محمولة ترتدى الملابس المزركشة الرسمية والعربات

المدهونة بالاخضر التى تثير فى النفوس الهيبة والتى تعبر عن عصر الحاج وما زرعه وخضره فى قلوب الخلق من خوف مبعثه طبعا محبة واخلاص وتفانى لشخصه المبارك وقد انتشرت تشكيلات قوات الغفر النظامية فى صفوف بعد ارتداؤهم أبهى الحلل وتمشقهم الاسلحة الخفيفة واصطف قادتهم بطول الميدان ينظمون الجماهير ويحثونهم على الهتاف لجلالة الحاج

وقد تعذر على البعض الوصول للميدان من كثرة الحشود المهنئة ونظرا لوجود فقرات تؤديها الموسيقات العسكرية وفرق الكارتية وعروض اليوجا على الكراسى التى يؤديها كبار القادة من الغفر النظاميين وكذلك الكلاب المدربة التى تقفز عالى هوب للتقاط العصيان الكهربائية وتهبط لتسلمها للقائد المبتسم

وامتلأ الميدان بصور طولية وعرضية وبالورب للقائد وملئت أنفاسه المكان وعلت الزغاريد المكتومة والتصفيق الحاد من قبل المواطنين المارين المنبهرين بكل هذا الكم المحشود خصيصا لاسعادهم فى يوم مفترج وجميل كهذا

رعى الله العزب وأطال فى عمر الحاج وولده وذريته ليحكمو العزبة أبد الدهر مجللين بالمحبة والمهابة من الجمهير العاشقة لوجودهم فوق العزبة

تحية لكل من ساهم فى هذا الحدث من حبقة العوطلى لرجالته

واللعنة لكل من سولت له نفسه افساد الفرح

جيمى واسد وسيزار ويسارى وسينفل آنجل ونواره وحسام حملاوى وكبر دماغك والبلشى ودماغ وشرقاوى ومش عاوز أقعد اعد لانسى

اللعنة ليهم كلهم

والمحبة للحاج ممنجه العزبة وحاميها وضابط أمنها ومنيمها فى الهنا

مبروك للعروسين

وكنا والله نفسنا نجامل ويكاد المرء لا يغالب دموعه

بس معلش تركنا الساحة لمن هم أقدر واقرب واكثر فهما للحظة

قواتنا

قوات الغفر النظامية

عاشت عاشت عاشت

وليخسئ الحالمون

الدعوة عامة لفرح جمال بيه

2007-05-04T00:27:00.000-07:00

بيان رسمي من عليش أبو جالوص الغفير الخصوصي لفخامة آبا الحاج أبو جمال ومسئول التنظيم فى الفرح بتاع البيه الصغير، :

يا أهل العزبة بعد ما كنتم جرب والشق في رجل النفر منكم يساع كلبه والده، الحاج عطف واتكرم وخلاص هايدعيكم على فرح البيه جمال، ومع إن الفرح عائلى وانتم يعنى ماتستاجروش تمتو للحاج بصله، فاستحموا يابلد واجهزو، ونعرفكم أن فرح جمال بيه وارثكم - بعد عمر طويل لفخامة جلالة الحاج - على المصونة الجديدة خضرا بنت أبو حسين المسماه من النهاردة رودى بنوتة بابي هسين هيحضره ناس كبرات، ونضاف من العزب التانية ومن أهل المصونة الكبيرة الأكابر، و استحراصاً على صورة عزبتنا بين العزب الشرقية والكفور اللى ف الناحية ديه، قررت اللجنة السيادية الإعلالية العليا المتكلفة بإدارة الليلة الكبيرة رفع تقرير يحذر القوادة السياسية من بلاوي محتملة وفضايح متوقعة من أشكال زيكم وخصوصا لحظة تقديم الزفر للمعازيم ؛ وبناء عليه يا عزبة حدث من فترة يعنى وبناء على أنكم ما تفهموش فى التيكوتيك قرر فخامة الحاج نصب الفرح الحقانى فى ناحية برم الشيخ المجاورة للناحية الشرقية حدا دكانة حسين أبو سالم .

لكين الوضع اتغير وبقالكم دور وحضور يا عرر، والحكاية أصلها عشان يعنى يبقى فى معلومكم انتم وغيركم أن سيدة العزبة الأولى المصونة أم جمال الحنينة ريسة " قعدة للنسوان العمومية" وصاحبة مبادرة "العلام للناس كلاتها " التاريخية و"حركة أم جمال الدولية للنسوان بتوع السلام" التى تضم خيرة نسوة العزب الدولية، المهم المصونة مجالهاش قلب تحرم شعب العزبة من فرحتهم في ليلة مفترجه زى الليلة الكبيرة بتاع جمال بيه وطلبت من فخامة الحاج نصب فرح تاني شعبى لأهل العزبة اللي ما انعزموش في برم الشيخ، وقد رق قلب فخامته كعادته مع محدودى الدخل والمحتاجين ووافق على طلبها كما أصدر توجيهاته بتوزيع القرطاس الرسمي للعزبة على جميع الأهالي المشاركين في الفرح .

تيجو بقى متليفين كده ولابسين المزهزه والمكوى،

من الساعة ستة قبل المغرب يوم الجمعة أربعة مايو

وسط العزبة

عند وسعاية طلعت أبو حرب

قدام فرش الحاج مدبولي بتاع الجرايد

وبكدة مالكوش حجة وحسك عينك إنت وهو تهوبوا ناحية فرح برم الشيخ أو الناحية الشرقية كلتها, حيث تتواجد قوات الغفر النظامية المدججة بالبنادق سعة عشر طلقات لتأمين الفرح والمعازيم الأكابر

ملحوظة ورجاء حار من الست رودى للنسوان اللى هايحضروا، بلاش الجاز واستخدموا شامبول وبلصن على شعوركم

رودي تشكر اهل العيزبة على الودينج

2007-05-01T08:29:00.000-07:00

هاي
ثانك يو ما دير عيزبة...انا عرفت ان الناس كلها كانت فرحانة قوي
وعرفت كمان انكم ح تعملوا لي فرح آت ذا الستريت
انا وماي هازبند كنا عايزين نعمل الويدنج على الديق يعني مش يتكلف اكتر من مليون عزباوي بس
لان تبعا دي فلوس العيزبة واحنا مش لازم نبعزء فيها يمين وشمال كفاية ان اهل العيزبة عملوا لي الفرح هدية منهم
جيمي قال لي كده
قال لي: سويت هارت...كل اهل العيزبة وهم بيدفعوا التاكسس...سوري ثانية واحدة ابس في الموابيل...اه الدريبيات بتاعتهم...كتبوا على الزرف من برة: مخسوس عشان فرح رودي
بس دادي ابو حسين قال دي بنتي الوحيدة ولازم افرح بيها واسر انه يوم الفرح يجيب متربين
بس برده مش ح يكلفوا فلوس لانهم كلهم سحاب ماي هازبند
الحمد لله يوم كتب الكتاب كان يوم حلو خالس...مرسي كتير ماي دير عيزبة على الهدية دي
انا لازم اشكركم
كمان لازم اشكركم على انكوا دفعتوا تمن السيليو لايت والهير بلانتينج..اسدي زراعة الشعر..وحقن البوتوكس وشفت الدهون وعملية السيليكون بتاعة الهيبس...اسل البرست أنا كنت عملته على حساب دادي
ومرسي كتير عشان انتوا اللي سممتوا اني اعملها في باغي مع اني كنت عايزة اعملها في العيزبة
بس ما هازبند قال لي هم لما عرفوا ان فيه ناس بيئة في البيوتي سنترز هنا قالوا مش ممكن رودي تروح الاماكن دي وقال لي انكوا كتبتوا الكلام ده برده على الزرف بتاع الدريبيات اللي دفعتوها
بس عموما الكوزموتيك ما اتكلفش كتير انا جمالي تبيعي...بس بسبب اني مشغولة على اهل العيزبة كنت محتاجة شوية خدودي ترجع زي ما كانت وعملت لها شوية انلارجمنت...كما من كتر ما العيات اللي فدلت اعيته لما اتأثرت بحب اهل العيزبة حواجبي كانت محتاجة تترفع شوية
انا لما عرفت انكم انتوا اللي دافعين تكاليف الفرح قلت له: لا يا جيمي مش عشان الناس عزمتنا نخلس كل الفلوس
في الودينج داي...ما يسحش..دول ناس فقرات ولازم نراعي زروفهم...يعني الفستان مش ممكن يبقى اكتر من 180 الف عزباوي بس كمان كفاية الودينج رينج يبقى بعشرتلاف دولار...وفر الباقي اللي جاي هدية من الدريبيات للهاني مون.
انا مش باحب الاجزاجيراشن..ثانية واحدة...الموابايل يا نزمي...اه...مش باحب المغلبات..لا..المبغلات..ايو مش باحب الموباغلات..عشان كده شفتت الدهون بس...باحب البساتة في كل حاجة
ان مش بخيلة هاهاهاهاها مش عشان دادي من رومياط يبقى بخيل...لا...بس انا مش عايزة اسرف فلوس العيزبة عليا انا بس...ممكن نشيل شوية للبيبي اللي جاي...ممكن اسحابي...دادي ...مامي كده.
ثانك يو ثانك يو فري ماتش
باي فور ناو

نفى ما تردد عن مهاجمة قوات الغفر النظامية لعيله كبيرة وطردها م العزبة

2007-04-29T01:12:00.000-07:00

بيان هام وعاجل من حبقه العوطلى كبير الغفر

رددت بعض وسائل الاعلام الغربية أكذوبة مفادها أن قواتنا من الغفر النظامييم قد قتلت عدة أفراد من عيلة فى الناحية الشرقية وآذاقتهم مرارة العيش وأطلقت عليهم وابلا من الزخيرة والمدفعية فى محالوة لاسكات ثورتهم بعد متقل فردين أثناء مطاردة بعض الغفر لهم، وقالت الفرية أن العائلة قد قررت مغادرة البلد احتجاجا على ما وصفوه اضطهار وتشريد لهم فى بلادهم وهو ما حدا بهم للتوجه نحو خط الحدود وطلبهم اللجوء الجماعى لعزبة معادية

وهذا الخبر عريان تماما بلبوصا من الصحة وكل ماحدث هو مجرد مناوشات تبادل فيها بعض الغفر اطلاق النار مع أشقياء والقى القبض على أحدهم ولاذ اثنان بالفرار وجدت جثتهما منتحرين فيما بعض وسط الزراعات

وتهيب قوات الغفر النظامية من المواطنين توخى الحذر وعدم الانسياق وراء الأخبار المغرضة فى ظل القيادة الحكيمة وتوجيهات الحاج محمد حسنى رضوان الله عليه

تحديث: ليس هناك صحة للخبر الذى أوردته وكالة الانباء العالمية من أن السبب فى ثورة العيلة المشار إليها عاليه فى الناحية الشرقية له علاقة باجراءات التأمين الصارمة التى اتخذت استحراصا على فرح جمال بيه الذى سيعقد فى ذات الناحية، لأن الشعب بيفدى جمال بيه برقبته، وأى كلام عن إن إجراءات الأمان فيها اضطهار للناس كلام تدليس وكدب وملهوش أى لازمه

الحاج يشهد احتفالات العزبة بعيد العمال ويلقى خطابا تاريخيا أكد فيه للعمال أنهم فى قلبه

2007-04-29T00:53:00.000-07:00

فلاحى العزبة وعمالها يشكون مر الشكوي من الغلاء، والارتفاع المتواصل في الأسعار!! يشكون من انخفاض مستويات أجورهم!! وتوقف صرف بعض الحوافز والمكافآت لهم!! يشكون التفرقة المرة بينهم، واختلاف الحوافز والمكافآت من غيط لآخر ومن زريبه للتانيه، ومن معمل كتاكيت لاخوه ومن منحل عسل لابن عمه، هم لا ذنب لهم في تحقيق المشروعات بالعزبة للخسائر المتواصلة، فهناك أخري تحقق نتائج!! هم فقط يشكون كغيرهم من متطلبات الحياة، وعدم تعيين أبنائهم بعد انتهاء تعليمهم أجريه فى الغيطان!! يشكون من نقص وتضارب المعلومات والأرقام الخاصة ببيع الطاحونه وفرن العيش والوحده الصحية، والشائعات التي يروج لها بعض المندسين علي حركتهم النقابية!! ورغم انين الشكوي ومرارة المعاناة، كانت عاصفة من الحب.عاصفة تحمل في طياتها دلالات ومعاني كثيرة.تلك التي استقبل بها فلاحى القرية وعمالها الحاج محمد حسنى زعيم العزبة وقائدها الميمون وأبو وارثها المصون، لحظة دخوله قاعة المؤتمرات الرئيسية بدوار الناحية القبلية، في احتفالات عزبتنا العامرة بالصلاة ع النبى بعيد العمال أمس. عاصفة جياشة لا تعرف الرياء، أو النفاق. لا تعرف شيئا سوي الوطنية الصادقة، والانتماء الحقيقي لمعدن شعب عزبتنا الطيب الصبور. حمل عمال وفلاحى عزبة الحاج أبو جمال صور الحاج وولده، وتبارت حناجر الحب في صياغة كل المعاني الجميلة، التي تعكس علاقة فخامته الحقيقية بشعبه. الشعب الذي يجدد دائما حبه وولاءه لرجل أصبح رمزا يفخر به تاريخ العزبة. كانت عاصفة من الحب، تجددت طوال 80 دقيقة، استغرقها الاحتفال وخطاب الحاج في عيد العمال.. وكانت رسالة، يؤكد من خلالها شعب العزبة تمسكه لآخر نفس بالرجل، الذي عبر به المحن والشدائد، واستطاع رغم كل التحديات ان يحفظ للعزبة وجودها رافعا هاماتها وضامنا بتوقيعه شموخها، ومحافظا على أمنها واستقرارها. عاصفة من الحب، أكد بها عمال العزبة وفلاحوها الذين يمثلون قلب شعبها الاصيل، تمسكهم بالرمز الذي تولي مسئولية الحكم وهو متوج بالنصر، يردون بها علي كل افاعي الظلام من ولاد ابو عيسى وعلوان النتن وغيرهم من المندسين والجواسيس، التي تحاول أن تنفث سمومها. يردون بها علي كل القوي الحاقدة علي العزبة العامرة وشعبها.. الناقمة علي ما تمثله كقوة اقليمية في منطقة العزب الشرقية، ترفض سياسات الهيمنة، وأسلوب املاء الشروط.

عاصفة من الحب، رغم كل ما سبقها من سخونة في المواقف، واضرابات في بعض الغيطان والمطاحن والورش، وارتفاع حدة الحوار الدائر حول المواءمة بين الخصخصة التى يقودها البيه والاوفياء من اصدقاؤه، وما تفرضه من اعباء، وبين الحماية الكاملة لحقوق، ومكتسبات العمال.العمال رفعوا صور الحاج خلال المظاهرات، ورفعوها في يوم عيدهم.. فخامة الحاج هو التهديد الوحيد، الذي يستخدمه عمال العزبة وكل ابنائها البسطاء، عندما يشعرون أن هناك أحدا يريد المساس بحقوقهم.. انه الرمز الذي يلجأون إليه.. إنه الحصن الذي يحتويهم، ويذود عنهم.إنه كبيرهم ليس لأنه الحاج فقط!! ولكن لأنه محمد حسنى الانسان، ابن أرضها الطيبة، ونبت شعبها الاصيل..فخامته لا يملك كل من يعرفه إلا أن يحبه.. الحاج الذي يتحدث بنفس اللغة والمفردات، التي تعكس سماحة وصفاء ونقاء سريرة، يتميز بها أبناء العزبة عن كل أجناس الأرض. الحاج الذي يحرص دائما، في كل زياراته التفرقدية، علي أن يسأل العمال.. يتحدث معهم.. يستفسر عن أحوالهم.. يعيش هموم شعب يثق في أن قائده، وباعث نهضته، قادر علي أن يحتويه، ويتسع قلبه وعقله وفكره له. ويعرف أن الحاج هو ملاذه الأول والأخير.يداعب طفلا صغيرا.. ويهمس ضاحكا في أذن شيخ مسن.. جلالته يعيش في كل بيت بالعزبة حقيقة واستعارة.. تشغله وتؤرقه أي شكوي من أي انسان. كل مطالب الفلاحين والعمال هي مطالب الحاج.. يسعي جاهدا لتحقيقها.. الناس تريد زيادة المرتبات، والحاج يتمني مضاعفتها لكن ما باليد حيله.الناس تريد نهاية لموجة الغلاء وارتفاع الأسعار.. وهي مطالب تجسدها تكليفات الحاج لقعدة السياسيات ومجلس الركش، ومناقشاته خلال الاجتماعات بمشتشاريه، ومشاعديه، من الحجاج الأوفياء الاتقياء الانقياء، التي يعقدها لمتابعة خطوات العمل الوطني.

عاصفة من الحب.. بادلها فخامة الحاج لأبنائة قائلا لهم: انتم في قلبي.. بادلها بتأكيدات وتحذيرات واضحة للمشتشارين ومجلس الركش.. ولكل قوي المجتمع، بانه لن يسمح أبدا بالمساس بحقوق ومصالح العمال، أو النيل منها. وأعتقد أن الأيام القادمة، سوف تشهد ترجمة أمينة لذلك

-----

نقلا عن جريدة الأهبار

يا داهيه دقى

2007-04-28T09:34:00.000-07:00

آه ياعزبة الهم

طب ده سؤال أنسأله فى ليله مفترجه زى دى، شفتم العجب بتاع عزبتى بنت الحرام دى، قال إيه جانى عوضين أبو ازدحمد، وده تقولوش قضا، يحط على دماغك وانت قاعد ساعت العصارى متمنجه وبتحبس البطايه بكوباية الشاى ونفسين الجوزه يقوم يهد مزاجك من جدوره ويدردك شوية الانفاس اللى انت ظبطت بيهم الجمجمه وتبقى مانتاش قادر تمسك نفسك من تنسير فرده البلغة على صلعته الكريمه، عوضين ابن سعديه اللى ملهوش زى، قاللى جرى ايه يابا الحاج، قلتله طب ارمى السلام يا جاموس الاول ابن سعديه قاللى لا سلام ولا جله، قلتله جله لما تندفن فيها يابعيد ورميت كوباية الشاى على الارض وانعدلتله قلتله قولى ايه اللى جرى ياغفير النيله

قاللى الناس ماشيه تلسن ف العزبه، قلتله انقطع لسانهم هما مش هايبطلوا العادة المنيلة دى على الطلاق لاقفل كل الغرز العفشه اللى بيقعدو فيها دى

قاللى لا المره دى مش م الغرز المره دى من دوار علوان ابو جمعه اللى فى الناحيه البحرية جنب الترب

قلتله كلام من ناحية الترب يبقى كلام يوغوش

شديته من ودانه وقلت له تعالى هنا يا غفير الهم وقوللى بينى وبينك وبالراحه كده عشان علوان ده تعبان واولعوبان وممكن يكون بيرمى كلام وانت قاعد عشان يلاقى بيه حاجات ومحتاجات وانت غفير جاهل وزى البقر الفريزيان فشل ومخك مغشوش

قول يا حمار بالراحه

قاللى سمعتهم بيتحدتوا فى حق البيه والهانم

هبيت ورحت زاعق فيه وقايل الهانم المصونه مين جاب سيرتها مين ابن الهرمه مين قول يا غفير

قاللى لأ يا سيدنا العمده اللى اتكلم كان مقصوده الست روجى

روجى مين ياغفير معنديش انى حد اسمه روجى

قاللى الست الفانصيه بتاع جمال بيه

فانصيه ايه يا غفير انى مش فاهم حاجه

الفانصيه يا عمده اللى بتعمل تورز فى الورفيناج مع نازمى

رحت شاخرله ولهفته قلم على صرصور ودانه وقلتله اتكلم كلام معقول يا غفير لاحسن اسحبك ع الزريبه طوالى

فهمنى روجى مين وفانصيه مين ونازمى مين يابن المتلومه

قاللى وهو بيعيط الست خضره يا عمده سارحه فى البلد مع نازمى قصدى الحاج نظمى رياده وبترطن خواجاتى وبيقولو ان البيه مش مالى عينيها عشان عنده اربعه واربعين سنه وملهشى فى النسوان يعنى وهى كده لهطه قشطه ونازمى لافف عليها

قلت ياداهيه دقى

البيه مش مالى عينيها عشان عنده اربعه واربعين ونازمى اللى لما وعيت ع الدنيا كان شعره ابيض بيلف عليها حقا بطلوا ده واسمعوا ده

وان فين م الحكايات دى الله هو انا عجزت ولا ايه يمكن عجزت ومش واخد بالى وباجوز جوازات غلط ولمين لابنى ووريثى المهطول واللى بيتاكل على قفاه علنى امال هاكتب كتاب مين الليله

ورحت زاعق جايب المصونه والأخ اللى مش مالى العين وقايلهم ع الحكاية

جمال بص للغفير وقاللى ببرود كده وكلام باهتان

يابا ده غفير جاهل

باد انفورمنت

قلت له لأ لأ حاسب

ده غتت آه وكلامه دبش آه بس والنعمه اللى فى إيدى دى ورحت رامى الجوزه ع الارض مايكدب على فى كلمه هو عارف هاشمطه ازاى فى الزريبه انى مش عمده جعر ولا نايم على ودنى ولا مشغل خرنجات تلملى الكلام م البلد

قاللى يابا الدخول للألفيه لازمن فيه صوره جديدة وهيئة جديدة للحكم فيه يا حاج حاجه اسمها ملكية دستورية بنحكم كعيله حاكمه ومجالس ومؤسسات وفق القانون وبندى للناس حقوق وبنحاول نتفركد الاحوال عشان نعرف الحقوق وصلت لمستحقيها ومتوافره ولا لأ

قلتله امال انى باعمل ايه طول النهار بالكارته

ده جوز البهايم اللى بيجروها والغفير اللى بيسوق بيكلفونى شئ وشويات كل جمعتين ارميهم بقى واقعد اتفركد معاكو ياللى تتفركدو على جنابكم

وبعدين انى شاريلكم العربيات دى كلتها عشان تلفو البلد مع نازمى الرجل الناقص ابو شنب ملهوش مله ومكسوف يبينه فى وشه وعامله زى الخط الكوبيه فوق شفاتيره

انى يا جمال يابنى مافهمش فى لزوميات الافلية دى ولا بيخشوها ازاى ولما طاوعتك قلت انت فكرك جديد وهاتفهم وهاتمش الامور حسب حال الدنيا انما كده فيه انه وفيه حاجه انى مافهمهاش انى عمده عسكرى ماعرفشى غير ثفا وانتباه

بالها الافيه ودخولها الامر سهل ومش محتاج وجع قلب انما صارحنى فى الاهم

خضره اللى سمتها روجى دى ماليه عينك كده ولا مانتاش مالى عينها

يابا حكاية ملو العين دى بقت دقه قديمه احنا هنا بنقوم بادوار سياسية وعلاقات عامه وضبط ايقاع مصالح عشان نتقدم

قلتله لأ الدور ده ميمشيش عندى انى مش هاتجرس قدام علوان وعيلته عشان اضبط مصالح وبعدين مصالح مين دانى الكل فى الكل

قاللى متخافش يابا احنا فى سكه جديده وبنمارس الحكم من مانظور جديد

انى دماغى لفت وقعدت ع الدكه وناديت المصونه تلحقنى

المصونه بنت الهرمه قالتلى اسكت ياعمده ياخرفان جمال بيه كبر وبقى ملو هدومه وطبطت على صدره وهى باصاله باعجاب كده وهو مبتسم ابن الاهطل ومش فاهم انه بقى الخرنج فى عين البشر

قلتلها دا احنا اتجرسنا بلف الفانصيه بتاعته ونازمى

قالتلى نازمى ده راجل اوريجينال وبيفهم فى الاتيكيت والبى آر قصدى العلاقات العامة

قلتلها الله طب مانتى لسانك انعوج زيهم اهوه وبقيتى تلبسى المايوهات امال فين لباسك الدمور يا مره يابنت انجس راجل

راحت راقعه بالصوت وجمال والغفير حاشونى عنها وشدوا البلغه من إيدى

قعدت بعيد وقالتلى انت خلاص خرفت وعياك والادويه غطوا على فهمك ومخك بقى مليان تخاريف سيب الشباب يعمل اللى هو عاوزه

انت مش هاتفهم

واللى بيعمله فى البلد هو الوحيد اللى فاهمه

قلعت الجلبيه وعدلت الشلت ورحت مديهم ضهرى ونايم

مذكرات دلدول البهلول في الوادي المجهول

2007-04-28T06:10:00.000-07:00

الأولة صابر أنا
شهد السيد دلدول البهلول مستشار الحاج أبو جمال لشئون الإعلال الاحتفال الثكافي باختيـار العزبة بين عزب العالم كلاتها لنشـر أهم اصـدار علمى وجغـرافى يصدر بـ 31 لغة من بينها اللغـة العربيـة وهى مجلـة ( ناشيونال جيوجرافيك ) والتى تصدر عن أكبر وأعرق مؤسسة امريكية يقرؤها ما يزيد على 40 مليون شخص فى العالم .
وقد أكد مصدر نهاري يدعى صباحو ونونة في كفر ماسبيرو أن الحاجة مرات الحاج كتبت كلمة الافتتاح للعـدد الأول للمجلة ..

الثانية مفقوع ضنا

أعلنت مصادر ليلية على لسان مساؤه دندنة المسؤول الكبير في كفر ماسبيرو أن ابن البهلول قد أكد أمام الملتقى الفقرى في كلية الإعلال أنه من المتوقع ان يصل حجم صناعة الاعلال فى العزبة إلى 4.6 مليار جنيه عام 2012 وانه لن يسمح لغير أبناء العزبة بالاستثمار فى الاعلال .. وأشار دندنة نقلا عن السيد عصر سلطنة أنه سيتم انشاء جهاز كومى لتنظيم البث بالقنوات الدشية والحنفية مع السماح للكطاع الخاس بملكية هذه القنوات، ويتم الآن دراسة هيكلة الاتحاد وتحويله الى كفور ونجوع مساهمة، وسيكون هذا الجهاز صاحب الحك فى الترخيص بفتح قنوات للجميع بما فيها تلافزيون العزبة .

الثالثة مبضون سنة .

قام ابن البهلول بتشكيل لجنة لتكييم برامج تليفزيون العزبة تضم رئيسة التليفزيون ونائب رئيس التليفزيون ورئيس القناة الاولى والثانية ونوابهم ومجموعة من الكيادات الإعلالية ومن جانبه أكد الدغف عبطنة مصدر غير مسؤول في كفر ماسبيرو أن الهدف من اللجنة هو مشاهدة البرامج وتكييمها من حيث الشكل والمدمونً .

رودي كوين اوف هرش

2007-04-26T05:34:00.000-07:00

الحقيقة كل ما معاد الفرح بيقرب كل ما الريسبونسيبيلتيز بتزيد

تبعا ممكن اعمل زي اللي قبلي اللي كانت ايجنورينج مسئولياتها

بس انا مش اقدر اعمل كده

انا تلبت من عمو نزمي رياده السكريتر بتاعي وده سخص أوريجنال فرى كومتد وبيفهم كويس وديسنت مع الستات بشكل مش معقول، ووسيم أكترم ن المنز بتوع العزبة صورته أهى رغم إنه أصر مانشرش صورته عشان مش بيحب الشهرة، أنا قلتله نزمى لازم تنزم لي تور في افقر ملاجئ العيزبة

قلت له مش عايزة الملاجئ اللي في جردل سيتي ولا في الزمبلك، عايزة

اشوف ملاجئ الانجنيرز..سوري الباشمهندزين...مدينة منصور...

الزوقي...كل الحتت البيئة دي...اللي فيها ناس فقرات مش عندهم ولا حتى سنترال اير كونديشن في الملاجئ

ما تتسوروش...نزمى فرى سبيدى نفذ اللى قلتله عليه، أخدت الموتوركيد اللى دادى الحاج خسسهولى، إن فاكت أنا على قد ما حال الايتام المساكين سعب عليا، على قد ما كنت مبسوتة قوي

واحد من الاولاد الغلابة...لابس هدوم جايبها من محل هنا في العيزبة..كلهم لابسين زي بعد..بعت من اللاب توب بتاعه ميل لكل سوحاباته في الملاجيئيات التانين قالهم: رودي كوين اوف هارتس باسد باي.

انا تبعا نبهت على ادارة الملجأ انهم لازم يعملوا استسلاحات...يعني مش ينفع يبقى اللاب توب بتاع اليتيم منهم قديم كده...كمان ملبسينهم كلهم زي بعد ليه؟ وليه جايبين الهدوم من عند المحل اللي جنب الملجأ..أمال باغي ولندن راحوا فين؟

تبعا مدير الملجأ قال لي ان الفاند قليل جدا، عرفت تبعا ان الاورفانج ده بتاع سولي ساحب جيمي ماي فيانسيه وبينهم بزنس، اتسلت بيه وقال لي انه بيديهم فاند كويس...قلت له يبقى لازم تحقق الفاند بيروح فين؟

لان للاسف الاولاد فقرات فقرات فقرات خالس. تسور لسة بيلعبوا بالبلاي ستاشن؟! وكمان السويمنج بول هنا سغنن خالس، ومش عندهم غير بيانو واحد لونه اسود كده وفري دبرسنج، وبعدين فين المكان اللي ح يتدربوا فيه على الهورس رايدنج...اسمه ايه يا نزمي...سانية... واحدة نزمي ..اسمه ايه يا نزمي الهورس رايدنج بالعزباوي؟

- اسمه تتلع على الحسان يا هانم

اوك...اه مش عندهم مكان واسع يتلعوا فيه على الحسان ويجروا...

- لا يا سولي لا ...انا زعلانة جدا...انت بقى بتعمل الاورفانج ده عشان التاكسس وتسيبه بالاهمال ده

- سدقيني يا رودي انا مديله فاند كويس

- كام يعني

- حوالي عشرة مليون عزباتي

- او بس؟...يا نزمي

- وي مودموزيل...

- عشرة مليون عزباتي يكفوا كل اللي حاجتات اللي المفرود تبقى موجودة

- نو مودموزيل...سيتامبوسيبل...مش يكفوا الولاد دايفنج ولا حتى يكفيهم سويمنج سوتس من باغي

- انا باوشوشه: قول الكلام ده بالعزباوي يا حومار انت عشان بتوع الاورفانج والاولاد يعرفوا اني ح اجيب لهم حجاتات ويحبوني

- بيان سور مدموزيل...الفلوسات دي مش تكفي الولاد أ...ون مينيت...اه مش تكفيهم نشتري لهم سباحة بدل من باريز

- انت بتعمل ايه؟

- انا باقرا من الياس المعرب مدموزيل

- ممكن تحتهولي على الموبايل زي ما هو عندك ع الموبايل عشان اعرف الترجمتات؟

- بيان سور مدموزيل

سيرة دلدول البهلول .. مستشار الإعلال للحاج أبو جمال

2007-04-24T07:59:00.000-07:00

- ولد المدعو دلدول البهلول الحلو المبلول في ليلة جيزاوية منيلة يوم 14 شهر 10 سنة 60
- حامل في بكابورتوس نجارة من جائعة القاهرة عام 83 شعبة إدارة أعمال - طبعا مقبول الدلدول .
- عمل فور تخرجه كمدير- خت بالك من مدير دي فور التخرج - لتسويق الموسوعات الأجنبية .
- أسس ابن البهلول في عام 1985 أول شركة لتوزيع الموسوعات .
- عمل فى مجال الغسيل والنشر والترجمة لدوائر المعارف أهمها دائرة معارف لمكتبة الأسرة تحمل امضاء مرات الحاج أبو جمال في العزبة تؤكد صفحاتها الألفية أن القدس عاصمة أبدية لإسرائيل .. وأسس الدلدول مجموعة شركات خاصة لذلك فى الفترة من عام 1985حتى 2002 ترمرمت على أيدي صفقات مريحة بينها وبين جمعية الوصاية المتواصلة لمرات الحاج أبو جمال لتزويد أكشاك الجمعية على القمم والنواصي في العزبة وبرضه عن طريق مرات الدلدول مراته مدام السحت سفلأة عضو قعدة شقارة ونقارة في جمعية الوصاية المتواصلة .
- مرات ابن البهلول خلته رئيس هيئة فيلات المعرفة والواسطة في 14/1/2002 .
- وبصراحة الدلدول ولأول مرة لوحده ابن البهلول أصبح مستشار الحاج أبو جمال للعيال الفلتانة من 13/7/2004 – 14/2/2005 وبعد تلبيس الحاج أبو جمال طاقية ده لطاقية ده بقى دلدول البهلول مستشار الحاج للإعلال من 15/2/2005..

شعار الدلدول ابن البهلول في الإعلال
يا مشاهد يا أأارح .. سمي في عينك سارح .. من امبارح ..

دلدول البهلول مستشارا للحاج لشئون الاعلام المرئى والمسموع والمقرى

2007-04-24T04:10:00.000-07:00

كتب بلبع الرغاى دون أى غيرة وبفرح شديد
اختار الحاج محمد حسنى بنفسه صباح اليوم السيد دلدول ابن المرحوم الحاج بهلول المزين طيب الله ثراه وهو من أعيان العزبة وندماء الأستاذ جمال بيه كيبر قعدة السياسيات ليكون مستشاره فى شئون الاعلام المرئى والمسموع والمقرى والاستاذ دلدول راجل متنور ومن أبناء القرية الذين يجيدون اللغات الاجنبية حيث عمل ترجمانا فى الهرم وسرح بجمل هناك منذ نعومة أظافره، كما عمل مدير عام البوفيهات بجريدة النبق والتحق لعدة أشهر بمحطة الاخبار العمومية بكفر طهرمس جيزة، وله كتابات عديدة فى شئون المال والأعمال والربط وفك الربط وغيرها من الأمور الهامة التى لا يفهم فيها إلا قلة قليلة من الناس

وقد اصطفاه الحاج من بين عشرات الترشيحات بسبب ما لمسه فخامة الحاج بنفسه من ارتفاع معدل الولاء فى دم الأستاذ دلدلول إلى الحد الذى يبدو معه عند لقائه بالحاج كفتاة عذراء وهو الأمر الذى يحمده الحاج فى تابعيه وهو معيار هام لضمان استمرار فكر الحاج وتوجيهاته وبلوغ العزبة هدفها العام وهو دخول لألفية وهدفها الخاص وهو التقدم نحو الجاموسراطية.

ومن المنتظر أن يقوم الاستاذ بهلول بشغل منصب المستشار اعتبار من لحظة توقيع الحاج على البروتوكول الثانى من معاهدة حظر الروايح النووية التى وافق عليها أغلب زعماء العزب المجاورة وسيتتم بمقتضاها التفتيش على زرايب العزبة لضمان عدم صدور هذه الروايح

وبلوج الحاج يسعده أن يهنئ الاستاذ دلدول على ثقة الحاج ويسعده كل السعادة أن يكون منبارا لهذه الشخصية العظيمة

دموع رودي

2007-04-23T16:39:00.000-07:00

حبايب قلبيييييييييييي

اسفة على التأخير، الفرح قرب وتبعا بتستعدوا، قلت اسيبكوا تحدروا للفرح. انا عارفة انكوا فرحانين عشاني، بدليل اني بابي الحاج قال لي انكوا بتعملوا بستكتاب عشان تلموا تمن الفستان، ما قدرتش اكاوم ماي تيرز..سوري دموعي يعني، حتى بصوا الصورة، ده لما عرفت ان شعب العيزبة كلو بيحبني موت موت موت، وان كلكوا مسممين توسوا اكبر بيت ازياء فى باغى عشان يعمل لي الودينج جاون على حسابكوا

كمان ميرسي كتير لشعب سكان جزيرة الشعرور اللي اتبرعوا بالجزيرة بتاعتهم عشاني، صحيح سمعت ان فيه كلة مغردة كانت مش عايزة تخلي الجزيرة بس سحابي بتوع الشرتة اتسدوا ليهم

ام سو اكسايتد

مش عارفة كل مشاعر الحب دي ح اوديها فين؟

عموما دي برده تلعت في مسلحة سكان الجزيرة..عشان نيتهم كويسة خالس، ربنا كافئهم، تلعوا برة الجزيرة دي اللي مش فيها مية ولا نور ولا حاجة حلوة، انا لما سألت جيمي ماي فيانسيه: مش حرام انهم يسيبوا الجزيرة ويروحوا فين؟

قال لي: دارلنج...سكان الجزيرة ح يسيبوا الجزيرة الديئة دي...ويعيشوا في مكان اوسع، بعد ما كانت الجزيرة بس هي اللي بتاعتهم العيزبة كلها بقت بتاعتهم، يقدروا يختارو اشيك شارع في العيزبة ويناموا فيه زي اغنية اديني الفلوت عشان نغني بتاعة المتربة العربية دي المشهورة مش عارفة اسمها ايه...آه اسمها دايموند تقريبا

دي احلى حياة

يناموا ويسحوا على نور الشمس التبيعي، ويشموا الهوا السحي بتاع الشارع احسن من الاير كونديشن اللي مش سحي خالس
يعني هم حياتهم ح تبقى احسن من حياتنا، كمان ح ياكلوا من التبيعة مش اكل تالع من الميكرو ويف

الحقيقة، انا بقيت مبسوتة قوي ان كل انسان بيعمل خير، حتى اللي مش عايز يعمله البوليس بيجبره عشان مسلحته انه يعمل خير، وبيلاقي البونس على تول

Such a beautiful Eizba

باي فور ناو

الحاج يؤكد أن من يعارضون قانون مكافحة الإرهاب لا يفهمون المحراك السياسى بمعناته الصحيح

2007-04-23T03:02:00.000-07:00

فى حديث من القلب للبلوج قال فخامة الحاج‏‏ إن كل هدفه ومسئوليته هو تأمين المواطن والشعب في قوته ورزقه وحياته وأمنه وأمانه‏.‏ وأكد أنه لا يستطيع أن يترك أي إرهابي يقوم بأي أعمال من شأنها أن تضر بالاستثمار‏ والمشروعات بتاع جمال واصحابه فى العزبة لأنها ستزيد معدلات البطالة فى العزبة‏.‏
وحذر الحاج محمد حسني من أن الإرهاب لايزال قويا جدا‏,‏ ويزداد بفظاعة‏، وأنه حينما دعا لعقد مؤتمر بين العزب لمكافحة الإرهاب في الثمانينيات‏،‏ لم يكن أحد في ذلك الوقت يدرك حجم خطورته‏، مشيرا إلي أنه عندما بدأنا في تعديل الدستور،‏ انتقد البعض التعديلات، موضحا أنه كان لدينا حالة الطوارئ التي تشمل تطبيقاتها مجالات واسعة جدا‏ وبرغم ذلك لم تكن في غير موقعها‏,‏ مؤكدا أننا سنلغي حالة الطوارئ ونحدد الإرهاب وهنأ كمال الشتمونى وأحسن شرور على توصلهما لتعريف واضح وقطعى للإرهاب (أنظر تدوينة 17 إبريل) وقال أننا سنتعامل معه ونكافحه، ونضرب بيد من حديد على ممارسيه، من خلال القانون الجديد،‏ لأننا لو لم نتعامل مع الإرهاب ونكافحه‏‏ فإنني أخشي علي حالة الاستقرار في البلد.‏
وقال الحاج إن البعض من جعرات العزبة لا يفهم المحراك السياسي بمعناه الصحيح،‏ وإننا لا نهدف إطلاقا إلي مضايقة أحد، ولا قطع عيش أحد وشدد جلالته قائلاً فى تكرار يوضح المعنى ويؤكده كل هدفي ومسئوليتي هو تأمين المواطن والشعب في قوته ورزقه وحياته وأمنه وأمانه‏، نحن لا نعمل شيئا لمضايقة الفلاحين وهما دول حد يقدر يضايقهم دولم جبلات بعيد عنك، ومن يطلق شائعات بأن الغرض من تعديل مادة في الدستور يهدف إلي فسفسطة‏ وكتر كلام،‏ فالحقيقة كما أقولها ولا يقولها سواي وأؤكدها أمامكم أنني أهدف إلي تأمين المواطن‏‏ وإن من ينوي القيام بعمل إرهابي‏‏ لايمكن أن نتركه، ليه؟ لأنه بيضر بمصلحة البلد والاستثمار‏‏ ويهز فى الاستقرار‏,‏ فتزداد البطالة ويمنع فرص العمل‏.‏

الحاج يوقع على قانون مكافحة الارهاب

2007-04-22T08:01:00.000-07:00

بيان صحفى من الحاج يوسف موافقة وكيل مجلس الركش والمتحدث الرسمى

فى خطوة تاريخية قام صاحب الاحترام عالى المقام فخامة الحاج ابو جمال الهمام بالتأشير والموافقة على إصدار قانون مكافحة الارهاب لزجر ولاد الحرام وذلك بعد ان وضع مجلس الركش الأعلى بصمته الاخيرة على شكل الورقة اللى كتب عليه القانون وقرر فى سابقة غير مسبوقة تغيير حجم ونوع الفونت المكتوب به القانون بعد أن ساد الجدل واحتدت النقاشات حتى ساعات متأخرة من الليل حول هذا الموضوع الحيوى، و عليه تقرر كتابه نص القانون على ورق بمبى مسخسخ وأن يكتب بفونت أكبر وكذلك أن يحمل شعار العزبة و صورة الحاج بجوار صورة المحروس جمال بيه ربنا يخليهولنا

و قد نقل اعضاء المجلس أوراق القانون للدوار الاخضرفى عربة كارو مصفحة تحسبا لوقوع أى حركة قرعة يشنها ارهابيو العزبة الذين لازالو هاربين، وفى إشارة واضحه على تحمله مشاق العمودية حتى آخر رمق شرفنا الحاج بالتوقيع علي القانون و اقراره رغم أن الحاج أبو جمال كرم الله خطاه ، قد قطع مكالمة موبيل هامة مع شقيق من عمد العزب جرى فيها حوار هام يتعلق بالمصالح العليا للعزبة ولم الشمل العزبوى وعبر الحاج عن فرحته بالقانون وقال فى حينه انه إذ يقطع المكالمة الهامة على الرغم من دخوله فى الدقيقة التانيه فإنه يفعل ذلك من منطلق حرصه البالغ من أسبوع بس على مصلحة مواطني العزبة وصيانه حرياتهم

أبراهيم أبو عيسى أول من يطبق عليه القانون

ومن جانب آخر وحرصا على الشفافية و اللى دايما حريص عليها الحاج جمال ننشر لأول مرة صورة زنكوعراضية تداولها غفر العزبة و تم توزيعها على المواطنيين بشكل سرى مع وعد بمكافئة مقعد فى مجلس الركش المتوقر ، فى تطوير جديد لمرحلة ما بعد قانون الارهاب ان اللى يدخل مجلس الركش بس اللى خايف على مصلحة عزبتنا و بيحارب و يرشد على الأرهاب و الأرهابيين ، و تنتظر ابراهيم ابو عيسى عقوبة متغلظة قوى بعد ما ارشد عليه الواد فتحى أبن فاطنه و اللى تمت دعوته للدوار الاخضر لمقابلة الحاج فى خلال ايام

القبض على الإرهابى إبراهيم إبن أبو عيسى

2007-04-22T02:40:00.000-07:00

وقع أخيرا فى أيدى قوات الغفر النظامية الشقى الهارب والإرهابى الآبق إبراهيم إبن أبو عيسى وهو من الأوباش الذين خرجوا عن العهد ولطخوا الثوب الأبيض للعزبة وسلامها وأمنها بحقدهم الأسود وتبطرهم على النعمة التى ترفل فيها العزبة فى ظل القيادة الحكيمة لجلالة الحاج أبو جمال. وابن أبو عيسى سيكون هو أول من يطبق عليهم قانون الإرهاب حال إقراره من مجلس الركش، خصوصا وقد انتهت المداولات الشعبية التى قادها الحاج كمال الشتمونى لإرسال برقية شكر للحاج على فكره الثاقب ورعايته الكريمة لحقوق المواطن وسهره الدائم من أجل محدودى الدخل فى العزبة، وإرسال برقية مماثلة لراعى الحقوق المدنية الأستاذ جمال إبن فخامة الحاج

وقد صرح حبقه العوطلى كبير الغفر وحامى السلام الاجتماعى فى ضوء رعاية وتوجيه الحاج بأن كافة المتآمرين والمتمردين من أولاد أبو عيسى والمخذولين من المتعاطفين معهم ومن خرجوا على الشرعية من شبان غرغر بهم الشيطان سوف يلقون محاكمة عادلة فى ظل الاحكام الجديدة التى حددها قانون الوطنية المعروف بقانون مكافحة الإرهاب، وأكد على أن قوات الغفر النظامية ستضرب بيد من حديد على كل من توسل له نفسه الإضرار بأمن العزبة

الاستعدادات لفرح جمال ورودى على أشدها

2007-04-19T22:57:00.000-07:00

كتب بلبع

قرار من جلالة الحاج بمناسبة قران المحروس جمال بيه ستقام الافراح الرسمية ابتداء من يوم أربعه وعشرين فى عزبتنا العامرة

وسوف يتم تجنيد مئتى فتى وفتاة ليكونو الوجه المشرف لعزبتنا أمام الضيوف الأجانب والعرب والعزباوية الآتين من أنحاء العالم أجمع، وستعقد الاختبارات بالدوار وستشرف عليها لجنة برئاسة المصونة وعضوية خضرة بنت أبو حسين وفاروج بن حسونه بتاع المكتبة ونحمده البلقصى الماشطة الرسمية للحاجة

فعلى الشباب التقدم لهذا العمل الوطنى النبيل

يذكر أن جموع الشعب التى هلت على ادوار الأخضر مهنئة ومبايعة قد طلبت من الحاج أن يمنحهم شرف شراء فستان العروسة التى ستتوجه إلى باغى على رأس وفد شعبى ورسمى رفيع المستوى لتنقية الفستان الذى سيفتح اكتتاب عام لتغطية تكاليفه

وسنوافيكم بأخبار الاستعدادات فى حينه

رودي تتفركد حكوك المرأة والتفل

2007-04-19T07:58:00.000-07:00

أنا تول الليل امبارح باعيت، ما كنتش أعرف إن حالة الاكتسادية لشعب العيزبة فزيع كده

مش كنت أعرف إن ماني بيبول آر فيري بوووور

بالذات الستات، مع إن حماتي قالت إنها ح تخلي الستات يبقوا جدجز، لما سألت عن الترجمة بالعربي قالوا لي ح تبقى شيخة حارة.

أنا مش بأحبهم شيوخات الحارات دول، مش تفهموني غلت وتفتكروني تبكية، بس أنا مش بأحبهم عشان بيقعدوا في الشارع وبيعتلوا الترافك، وكذا مرة أتأخر على مواعيد الجيم في النادي عشان هم بيعملوا استعسامات.

لما سألت يعني إيه استعسامات قالوا لي يعني بيناموا في الشارع، قلت لهم ليه مش عندهم بيوتات؟ قالوا لي هم تفشانين من البيوتات عشان مراتاتهم مزعلاهم.

مش معقولة يعني كمان بابي الحاج ح يسالحهم على مراتاتهم كمان، والمفرود إنهم شيوخين حارات عشان يسالحوا الناس مش يناموا في الشارع زي الهيبيز، ده دد تكاليد العيزبة.

المهم، امبارح رحت نادي الحظيرة، وشفت ستات فقرات جدا، تسوروا، سوزي ماسكة الشنتة بتاعة الشهر اللي فات، ولما سألتها دي كارتيه أسلي وللا لا وشوشتني في ودناتي وقالت لي: ما تقوليش لحد إنها مش أسلي.

مش كان معاها غير ألفين دولار بس عشان تشتري التقليد بتاع الأسلي من باغي.

وعرفت إن ستات كتيرات في النادي بيتروا يشتروا من سان مايكل ومش بيعرفوا يشتروا حاجاتهم من هارودز، وساعات بيشتروا الحاجات الرخيسة اللي في باغي، حتى ولادهم مش بيعرفوا يشتروا الشيكولا من سويسرا، بيشتروا لهم الشيكولا من ألمانيا عشان أرخس، حتى الجوليريز...مجوهرات يعني...تسوروا مش لي لي اشترت خاتم بميتين ألف دولار بس وكان نفسها موت في خاتم تاني وجوزها مش ردي؟ مع إنه مش غالي خالس...750 ألف يورو بس...للدرجة دي جوز لي لي عنده ازمة اكتسادية؟ أمال فين كيادة العيزبة الرشيدة عشان تنكز الناس من الفقر الفزيع ده؟

إزاي حماتي امبارح واز كليمنج إن الستات أخدوا حقوقهم؟

وإيه أهمية إنها تبقى جدج إذا ما كانتش عارفة تشتري غير شنت تقليد كارتيه؟ ولا عارفة تبقى جود مذر...تسوروا فافي جابت كل هدوم هير كيدز من لندن وما عرفتش تشتري أي حاجة من باغي؟

ايه احساس التفل المسكين لما يروح باغي ومش يعرف يشتري منها حاجة خالس...فافي بتقول لي انها اترت غسب عنها ما تروحش باغي خالس السنة دي..

لوسي كانت بتعيت امبارح وهي بتحكي لي انها ح تسيف مع الولاد في المسيف البيئة ده اللي اسمه مكارينا، في الساحل الهلالي. مش ح تعرف تسيف في اوروبا السنة دي مش قادرة امسك دموعي

إهئ إهئ إهئ

مش باقدر استحمل البفرتي واحساس الناس انهم محتاجين حاجات درورية ومش عارفين يشتروها

لوسي بتقول لي انها مش عايزة تسافر اوروبا السنة دي لان جاكي هير هازبند ح يعمل اوبن هارت في لندن، وهي خايفة على مشاعر الاولاد..عشان كده ح تاخدهم مكارينا...تسوروا السفرينج..اسدي المعناة اللي يعانيها اتفال ابرياء

التفل مدام جه الدنيا لازم ياخد أول هيز رايتس، أنا ح اكلم ماي مذر إن لو...وإزا مش حلت المشكلة دي..أنا ح اقدم شكوى لهيئة العيزب المتحدة ..الديبارتمنت بتاع حكوك التفل.

القصيدة الخضراء

2007-04-18T23:34:00.000-07:00

يا أيها الحاج الذى راحتــــــــه قامت فى العلياء مـقام الغيــث
أياديك البيضاء قد خرت علي كالســـــيل مرة ومرات بالبلهفى
وأقسم أنى ما سأمت وما كرهت بل زادت فيا صبابة الوصلى
إن ريباك فينا باق يا حـــاج نذكره ما حــــيينا أبدا الدهــــــرى
وضربك أقفاؤنا شاق لكــــنه كان كمــــــــبضع الجراح يشفى
العزبة الخــــــضراء جاءت مبايــعة فلا تردها ياحاج وأمضى
على بركة الله بيان الحرية وقانون الوطنية المسطور بالحقى
أبو جمالا إن عزبتـــك قد خطـــت ألفية قديمة غابت فى الردى
وهاهى بفكر جيل من نبتك الأصــــــيل قد مضت سامـقة لألفى
ألف جديدة تعرف من فكرك الحق والإنسان وكرامـــة الأصلى
جاءنا به جمـــــال بيه نجلك بهى الطلعة الحييى شقيق البدرى
ورودى التى هامــت ببهاءها عزبتــــــــــــنا تنير قلوب الخلقى
تسير الهـــــــــوينى كغــزال على خطى المصونة بنت الحسبى
والكـــل يا حاج فى كــــــــنفك يرعى فى سلام لهذا العالم يكفى

هذه القصيدة أهداها الشاعر الكبير أبو المعاطى حجازى بعد أن قرأ مسودة قانون مكافحة الإرهاب بالبلد وما استحدثه فى مجال الحريات وقد صرح لبلوج أبو جمال بأنه سيلقى هذه القصيدة أمام الحاج فى الدوار الأخضر مساء اليوم وسيصحبه جموع غفيرة تجدد البيعة وتعلن الولاء وقال إن جموع شعب العزبة ستوافقدون قيد أو شرط على كل ما يراه الحاج فى مصلحة العزبة

رودي تكتب عن أهمية الدور السكافي في النهدة

2007-04-18T05:57:00.000-07:00

أنا مرهكة قوي من خناقة امبارح، بس انا كوميتيد للريسبونسيبيلتيز الملكاه على عاتكي

حلوة الكلمة دي؟ اتعلمتها من الناس المسكفة اللي بقيت اقعد معاهم

اسل جيمي ماي فيانسيه قال لي اني عشان افهم اكتر مش كفاية تو منجل ويذ بيبول

او حتى مش لازم اساسا اعمل المنجل ده واوسخ نفسي

خسوسا اني لاحزت ان العيزبة الناس اللي فيها مش بياخدوا شاور ابدا

بس برده لازم اتفركدهم، بس فعلا لما قعدت مع الناس المسكفين فهمت حاجات كتير

ولقيت انسرز كتير للاسئلة اللي بتدور في ماي ليتل هيد

يعني لما نزلت ذا ستريت لاحزت ان فيه اتفال كتير هربانين من المدرسة، ولابسين هدوم مش نديفة خالس

وايديهم مش نديفة وعليها ستينز سودا كده، وبيخبتوا على ازاز العربية وبعدين يقولوا عايزين ناكل

حاجة فيري سترانج، تيب ما ياكلوا هو انا قلت لهم ما تاكلوش؟

سألت شوفير بتاعي قال لي انهم بيبقوا اساسا وزنهم زايد ومامي والمدرسة بيبقوا عاملين لهم دايت كاسي، عشان تبعا السمنة غلت في السن السغير زي ما انتوا عارفين. وهم عشان ولاد نوتي بيهربوا وياخدوا اكل من الناس في الشارع؛ شيكولا وبسكوي وفرنش فرايز وكل الجانك فود اللي بيسبب السمنة.

تبعا حاجة زي دي لازم يبقى عليها ركابة، الاولاد السغيرين في العيزبة لازم تو ستيك ويذ الدايت اللي معمول لهم، احنا عايزين العيزبة تنافس في الاوليمبيكس. عايزين نحقق مستوى كويس ونوسل لكاس العالم، ولازم كل الولاد السغيرين نعمل لهم ريهابيليتاشن، عشان يبقوا رياديين.

بس ليه الاتفال بيتهربوا من الدايت في المدرسة والبيت وليه فيه ناس بتديهم اكل وفلوس وتشجعهم على الغلت؟

ماي فيانسيه اخدني وقعدني مع ناس مسكفين عندهم بيرسبشن وفاهمين العيزبة اكتر مني، زي زكي لحلح الطبال العظيم، وسنية اقرصني في فخدي الفنانة الكبيرة، والكاتب والثينكر الكبير مؤلف أغنية أنا قوم بالليل لأ عزيز هالهوتة.

كل دول فهموني إن الدي إن إيه بتاع أهل العيزبة فيه مشكلة، واحنا بنحاول نعالجهم، بيقولوا لي إنه سبت علميا، من خلال البحس اللي كتبه عالم العيزبة الكبير صموط بوسني واخلع، إن الدي إن إيه بتاع أهل العيزبة مليان حشرات ورابش، وإن الفجعة والتسول مسألة وراسية من أيام جدهم الكبير هرموتة أبو لولا، وإن التريئة الوحيدة لعلاج المرد الوراسي اللعين ده، هو إنهم كل ما يتفجعوا نجوعهم أكتر، وكل ما يتسولوا ندربهم جامد جامد، وإن ده مش دد الهيومان رايتس، لأنه شكل من أشكال العلاج، وإن ساعات كتير المواتنين في العيزبة بيحتاجوا للعلاج بالإليكتريستي الكهربا يعني، لمسلحتهم.

يا سلام، أنا مبسوتة قوي عشان حاسة إن ماي مايند إز جروينج، حاسة إن عقلي بيكبر لأني باتعلم من المسكفين وبافهم منهم تفسير وعلاج الفينومينا..أو سوري..اسدي الزواهر يعني...الوحشة اللي باشوفها في العيزبة.

وبعدين، السادة المتابعين لإزاعة العيزبة، لازم ياخدوا كورس في الإنجلش عشان نعرف نتواسل بشكل مور سيفيلايزد. بلاش جهل بقى.

لازم تكاوموا الرغبة في الجهل اللي موجودة في الدي إن إيه بتاعكوا.

حوالين تاريخ اعضاء مجلس الركش الموقر

2007-04-18T02:55:00.000-07:00

سامعين طراطيش كلام كدة اهو حوالين سمعة اعضاء مجلس الركش الموقر اللى يجول العضو دة ابصر ايه كان بياع بليلة و اللى يجول العضو دة مدرك ايه كان كان بيرص للحاج الكبير حجارة الجوزة علشان إكده دخل المجلس ، و احب كدة فى مبتدى الجول بعد ما الحاج اختارنى و اصطفانى و جعدنى و رحرحنى على كرسى وكالة بلح المجلس انى ارد على العيال ام لسان زالف دى و ارجع كل واحد داره ودانه مدلدلة و ساحبها وراه اتنين جدعان من ع الجهوة من الكسوف
انى عايز نفر واحد يدلنى بس على واحد من اعضاء ركش المجلس كانت شغلانته مش ولابد دول ناس اكابر جوى فيهم اللى جريب ربة الصون و العفاف الحاجة الكبيرة بذات نفسيتها و فيهم اللى كان مع الحاج الكبير ايام ماكان بيخدم فى الأورنص فى الناحية الشرجية يعنى نسور ولاد نسور و من غيرهم و لا نسوى رابطة برسيم
و احنا كلاتنا عارفين من اللى جاى للكل فى العزبة على الوجيعة وواقفينلهم زى اللجمة الناشفة فى الزور ، أصحاب البيه الصغير ربنا يحرسهلنا و يدخله سالم غانم على عروسته يا قادر يا كريم و يرد كيد الاعادى اللى بيجولوا كلام مش ولابد على رجولته
و كل صحابة دول عايزين مصلحة العزبة و بيتاجروا عشان خاطرها على راسهم الحاج أحزن فز كبير تجار و محتكر أقراص الجلة ف الناحية كلاتها طب جولولى انتوا نستغنى عنه ازاى ده ، الناس دى يا عالم شغالة علشان مصلحتكوا و كل اللى بيطبخوه من قرارات و جوانين فى مطبخ المجلس علشان خاطر عيونكوا و معدتكوا
و الحاج الكبير حالف و راسه و الف طالوش انه يلم العيال الى بتروج الاشاعات دى و على راسهم الخط أبو عيسى و أعوانه اللى ماليين العزبة زيطة وجاعدين يشنعوا على المجلس بكلام بطال

و عاشلنا الحاج و ابنه جمال و ابن ابنه جمال و كل العيلة و السلسال لحد أخر نفس

حد خد باله من البلوجات المضروبة بتاع أبو جمال

2007-04-18T01:30:00.000-07:00

بدأت تنتشر فى نواحى البلايج بلوجات مضروبة تزعم أنها تعبر عن عزبة الحاج أبو جمال ودى بلايج نص لبه وتايوانى ومن المعروف أن حقوق البث م العزبة حصريا يحتكرها بلوج أبو جمال إدارة بلبع الرغاى المراسل الوحيد داخل الدوار الأخضر وسوف يقوم بلوج عزبة الحاج أبو جمال باتخاذ كافة الإجراءات القانونية ضد كل من توسل له نفسه إدعاء تمثيل العزبة دون تصريح مسبق م الحاج، هذا وقد أكد بلبع الرغاى أن أخذ أى مواد عن البلوج متاح للكافة بشرط وحيد هو التصريح بالمصدر العلنى والوحيد للتعبير عن شعب العزبة وهو بلوج أبو جمال وهذا شرط عادل وبسيط جداً أما عمل فروع وهمية أو بلوجات فرعية فهو ما نعلن تبرؤنا منه جملة وتفصيلا وجاهزاً
هذا وقد لزم التنويه

قانون الوطنية ومكافحة الإرهاب يطرح للنقاش العام

2007-04-17T22:36:00.000-07:00

فى بيان صحفى مشترك بين مجلس الركش وقعدة السياسيات أعلن السيد يوسف موافقة طرح قانون المواطنة والوطنية فى العزبة الشهير بقانون الإرهاب للنقاش العام تمهيدا لعرضه على البرلمان والدوار الأخضر لإقراره، وقد حدد الحاج يوسف موافقة بعض أهم ملامح القانون فيما يلى:

توصلت العزبة لتعريف عالمى مهم للإرهاب

عرف القانون الإرهاب بأنه أى فعل فردى أو جماعى يقوم على مخالفة أوامر صريحة للحاج أو الترويج لهذه المخالفة أو حيازة مواد من شأنها دعم هذه المخالفة سواء أكانت مكتوبة أو شفاهية، والجدير بالذكر أن الحاج فى العادة لا يصدر أوامره مكتوبة فهو لا يحب الكتابة وإن كان يجيدها على عكس ما أشاع المغرضون ويفضل الإملاء بدلا منها أو توجيه أوامره المباشرة بنفسه للموظفين العموميين، والتعريف الجامع المانع هذا للأفعال المؤثمة وفق قانون الوطنية تحسدنا اليوم عليه أمم وشعوب وقبائل تاهت فى متاهة التعريفات والاختلاف الذى يشق الصفوف وكان فكر أبو جمال وحده سباق فهو منذ أواسط الثمانينات يدعو لمكافحة ظاهرة الارهاب على نطاق العالم الحلوة، واللائحة التنفيذية للقانون ستحدد شكل ومضمون هذه الأفعال وحالات التلبس بارتكابها واجراءات الضبط فيها والكيفية التى ستوقع بها العقوبة،

مؤسسة عقابية جديدة على غرار جونتانمو
ومن المتوقع فى هذا الصدد استحداث مؤسسة عقابية جديدة تحل محل زريبة الحاج لتوقيع العقوبات القائمة على الاحتجاز والحبس وقد تقدم بالفعل حبقه العوطلى بمشروع لانشاء هذه المؤسسة حدد فيه التجهيزات المطلوبة لانزال العقوبات ونزع الاعترافات على المتهمين بالارهاب ممن ثبتت جرائمهم أو ممن يعتقلوا تحت بند التحرى والتقصى، وهى تجهيزات تعنى استحداث أساليب إنسانية جديدة وآدمية عند توقيع العقوبات لا تقوم مثلا على الإفزاع باستخدام الكلاب الضالة المدربة على الهبش أو ممارسة إجراءات كسر العين التى قد تشمل هتك العرض من قبل الغفر وقد طرح مشروع المؤسسة العقابية التى تواكب الفكر الجمالى بديلا إنسانيا للافزاع بالكلاب الهابشة هو استخدام الطنجر وهى آلة شحن ناعمة ولا تحدث جروحا فى متلقى العقاب وتقوم فقط بدفع شحنة كهربائية متنوعة تدفعة للكلام دون إيذاء وتم تجاوز عقوبات هتك العرض باستخدام أساليب جديدة مستحدثه منها مثلا المنع من النوم والتعليق واستعيض عن قيام الغفر بهتك العرض بأنفسهم باستخدام عصى مقشات جلبت خصيصا من السودان تتميز بنعومة الحواف ومدهونة بمواد زيتية تخفف من أثر اختراقها للأماكن الحساسة وهو اسلوب سيستخدم على أضيق نطاق ووفق دليل عمل واضح لمنع تزيد أى نفر من الغفر فى استخدام هذه الوسيلة العقابية، ولم يحدد القانون بالطبع أى حدود على ممارسة الحاج لسلطاته العقابية بالأوامر المباشرة فهى أمور تدخل فى باب الأمن القومى ويوكل الشعب الحاج فى إقرارها وتفعيلها على الشكلو الصورة التى يراهما
لا مزيد من الضرب على القفا لأى مواطن
فى مجال عقوبات التأديبية اليومية التى يمارسها الغفر على الفلاحين من أجل إقرار الأمن وتحصيل الأموال العامة والتى تتم تتم دون محاكمة أو قرار مباشر من الحاج استحدث القانون مادة مفادها أنه لا يجوز الضرب على القفا إلا فى حالات استثنائية حددها القانون إجمالا حتى لا يترك لأحد مساحة للتوسع فى هذا الاجراء ومن هذه الاستثناءات، أن يتأخر أحد الفلاحين الأجرية عن دفع الاتاوة عن كل يوم عمل، أن يعلو صوت أحد الفلاحين على نفر من الغفر، أن يذكر أحدهم الحاج دون ألقاب معتمدة كفخامة وجلالة وسمو التى تذكر قبل اسم الحاج، أن يفتى أحدهم فى شئون العزبة بغير علم، أن يمر أحدهم على ظل غفير دون استئذانه، ويعاقب كل نفر قام بصفع مواطن على قفاه فى غير وجه استثنائى من الوجوه سالفة الذكر بخصم كوزين دره من راتبه وفى حالة تكرار هذه المخالفة مرتين فى اليوم يحال النفر للاستيداع بعد عقد مجلس صلاحية له، وفى غير هذه الأحوال يقتصر تأديب المواطنين الفلاحين على الصفع على الوجه براحة اليد الحرة دون استخدام أى أدوات صلبة أو عصى أو سياط أو ما شابه
لا انتهاك جسدى
واستحدث القانون مادة تلغى عادة دأبت عليها أجهزة العمودية وهى توقيع عقوبات على الفلاحين دون سند من قانون ودون حكم قضائى أو عمودى واضح وموقع باسم الشعب، وأحل مكانها مادة تقصر هذه العقوبات فى ناق ضيق ووفق الأحكام التى تقررها مجالس العزبة العرفية أو المحاكم العادية أو الاستثنائية التى تشكل بقرار من الحاج أو العقوبات التى تأتى بأمر مباشر من الحاج شخصيا يقرر فيه نوعية العقاب ومداه أو يوكل لأحد مساعديه القيام بهذا الأمر وفى غير هذه الأحوال الضيقة يمتنع على أى مسئول أو موظف فى الدوار الأخضر ومجالس القرية بمختلف أنواعها إنزال عقوبة من أى نوع على الفلاحين فى غير ما قررته مادة العقوبات التأديبية اليومية التى استحدثت إلغاء عقوبة القفا وإحلالها بالصفع على الخد

فكر جمال فكر جديد من أجل حرية المواطنين جميعا

وأكد يوسف موافقة أن هذه القوانين توضع لكى يعرف الأفراد حقوقهم ولكى تزع الناس بعضه عن بعض لتقر الحقوق وتخلص النوايا ويعم السلام الاجتماعى فى ربوع العزبة وأنها نتاج فكر خلاق ميز جيلا شابا يستعد لدخول معترك الحياة وتولى قيادة العزبة يقوم فكره على معانى التحرر الإنسانى من ربقة العبودية والاستغلال وانتهاك الكرامة الإنسانية. وحض الشعب على ممارسة حقه المشروع فى مناقشة هذه المواد لتحسينها ووضعها فى موضعها الصحيح مشيرا إلى أن المناقشات لن تخرج عما وجه إليه الحاج باعتبارها إرادة العمدة التى لا مرد لها بل استجابة وتوقير واعزاز لكبير حمل مشقة الحكم عبر عقود تحمل فيها الاعباء بكل الصدق والاخلاص والوطنية

مشروع قانون جديد لمكافحة الإرهاب فى العزبة

2007-04-17T22:34:00.000-07:00

كتب بلبع وهو فى غاية الدهشة لما يجرى من تطورات متلاحقة

عقد مجلس الركش ولجانه النوعية سلسلة من الاجتماعات شملت جلسات استماع لعدد من الخبراء المحليين والدوليين من المختصين فى مكافحة هذا الوباء المسمى بالارهاب والذى لم تعرفه قريتنا الآمنة منذ عصر المرحوم طيب الذكر الحاج حسنى الأول العمدة المؤسس، والذى طبق حالة الطوارئ على العزبة الآمنة لمجرد خطف نعجة من زريبته الآمنة، وعلو صوت إثنين من الأجريه طالبا بفتح صنبورالمياه بتاع الترعة القبلية لرى آراضى حوض عليوة قبل الحدائق العامرة لصاحبها فخامة الحاج وهما نفس المجرمان اللذان لقيا مصرعهما بعد ذلك إثر حريق جرن عليوه على ما أشاع المغرضون آنذاك وثبت بالتحريات التى أجرتها لجنة تحقيق متخصصة تابعة لقوات الغفر النظامية والمعروفة بأبوجماليارد أنهما راحا فى داهية فى حادث تحطم مروحية فى جزر الباهاماس، ومنذ هذا التاريخ وهذه الأحداث المؤسفة التى يعرفها أهل القرية لم تقع فى بلدتنا العامرة أى مظاهر لعدم الاستقرار أو الخروج على شرعية الحاج، بفضل التطبيق الحازم لحالة الطوارئ التى أشرف على حسن إدارتها لصالح المواطن سعات الحاج الصول حبقة العوطلى وأسلافه من قادة أبوجماليارد.

جمال وفكر تحررى للنهوض بالعزبة وشعبها

ومع وصول الفكر للعزبة بمجرد ظهور نجل الحاج فى الساحة السياسية دشن الأستاذ جمال عدة لجان ضمن قعدة السياسيات للنظر فى حالة الطوارئ ووضع بديل عصرى لها يضمن حقوق الفلاح المواطن فى الحصول على المرعى والكلأ فى ذات الوقت الذى يضمن فيه الحاج الشرعية والولاء وحسن سير العزبة وسلوكها وكذلك أمن زرايبه ومصادر المياه المتجددة.
وقد شهد العالم فى نفس التوقيت موجة عالمية فى ذات الاتجاه تسعى لتطبيق تشريعات واتخاذ إجراءات للحد من هذه الظاهرة الخطيرة التى باتت تهدد قواعد الاستقراض والسلم العالمى منذ أحداث تفجير وابور الجاز بناحية ميت الخولى عويس وشن حملة الحرب على الإرهاب.

مشروع قانون الوطنية تضعه مجموعة من كبار الخبراء

ومن هنا كلف المجلس برئاسة الحاج أحسن فتحى شرور لجنة برلمانية تشريعية مختصة يقودها الفقيه القانونى الفذ الحاج كمال الشتمونى عضو المجلس وصديق الحاج ومسئول رص الحجارة فى كافة قعداته الدولية ولقاءاته العامة. وقد خرجت اللجنة بعد عدة مدولات ولقاءات عقدتها فى جميع نواحى العزبة قبليها وبحريها بصياغة لمشروع القانون كاد الحاج يقرها ويعلنها من فرط اتساقها ومناسبتها لفكر الحاج الراقى المتجاوز لحدود القرية والذى وصفه الأستاذ معتز إبن الحاج كمال الأستاذ الجامعى ومؤسس علم الأبوجمالولجى بأنه النبراس الهادى للجموطراتية فى عالم تتكاثر فيه الضلالات كقطع الليل المظلم.

لكن تطورا جديدا قدم للعزبة تغييرا ثوريا

كاد الأمر يمر هكذا لولا التدخل الحاسم من راعى حقوق الشعب ومدشن حركة الحقوق المدنية بالعزبة وصاحب الفكر الأستاذ جمال بيه الذى قال للحاج يا أبتاه إن الشعب يرنو لحكمتكم وتمسكم بصون حقوقه ويطالب أن يشب اليوم عن الطوق ليقرر حريته بنفسه تحت إشراف جلالتكم، فهب الحاج صفوان شريف قائلاً، إن هم إلا عبيد إحسانات الحاج ورثهم كما تورث الإبل فى فيافى العرب، وهاهنا قال جمال كلمته الخالدة، والله يا حاج صفوان ياريت تسكت، وأضاف وقد أشرق وجهه بنور الكهربا، الشعب يا أبى يرى فيكم الحكم النبيل والسند القويم ويود اليوم لو يشارككم الحكم والمشورة، وساعتها هب الحاج واقفا وهو يصدر صوتا اشتهر به عند الغضب المشفوع بالاستنكار، فهدأت الحضور من روع الحاج وقالوا له لن يخرج جمال بيه ولدك عن طوعك ولتسمعه جيداً

حوار سيذكره التاريخ طويلاً

هاهنا أنصت الحاج وأطرق لكلمات الفكر التى استجدت على العزبة بوصول الوجه الشاب المعبر عن آمال القرية فى الدخول للآلفية والذى بادر والده قائلاً، ألم تكن أنت يوما فى موقعى وقررت أن ضرب الفلاح على قفاه من شأنه أن يورث فيه ضعف النظر وانحناءة الظهر بما يحول بينه وبين آداء عمله فى خدمة مراعينا وأطياننا، فأجابه الحاج بالإيجاب، فقال اليوم عادت العديد من الأشياء المرذولة التى نبهتنى لها إمراءة من الشعب فى إشارة بالغة الدلالة للمفكرة خضرة بنت أبو حسين التى وضعت لها مكانا سامقا فى قلب نجل الحاج، ولهذا أدعوك يا أبى باسم الحكمة التى ميزت عصرك والعدل الذى رسم ملامح عزبتنا عبر العقود التى توليت فيها سدة العمودية أن تعود إلى الشعب عند إقرار هذا القانون ليعرف القاصى والدانى أنه لا مزيد من قهر الأقفية وأن تحولا هاما فى الفكر والحركة قد طرأ على عزبتنا يدلل على جاموطراتيتها الوليدة وهو الاكتفاء بالصفع دون مس القفا من قبل الغفر وعدم احتجاز أى شخص إلا وفق قواعد محددة وليس بمجرد الاشتباه وتحويله لمحاكمة غفرية نسبة للغفر تحكم عملها ضوابط قضائية عسكرية لا يعرفها إلا معتقلى العالم الأول والدول المتقدمة ونذكر منهم على سبيل المثال أبناءنا فى جوانتانامو بكوريا الغربية،

العزبة تمضى بأمان نحو الجاموطراتية وحقوق النسوان والفلاحين

عندئذ أحس الحاج أن القرية فى أيدى أمينة لكنه لم يفصح عن دخيلته ولم يعجب الحوار قادة الحرس القديم فى العزبة وقال صفوان أبو شريف إن الأمر محل خلاف، فقام فخامة الحاج وهب واقفا وصفع الحاج صفوان الذى كان يرد على جمال بيه قائلاً إخرس يا عرص جمال بقى راجل، وأصدر فخامته الذى امتلأ من هذه المناقشة بالسرور والحبور وآمن أن العزبة ستكون فى يد أمينه من بعده قرارا بطرح قانون المواطنة والوطنية فى العزبة للنقاش العام تحت إشراف جمال بيه. وعقد أمله فى سميه ووريث عموديته ساكن الدوارا لاخضر الجديد جمال بيه وهتف فى الحضور متحديا إياهم وقال قولته الشهيرة أراهنكم على معزتين والأيام بينما

رودي (خضرة سابقا) ترصد سلبيات العيزبة

2007-04-17T06:59:00.000-07:00

ماني باد ثينجز..حاجات وحشة كتير شفتها في العيزبة، أنا مش فاهمة اللي قبلي كانت ساكتة عليها كومون..ازاي يعني؟ عموما كل ده هيتسلح.
يعني مثلا ما كنتش اعرف ان الاحوال وحشة كده في البيوتي سنترز اللي في العيزبة. أنا لمست ده ماي سلف.
تبعا أنا جمالي تبيعي مش عاملة بلاستيك سيرجري ولا كوزموتيك ولا حاجة، أنا بس باروح البيوتي سنترز عشان ابرز جمالي التبيعي، في باغي، كل العاملين في البيوتي سنتر هناك بيقولوا انهم مش بيتعبوا معايا خالس، من أول مختس زراعة الشعر، جراح التجميل، والمودموزيل بتاعة الليزر، والمدام مختسة شفط الدهون، والبنت بتاعة التاتو، كلهم كلهم بيقولوا ان جمالي تبيعي واني مش محتاجة غير لمسات بس، وانهم مش بيبذلوا مجهود معايا خالس لاني مش محتاجة.

بس المرة دي قلت مافيش داعي اختف السابو لحد فرنسا، خليني هنا في العيزبة عشان اتفركد احوالها، رحت السنتر وقاعدة بقى في السالون برة مستنية ادخل الجاكوزي، لقيت ساحبتي وحبيبتي "نوفي" داخلة مع "سوفيا" و"جيجي"، اول ما دخلوا تبعا: رودي حبيبتي الف مبروك يا روحي..انت جاية بقى عشان فرحك
مواه..مواه
قلت لهم: اهو قلت بقى كفاية سفر لباغي بقى وخليني هنا في العيزبة
راحت نوفي دحكت دحكة خبيثة وقالت: اه بقى ما انت لازم تستعدي للريسبونسيبليتيز اللي جاية.
سوفيا وجيجي: هئ هئ هئ
أنا: باردون..اسل كنت باقرا في المجازين مودوع يجنن عن البلاستك سيرجري..رغم اني مش مهتمة بيها انتوا عارفين بقى.
وهم بيقعدوا جنبي جيجي قالت: آه تبعا عارفين..ما عملتيش غير سبعة وخمسين واحدة بس
ولأني كلاسي ومتربية في مدرسة ايتون عملت نفسي مش سامعة
نوفي: قولي لي يا رودي...هو الفيانسيه بتاعك اكبر منك بكام سنة؟
أنا: انتي تديله كام سنة؟ ده فيه ناس بيفتكروه تمانية وعشرين سنة..
نوفي: هئ هئ هئ..ممكن برده..بس انا كنت سمعت انه شاف تانط وهي بتعمل دايفينج واعجب بيها ولما راح يختبها من اونكل وبقى الموكف محرج اضطر يختبك ويور دادي قال له اهي تتربى على ايدك
كلهم: هئ هئ هئ...كركر كركر كركر
ازن انا سكت كتير، لازم اوقفهم عند حدهم، انا ما حسيتش بنفسي غير وانا واقفة وباقول: جرى ايه يا ولية يا مقرحة يا بايشة يا بايرة منك ليها...هو عشان ما انتوا عنستوا قاعدين تاكلوا وتنكتوا في نفسكوا؟
نوفي: إيه ده؟ انت بتسقفي بالسابو بتاعك كده ليه؟
أنا: سابو؟ سابو ايه يا مرة يا ممحونة..ده اللي امك بتقول عليه قبقاب..مش عارفاه، اللي قبل ما ربنا ينفخ في صورتك كنتي بتروحي بيه حمام التلات عشان يفركوا الجلخ من على جتتك ويعبوه في افف ويبعتوها للبنزينة يطلعوا منه زيت عربيات وتشحيم...خشي في عبي يا اختي خشي
مدير السنتر: يا مودموزيل رودي ده مكان محترم
أنا: ولما هو مكان محترم يا مزين الحمير سامعها وهي قاعدة تلبن عليا بالكلام وقاعد تضحك من تحت لتحت ليه ....قال سنتر قال...ده انت بتقلبه بالليل معلف للبهايم اللي بتحلق لها يا اجرب
مدير السنتر: لو سمحتي يا مودموزيل نوفي امشي من وشها دلوقت
أنا: نوفي؟ دي نفيسة..نفيسة بنت تفيدة الخياطة اللي اخرها تلفق ديل الجاموسة وبعد ما لفت كعب داير على رجالة مجلس العزبة بقت صاحبة بيت ازياء فيدي..الله يرحمه...كانوا بيشيلوا قشف كعبه بالساطور...وريني باروكتك يا قرعة
نوفي: آآآآآآآآآآآآآآآآآآآآآآه
أنا: لولولولولولولييييييييييييييييي
=========
بيقولوا انها في الاوبيتال دلوقت، حسل لها تيربون في راسها
أنا ما كنتش اعرف انهم بيفتحوا السنترز للناس البيئة دي، لولا اني كلاسي كنت عملت لها مهدر في البوليس ستاشن، مش عيب إنهم يبقوا من أسل بسيت، بس لازم يتعلموا المانرز، أنا عرفت دلوقت حل المشكلة دي، أنا ح اعمل مشروع: المانرز للجميع، وممكن نترجمها للعربي: الإتيكيت للجميع، عشان يتعلموا، وبعدين لازم نحت أيتم المانرز في الباتريوت آكت بتاعنا، أوه سوري، ثانية واحدة أسأل عن الترجمة...أيوة عرفتها، لازم نحت الحتة بتاعة الاتيكيت في كانون مكافحة الكباب، اللي مش عنده اتيكيت يتحت في جوانتانمو مخسوس عشان يتعلم جوة.

عشان الموكف اللي حسل معايا النهاردة، والناس البيئة اللي اتعردت لي ما تتعردش للمواتنين التانية، وتعلمهم قلة الادب

نسوان بلدي ما اتربوش

باي فور ناو.

تنويه حول المشاركة النسائية

2007-04-17T06:48:00.000-07:00

تساءل العديد من متابعى بلوج أبو جمال عن رسائل رودى البمبى، وقال بعض الخبثاء هل ستحكمنا النساء، ولهم وجه جمال بيه تعليقه قائلاً، الاخوة المواطنون الاخوات المواطنات‘ إننا نعيش اليوم مرحلة إنتقاليه تشهد تقلبات وتغيرات عالمية كبيرة ولابد لنا كعزبة تسعى نحو دخول الالفية من أوسع الأبواب أن نتفهم طبيعة حقوق الإنسان كحقوق عالمية وفى القلب منها حقوق النساء فى التعبير والمشاركة الكاملة للرجال، ومن هنا قررت بعد استشارة جلالة الحاج أن أفسح دورا أكبر لحرمنا المصون التى سنعقد عليها فى الرابع من مايو القادم فى الحياة العامة لتكون مبشرة وداعية للنهضة التى تقوم على أكتاف الرجال والنساء، ومن هنا اقترح السيد بلبع الرغاى مسئول الاعلام فى العزبة أن يكون هناك منبراً شعبيا تعبر منه المصونة القادمة خضرة بنت أبو حسين التى أدعوكم بمناداتها باسم رودى مجردا دون ألقاب فهو الاسم المحبب لديها بعد عودتها من رحلة العلاج بباريس لنزع الكيس الدهنى المفقفق فى قفاها من الصغر، ومن هنا بدأت تظهر تدويناتها التى تتناول فيها الاحوال من منظور متجدد وفعال ودينامى يرصد ويحلل ويضع الاسس والمسارات اللازمة لرأب الفجوة، وكذلك ارتأى الحاج أحسن فتحى أبو شرور أن تحصل خضره على عضوية مجلس الركش باعتبارها صوتا يمثل جموع الشابات فى عزبتنا العامرة ونموذجا للأجيال الشابة المنفتحه على العالم والتى دخلت بالفعل للألفية الجديدة، وهى نقلة كما ترون تشير لعصر جديد يأخذ الرجال فيه بأيدى النساء لعلى الذرة والشواشى السامقه من أجل نهضة تشمل الجميع فى هذا المجتمع المثالى، إننى أدعوكم للدخول معها فى حوارات جادة معمقة حول الأحوال والمسارات المستقبلية لعزبتنا وأرجو أن يتم ذلك من اليوم

أنا خضرة وممكن تقولوا لي رودي

2007-04-16T09:08:00.000-07:00

بون سواغ
كومون تاليفو
آه
باردون
قالوا لي ما تراسليش العيزبة بالفغانسيه
جود افتر نون
هاو ار يو؟
اوه سوري
يعني هاي بقى وخلاص، أنا خضرة بنوتة بابي هسين، وختيبة أونكل جيمي، سوري، قصدي مستر جيمي، أصل أنا كنت باقول له يا أونكل لحد ريسنت تايم..وقت قريب، سوري، مش يوزد إني أعبر بالعربي، بس أنا باهب العيزبة وأهل العيزبة وأتيان العيزبة وجاموسيات العيزبة وحمرة العيزبة وتورات العيزبة اللي بتقعد تلف دي عشان يجيبوا لنا هاجات هلوة.
تبعا أنا عارفة إن فيه ماني ثنجز..هاجات كتيرة يعني، في العزبة عايزة تتسلح، مش تشغلوا بالكوا، أنا ح أسلحها، بس آت ذا أبروبريت تايم، يعني في الوقت المناسب، تبعا أنا عارفة إن أهل العيزبة بيزعلوا وساعات بيعيتوا من حاجات وحشة كتير.
بس أنا كررت إني مش اقعد في البيت وأستنى الناس تقول لي حاجات عن العيزبة، وفعلا نزلت ذا ستريت أمنج ماي أون بيبول، هسيت باللي بيقولوا عليه في النيوز بيبرز ده، اللي هو فيه لحمة والشعب كوي وكده..آه؛ لحمة كوى الشعب، وشفت عيوب كتير، كان غيري ساكت عليها. ح اكلمكوا عنها في المراسلات اللي جاية.

ويت فور مي ماي دير عيزبة..باي فور ناو

يوسف موافقه وكيلاً لمجلس الركش

2007-04-16T06:56:00.000-07:00

كتب بلبع

فى قرار متوقع منذ عدة شهور أصدر فخامة الحاج اليوم قرارا تاريخيا ككل قراراته السابقة التى دشنت لعصر الجاموتراطيه فى العزبة قرر فيه تعيين المقدس يوسف زناجر الشهير بموافقه وكيلاً لمجلس الركش الذى يرأسه الحاج أحسن فتحى أبو شرور وقرر أيضا منحه لقب حاج وتعيينه متحدثا باسم المجلس

وقد جاء قرار الحاج مترافقا مع عدة تعديلات جوهرية أدخلها الحاج بنفسه فى المجلس وتغييرات طلب إجراءها على لائحته الداخلية لكى تسمح بمزيد من الشفافية والمشاركة ومراقبة الحكومة المزمع تشكيلها قريبا

المقدس يوسف موافقه هو مؤلف كتاب نزهة ابو جمال والأحباب فى الكشف عن حقيقة الخرم اللى بين السحاب وهو كتاب فى علم النفس الاندماجى حصل عليه المقدس يوسف على جائزة البغل الذهبى من إمارة بوناكو

وبلوج أبو جمال يحي بكل الصدق البرلمانى الفذ والعالم الجليل المقدس يوسف الحاج يوسف موافقه حاليا على جهوده العظيمة التى أولاها لمزرعة الحاج فى بلقص القبليه والتى كان من آثارها أن أولاه الحاج ثقته وعينه فى مجلس الركش ليجلس إلى جوار الاكابر ويفت مثلهم فى أمور عزبتنا الغاليه

الراقصة الغنائية لوبى اللولبية تحى حفل حنة جمال بيه

2007-04-13T22:23:00.000-07:00

كتب بلبع وهو فى غاية النشوه

تقرر أن تستمر أفراح البلد عشر ليالى بحالهم لأنه فرح غير عادى بتاع كبير الاكابر مش زى الفرح أبو تلت ايام اللى أى واحد فى العزبة بيعمل فيه حنه ليله ودخله ليله وصباحية ليله

فى فرح جمال بيه ربنا يديم أفراحه فى كل ليله سيتم جلب المداحين والراقصات وفرق المزمار من كل العزب المجاورة والموواوية والطبالين وفرقة حسب الله بتاع عب سلام النابولسى وخضرة محمد خضر وأبو دراع وهلما جره
وجمال بيه سخصيا عامل مفاجأة للعزبة وهايعزم صحابه الاكابر م البندر وهايجيبوله على حسابهم فنانين ومشخصاتية وآلاتيه م الكبار وأول اسم اتسرب لنا فى بلوج عزبة الاحاج ابو جمال هو اسم الراقصة الغنائية النارية اللولبية لوبى وهى راقصة عالمية م اللى مابيختشوش ولوبى اسمها ولهوش دعوة باللولب يا نسوان البلد ياللى مبتبطلوش مسك ف سية الخلق وصاحب جمال بيه حمد معز بتاع الخردة شاف نفسه معاها يومين زى ما بيقولو فعاوز ينفعها وجايبها ليلة الحنه بس البت إيه ماكدبش عليكم
زى ما عادل بيه ادهم بيقول
قيششششششششششششششششششششطه
افرحى يا عزبة الهم
وبيقولوا هايجى الواد الى بيرقص الاربعة اسموكيه ده الصغنن وبغلول بتاع العينب العينب العينب
واحتمال كبير البت الرقاصة بتاع النقط والسطوح وحط وماتحوطش دى اسمها ايه
وهو حد ينسى، لوسى طبعا سمير

يا خراشى يامه

إجراءات احتراسية استعدادا لفرح نجل فخامة العمدة

2007-04-13T22:17:00.000-07:00

كتب بلبع الرغاى من مقر قوات الغفر النظامية بداير الناحية

قرر السيد حبقة العوطلى كبير الغفر النظاميين وعديل فخامة الحاج اعتماد عدد من الاجراءات الاحتراسية وقال فى بيان له الآتى:

لقد قررنا بعد استشارة الحاج عافاه الله اعلان حالة طوارئ مؤقته لضمان سلامة العزبة من أى سوء خلال أفراحها ووقاية لها ومنعا لحاسديها ممن يدبرون لها بليل واحباطا لمخططاتهم بعد أن نما لعلمنا اقدام المدعو ابراهيم ابن ابو عيسى وتنظيمه الاخوانى الشيوعى المسلح بالشوم والذى يؤمه عدد من المارقين بالتحضير لسلسلة من الاضطرابات وأعمال الشغب لافساد أفراح العزبة المسالمة، وأكد عدد من العالمين بأبعاد المسألة أن ما يخطط له ابن ابو عيسى هو نتاج حسد وغل ترعرع عليهما منذ نعومة أظفاره وقد نشئه عليها والده المحبوس احتياطيسا فى جريمة سرقة علف معزة متولى الاعسر وعمه وخاله المحبوسين كذلك وهم من معتادى الاجرام وتجرى قوات الغفر حاليا بحثا موسعا عن سجلاتهم الاجرامية تمهيدا لتقديمهم لمحاكمة عادلة ولا حاجة لاثبات التهم طبعا فالقرية برمتهما تعرف من هم وما هى عمايلهم، وأكد اثنين من اقرانه ممن درسوا معه فى مدرسة بندر المناشى الثانوية الصناعية أنه قد كان يحلم بالارتباط بالمصونة القادمة خضرة بنت ابو حسين، وهو أمر فيه تهويل فكيف لهذا الفسل أن يفكر مجرد التفكير فى أمر مثل هذا، وأكدت خضرة أن الجعر ابن ابو عيسى قد دأب على الوقوف لها فى الطريق من بيتهم إلى حقلهم العامر ليردد على مسامعها الرهيفة كلمات الغزل التى تعبر عن سوء أدب وفساد تربية، وهو كلام لم ولن يقوله لها المتربى أحسن تربية وابن الاصول الاستاذ جمال بيه.

هذا ومن بين الاجراءات الاحتراسية التى لمسنا بدء تطبيقها:

- احتجاز عدد من عشيرة أبو عيسى والمناهرى وسلطان العفش والدوجرى لمدة خمسه واربعين يوم على ذمة الحاج وهى اكثر ذمم القرية اتساعا لحين الانتهاء من الافراح والليالى الملاح وهو تحفظ يخوله الدستور للحاج فى حالات استثناكية
- منع المواطنين خليفة معاطى وخلاف السيد من الخروج من منزلهما وايداعهما الاقامة الجبرية لما عرف عنهما من قيام بعض الحاسدين باستئجارهم لربط العرسان قبل الزواج قضا لفرحتهم وافسادا لعلاقتهم بازواجهم وربنا قال إن الجن يعلمون الخبثه ما يفرق بين المرء وزوجته
- دفع كل بيت فى البلد إردبين قمح وتمانين بيضة نقوط الفرح وتسليمهم للدوار فى موعد غاية تاريخه الاربعاء اللى جاى حتى يتسنى للعزبة الظهور بالمظهر اللائق فى الفرح وسد بق كل المدعوين الذين دأب بعضهم على التريقة من شح الحاج الذى هو فى أصله حرص على ثروة القرية
- شراء بنادق جديدة للغفر سعة عشر طلاقات عشان يبهججوا الفرح ويزيطوه بدلا من البندقية ويلسون أم طلقة واحدة اللى نصها زينة ولا الغفر بيعرفوا حتى يعمروها وسيقوم الحاج بالتوجه لمترى اسطفانوس لشراء هذه الصفقة ويذكر أن الحاج هو الوحيد المخول بقوة القانون والدستور لشراء الاسلحة من غير ما نقول بم ولا نراجعه فهذا أمر من أمور السيادة بتاع فخامة الحاج
- تعيين تمنتاشر غفير نظامى بنظام العقود المؤقتة لدة شهرين بمكافأة شاملة لدعم قوة الغفر النظامية والميزانية تسمح والحمد لله
- تحذير أهل القرية من التحضير لاحتفالات تخصهم فى هذا اليوم قصرا للفرحة على نجل العمدة وحده وعدم توزيعها على غيره، ومن هنا تغلق جميع محلات الحلاقة وتصادر مؤقتا جميع اللمبات والكلوبات والزينات لتستخدم فى فرح جمال بيه ويحظر على المطاهرين إجراء أى عمليات طهور فى هذا اليوم وستوقع أقصى العقوبه على المخالفين
-
وقد أكد سعاتت كبير الغفر أن جميع الاجراءات التى قررها جنابه تأتى موافقة لما قرره دستور العزبة فى تعديلاته الأخيرة، وأنه ليس هناك أعز من نجل فخامة العمدة كى تتخذ من أجله هذه الاجراءات الاحتراسية وأهاب بجموع أهل الاعزبة المحروسة التزام الحيطة والهدوء والابلاغ عن أى تحركات مريبة وأى معلومات من شأنها احباط محاولات زعزوعة الاستقرار

وتذكيرا للخلق فحالة الطوارئ الاستثناكية المعلنة لها قواعد حددها الدستور وستؤدى إلى التزام الناس بيوتهم من العشا حتى مطلع نهار اليوم التالى إلا من يستثنيكهم الحاج بقرار ممهور بتوقيعه هو لوحده سخصيا

أبو جمال يرد على افتراءات جلوبال فويسز

2007-04-12T08:09:00.000-07:00

بدأت تنتشر فى أجواء البلايج جمع بلوج حملة مغرضة بعد النجاح الذى حققه بلوج الحاج فى احداث التواصل بين الجماهير من القاعدة العريضة بالعزبة وجلالة الحاج شخصيا دون وسيط حتى أنا، وقد حملت هذه الحملة رائحة غير محببة وامتلأت باللمز والغمز على الحاج ولا ندرى ما أدخل عزب أخرى فى الموضوع ومحاولة القول بأن البلوج بيلقح على مصر ونحن من هذا القول براء، وعلى وسائل الاعلام توخى الحذر وعدم ترديد هذه الشائعات وقد وجهنا الحاج لسرعة الرد على كل من تسول له نفسه ترديد الأكاذيب وقد أرسلنا تكذيبا رسميا لجلوبال فويسز وعلى القائمة عدة مواقع أخرى تشير لهذا الأمر وهو لغط ومحض أفتراء، وقد أكد البيان الصادر عن الدوار الأخضر، من النهاردة هانقول عن مقر العمودية الدوار الاخضر، تمييزا له عن البيت الابيض وغيره من مقرات العمودية، المهم ورد إلينا من الدوار الاخضر بيانا أكد فيه الحاج دعوته لكافة وسائل الاعلام لتوخى الدقة عند استعراض اخبار العزبة والمحافظة على روح الاخوة بين عزبتنا وغيرها من العزب واحترام استقلال عزبتنا الفتراضية وسمعتها الدولية وعدم تشويهها

كما أرسل إنذار على يد اتنين محضرين للصحفى المغرض المدعو حسام الحملاوى صاحب بلوج عرباوى مطالبا اياه بازالة كافة الاكاذيب التى رددها فى استعراضه المقيت لعزبتنا رافضا سخريته من مظاهر المدنية التى بتنا نعيشها وقد أصدر الحاج أوامره بقطع رجله م العزبة والبلوج وقد بدأنا بالفعل وضع ذلك موضع التنفيذ وإن هوب الناحية يادى ياويله وسواد ليله

تحديث الجمعة اتناشر منه -- بعد تقدمه باعتذار رسمى لجلالة الحاج تقرر رفع اسم عرباوى من المحظور عليهم دخول البلوج بعد ثبوت حسن نيته ولأنه خواجه حبتين مفهمشى يعنى روح القيادة والحكم فى البلد وماكنش قصده يشنع ولا حاجة وسيجرى الحاج معاه قريبا حوار متوسع سيتناول فيه كل شئون العزبة والمنطقة بتاع العزب بحالها

بيان من فخامة العمدة بشان حالة الاضطراب التى شهدتها الناحية القبلية

2007-04-11T01:57:00.000-07:00

ألقى السيد جمال أمين قعدة السياسات و ابن فخامة الحاج ببيان مهم نيابة عن فخامة العمدة الذى غادر عصر اليوم العزبة متوجها إلى أبو النمرس فى زيارة عائلية خاصة، وذلك بشأن وقائع ماحدث فى الناحية القبلية وتعدى بعض الافراد من جماعة أبو عيسى مندور على قوات الغفر النظامية وقيامهم بقطع الطريق القبلى أمام حركة الكارتات وترديد سفهائهم لهتافات مناوئة لحكم الحاج وما ادعاه بعضهم من أن الحاج يحتضر على فراش الموت وأن هناك انقلاب دوار يقوده بعض أفراد العائلة، وهذا هو نص البيان الذى ألقاه جمال بيه فى مؤتمر صحفى عالمى حضره ممثلنا فى دوار أبو جمال بلبع الرغاى:

قامت فئة منحرفة وقلة ضالة محسوبة بالخطأ على هذه العزبة العزيزة وناسها الشرفاء صباح اليوم بأعمال شغب موسعة فى الناحية القبلية قاموا على أثرها بقطع الطريق القبلى وأشعلوا حطب القطن وعيدان الذرة الناشفة على قارعة الطريق وانطلق شبان منهم حاملين الشوم حيث يقف بعض من أفراد قوات الغفر النظامية يؤدون خدمتهم النظامية وأوسعوهم ضربا وحرقوا عجلتين رالى وعجلة هندى ميه اتنين وتلتين كما كسروا واجهة الوحدة الصحية ولطخوها بكتابات كريهة تنم عن حقارة نفوسهم وضآلة وخسة ما يرمون إليه من نشر الفزع وعدم الاستقرار فى عموم العزبة، وقامت على الفور قوة من الغفر والمخبرين والعسس بالتوجه لموقع الشغب وقاموا بمحاصرة هذه القلة المارقة وتبادلوا معهم الضرب بالشوم ووقع على أثر هذا اثنين من جماعة عيسى أبو مندور مصابين باصابات بالغة نقلوا على اثرها للوحدة الصحية كما كسر ذراع أحد أفراد الغفر وأصيب آخر بقطع فى إبهام اليد اليسرى وعولجا وخرجا فى نفس التوقيت، وقد تحفظت قوات الغفر على ثمانية من أفراد جماعة أبو عيسى تمهيدا لنقلهم للمركز وستوجه إليهم تهمة الشغب وتكدير الصفو العام وترديد هتافات من شأنها قلب نظام الحكم وحيازة أسلحة خطرة ومنشورات تحض على الفسوق والمروق والارهاب وهى كلها تهم تقع تحت طائلة قانون الارهاب الجديد فى أول تفعيل لنصوصه فى حماية أمن واستقرار عزبتنا الغالية.

ولازالت جهود الشرطة تجرى للقبض على المدعو إبراهيم ابن أبو عيسى مندور الذى أقر عدد من المقبوض عليهم بضلوعه فى الدعوة لهذا الشغب وتوجيهه والتحريض عليه كما أنه المتهم رقم واحد فى قضية إطلاق شائعة مرض الحاج. والمدعو ابراهيم ابوعيسى كان قد سبق الحكم عليه فى قضية مشابهه عام الفين واتنين وحكم عليه بالسجن لمدة خمسة اشهر ومنع من دخول العزبة لعام كامل حتى توسط بعض عقلاء جماعة ابو عيسى لاعادته اكراما لوالده المسن ورق قلب الحاج لهذا الطلب الانسانى وهو الذى تعودنا منه رقة القلب والاسى لمحدودى الدخل ورقيقى الحال وهو الذى يسهر ليله ويوصله بعمل نهاره من أجل هذه الفئة تحديدا، وعاد المدعو ابراهيم للقرية لكنه لم يحفظ الجميل وعاد لغيه وحرض عدد من اقاربه على المروق والخروج على الشرعية، وقد صدر قرار فخامة الحاج بنزعة المواطنة العزباوية عنه وقد قامت عشيرة ابوعيسى بالتبرؤ منه مؤكدين للحاج ولاءهم ومحبتهم الخالصة وقد تكفلوا بدفع كافة التعويضات واعادة الحال لما كان عليه فى المنطقة التى شهدت الاضطرابات. وسوف نوافيكم بأى مستجدات حين وصولها ونهيب بأهالى العزبة الابلاغ عن مكان وجود المدعو ابراهيم ابن ابوعيسى صاحب الصورة والاتصال بارقام دوار العمودية أو الاتصال بشيخ الغفر النظاميين الحاج حبقه العوطلى

الحاج يغادر العزبة عصر اليوم إلى أبو النمرس فى رحلة خاصة

2007-04-11T01:37:00.000-07:00

يستقل الحاج أبو جمال كارتته فى تمام الثالثة عصر اليوم فى رحلة خاصة يتوجه خلالها فخامة جلالة الحاج إلى أبو النمرس لقضاء إجازة خاصة نصحها بها أصدقاؤه نظرا لحالته النفسية وما ألم بفخامته من حزن على فراق شقيق روحه ورفيق دربه الحاج فرج أبو محمد، وسيقضى الحاج عدة أيام بأبو النمرس من المتوقع أن يقابل خلالها عدداً من رجال ومسئولى عزبة محمود شلبى التى تعود إليها جذور أخواله الأفاضل، وسيصحب الحاج فى هذه الزيارة عدد من القيادات الشعبية والتنفيذية من عزبة أبو جمال.

هذا وكانت المصونة الحاجة أم جمال سيدة العزبة الأولى قد سبقت فخامة الحاج ليلة أمس إلى أبو النمرس حيث تؤدى واجب مشاركة ليلة الحنة لبنت بنت اختها نرجس التى ستتزوج فى الغد، ومن المتوقع أن لا يشارك الحاج فى الفرح احتراما لذكرى صديقه الغالى الراحل.

وجدير بالذكر أن عركة بسيطة كانت قد جرت وقائعها عند الناحية القبلية بين عدد من الغفر النظاميين وأفراد من عائلة عيسى، وقد شهد شهود عمان بأن تبادلا للضرب بالشوم والحلل قد حدث بين خمسة من قوات الغفر النظامية وشابين من ناحية أبو عيسى مندور لم تحدد هويتهما، وقد لاذا بالفرار ولازالت الشرطة تلاحقهما، وأشار مصدر مسئول لاحتمال ارتباط هذه الواقعة بالجهود التى تبذلها قوات الغفر النظامية فى ملاحقة المجرمين الذين اطلقوا شائعة مرض الحاج وهددوا استقرار العزبة.

ولا زال البلوج فى انتظار بيان يوضح سير التحقيق وجهود التحرى والملاحقة وما آلت إليه وهل من شئ إيجابى سيوصلنا للقبض على مرتكبى الجريمة النكراء أعداء الوطن.

وداع مهيب للمناضل فرج أبو محمد فى جنازة تقدمها فخامة الحاج

2007-04-11T01:34:00.000-07:00

تابع بلبع الرغاى وقائعها المهيبة من داير الناحية

قام فخامة الحاج بآداء واجب العزاء فى المغفور له الحاج فرج أبو محمد وقال لبلوج عزبة الحاج أبو جمال وقد غلبه الأسى والحزن على فراق رفيق الدرب وزميل الكفاح، لقد فقدت عزبتنا اليوم رجل عظيم كان دوما مثالا للوطنية، شجاعا فى الحق، حمى أملاك العزبة بكل ما أوتى من خبرة قانونية وعلاقات نافذة على المستوى العزبوى بذل خلال حياته كل غال ونفيس منذ بدأ كغفير نظامى وحتى تبوأ أعلى المناصب فى العزبة وكان من نتاج جهوده العظيمة حماية حقوق الحاج وذريته من الضياع وهى حقوق العزبة كلها ومصادر نهضتها وتقدمها. وقد غادر الحاج العزاء سريعا نظرا لارتباطه بموعد هام، وهو ما حال بين تحيته لأهل القرية الحاضرين.

يأتى هذا تأكيدا على أكذوبة تردد صداها اليوم وسط الكثيرين ممن لم يروا الحاج إطلاقا فى الجنازة وحرصوا على حضور الجنازة من أولها لآخرها ومفادها أن الحاج لم يحضر لما ألم به من مرض، وهو استمرار فى ترديد شائعة مغرضة سرت منذ يويمن، وقد شكر منجى ابن الفقيد فرج أبو محمد الحاج لتشريفه الجنازة وقال إن تشريف الحاج لجنازة المرحوم سيكون فى ميزان حسنات المرحوم يوم الدين وسيرجح كفته لخول الجنة فالحاج من أهل الصلاح والتقوى ومن رافقهم حظى بنفحاتهم.

وقد نما إلى علمنا أن قوات الغفر النظامية تبذل قصارى جهدها حاليا فى ملاحقة عناصر الخراب وزعزعة الاستقرار فى العزبة الذين قاموا بإشاعة فرية مرض الحاج أعزه الله بالصحة ومتعه بالعافية، وقد توصلت قوات الغفر لمعلومات مهمة سوف تسهم على حد قول مصدر أمنى رفيع فى سرعة الإيقاع بمرتكبى هذه الجريمة النكراء. ومن المتوقع صدور بيان حول سير مجرى التحقيق والبحث وما توصلت إليه فرق المباحث الخاصة بقوات الغفر النظامية.

نفى ما تردد حول أن الحاج قد تعرض لوعكة صحية بالأمس

2007-04-10T07:10:00.000-07:00

للتعميم

عاجل من بلبع الرغاى

نفى مصدر مسئول ما تطرقت له بعض وسائل الاعلام المغرضة حول الحالة الصحية للحاج، وقد أكد سعات المصدر المسئول أن الحاج يتمتع بكامل قواه النفسية والبدنية ولا زال يمارس مهامه بكفاءة منزرعة القطيع ولا أى أساس للصحة حول ما تردد من أن الحاج قد تعرض لوعكة صحية شديدة ألزمته الفراش وأنه بيودع وسيقابل وجه كريم عن قريب، وهى كلها أوهام المغرضين يرددونها كراهية فى الحاج وانكارا لفضله وخيره، وأعاد المصدر التأكيد على أن الحاج قد أدى مهام عمله بكاملها هذا الصباح وعلى الوجه المرضى كما شوهد يؤدى الصلوات فى مسجد العزبة وحضر طهور عويس ابن ابو ازدحمد الصغير ونقط كمان، وأضاف المصدر الذى يعد أحد المقربين جدا من فخامة الحاج إلى أن الحاج كان قد تناول بطتين على الافطار ووزه على العشا والتهم ربع بقرة شويت له خصيصا فى محلات ابوبعرة للكباب والكفته فى كفر مطاعى وارسلت له فى حينه، وأكد شهود عيان على أنهم قد شاهدوا الحاج يسير بصحة جيدة دون أن يتكئ على ذراع نجله المفدى جمال بيه وكانا يتداولان شئون العزبة ليلة أمس.

ومن المتوقع أن يشارك الحاج صباح اليوم فى جنازة فرج أبومحمد الذى وافته المنية بالأمس وفارق قريتنا عن عمر يناهز الخامسة والتسعين عاما وهو رفيق درب الحاج منذ الطفولة بس كبر عنه بسرعة شوية والفقيد مناضل لم يشق له أى غبار على الاطلاق.

هذا وقد صرح السيد أحمد فتحى شرور كبير مجلس الركش لبلوج عزبة الحاج أبو جمال بضرورة أن تتبدى مخاوف أهل العزبة الأبرار على حبيبهم جلالة الحاج وأوضح سيادته أنه يتفهم أن سريان الاشاعة بهذه السرعة بين أهل القرية لا يعدو كونه اهتمام زائد منهم على صحة الحاج وأضاف ردا على سؤال حول قيادة العزبة فى حالة أعاق السيد أبو جمال اى مكروه عن مزاولة عمله فقال إن الدستور واضح فى هذه النقطة ولا داعى للانزعاج فالعزبة عزبة مؤسسات وليست عزبة أفراد ملفتا النظر لسبوق مناقشة هذا الامر لمعطيات الواقع وعدم وجود أسباب حقيقة تبرر الخوض فى مناقشة الخلافة السياسية فى العزبة الآن داعيا الله أن يمد لها فى حياة شراعها وسفينتها الذى يعبر بها منذ تولى العمودية كافة الانواء والتلاطمات فى بحر المنطقة شديد الالتباس والاضطراب.

وقد حيا السيد كمال الشتمونى وصفوان أبو شريف وكبار رجال العزبة بدورهما جلالة الحاج فى برقيات أكدت على الولاء التام لشخص العمدة المحبوب ودعاءهم له باكمال المسيرة فى سداد وحق ويقين، مؤكدين عزمهم الاكيد على الضرب بيد من حديد على يد تلك الاصوات المشككة فى زعامة الحاج وكفاءته، وكانت بعض الأفواه المغرضة قد زجت باسم القيادتين الكبيرتين فى سياق هذه الشائعة المغرضة وهو الامر الذى آلمهما وحرصا على نفيه واستنكار مجرد التفكير فيه

ويدعو بلوج الحاج أبو جمال كافة أهل العزبة للترفع عن ترديد مثل هذه الشائعات المغرضة التى تنال من وحدة العزبة واستقرارها وعلى الجميع أن يعرف أن مصدر تلك الشائعات قد بات معروفا وأن سقوطه فى يد الحاج قد بات وشيكا ليأخذه إلى الزريبة حيث يفعل فيه الأفاعيل ونفرح جميعا فيه.

تعاليق عزبة الحاج ابو جمال رجاء التعميم

2007-04-08T06:46:00.000-07:00

آهه عشان تتنيلوا تنبسطو

جتكم البلاوى عزبة تجلب الكافيه

دى تصاوير وتعليقات تحطوها فى الخرارات بتاعتكم دعاية لجلالة الحاج

واللى هانلاقيه مش حاطط التعليقة هانجيبله بلوجه عاليه واطيه

مفهوم ياعزبة الهم

محدش ينسى يتنيل يحط اللنك بتاع البلوج

آهه عشان اللى ناسى يفتكر

http://elezba.blogspot.com/

جتكم البلاوى فى اشكالكم

بقية التعاليق هاتنحط ع اليمين

مفهوم

الحاج يحذر من المساس ببلوج عزبة أبو جمال أو اعاقته

2007-04-08T01:10:00.000-07:00

سارت شائعة لا أساس فيها من الصحة بتقول إنهم هايوقفوا البلوج بتاع الحاج، لا يا بلد متخافيش، دول بيستهدفوا العيال قلالات الأدب اللى بيخبطوا فى الحاج بتاع مصر، احنا مالنا، نحن زى ما بيقول الدستور بتاعى عزبة مستقلة عن كل جهة أو ناحية أو مديرية، ارجو يعنى يكون ديه شئ مفهوم، مع انى عارف انكم عزبة بقر فهمكم فى البرسيم وبس ، إنما يعنى بفرض يعنى عيل كده ولا كده خبطه نافوخه وقاله يلعب فى عداد عمره يعنى ويجى يعمل بلوج ع البلوك بتاعى قصدى يعمل بلوك ع البلوج بتاعى، اعمل عليه زى الناس ما بتعمل، والحاضر يقول الغايب، الحاج حلف بالآتى على الطلاق م المصونة أيتها نطع أو جعر يفكر كده ولو تفكير صغنن يهوب ناحية البلوج مالا اكون مزعه نصين بالبلغة الشتوى بتاعتى، إيه هى سيبر سباس سايبه ولا سايبه ولا يمكن فاكرينها سايبه، طب يجى سى بتاع الاستئناف ده يوقف البلوج، على اليمين اعلقه جنب خيال المآته فى الغيط وخلى البهايم تخرى عليه

خطيبة جمال بيه تنشط في الدعوة لـ "حزب المستغفل" بين فتيات وشباب الوسط الراقي

2007-04-03T03:43:00.000-07:00

من بلبع الرغاى
أفادت مصادر مقربة من أسرة صهر جمال بيه أمين شلة السياسيات بالعزبة أن خطيبته فخامته خضرة أبو حسين تلعب دورًا كبيرًا في حملة الدعاية والترويج لـحزب المستغفل الذي يعتزم نجل العمدة تأسيسه خلال الفترة القليلة القادمة كبداية للتعددية الحزبية فى عزبتنا المستقلة أم دستور حديث جموطراتى. وتتولى خضره مهمة الترويج للحزب بين صديقاتها وأشقائهن من الشباب وأقاربهن في أوساط الراقية بالعزبة مثل درب الفار، وزريبة علوان، ودوار أبو جمعه، ومصطبة عكاشه. ونجحت بالفعل في استقطاب عدد كبير من الفتيات والشباب، بعد أن وزعت عليهم نسخًا من أفكار وأهداف الحزب الذي يعتمد النهج الليبرالي، والذي تعتمد ركيزته وقاعدته الأساسية على جذب الشباب من الجنسين. كما يقوم والدها بالدعاية لحزب صهره بين عملائه من سماسرة الجناين وتجار الخردة وتجار البهايم والألفطية الذين يتعامل معهم، وكذا أبناء رجال الأعمال الكبار هؤلاء والمتعاملين مع وكالته فى سوق الجمال، وفق ما أكدت مصادرنا. وتجاوزت حملة الترويج لـحزب المستغفل الأفاق المحلية إلى أوساط أبناء العزبة المغتربين بالخارج، الذين يملكون قوة تأثير خاصة ويحظون بنفوذ واسع بين أبناء العزبة فى الكويت والبحرين والاردن وفرنسه وامريكيا لاكتساب أرضية جماهيرية قبل الإعلان عن تأسيس الحزب رسميًا. وفي هذا الإطار، استغلت خضرة زيارتها إلى دمياط في الأسبوعين الماضيين لاختيار أثاث عش الزوجية للدخول في حوار مع بعض أبناء الجالية هناك من العاملين بتجارة الخشب هناك تطرق إلى الأهداف من حزب المستغفل والفكر الذي يحمله جمال بيه في ما يتعلق بمستقبل العزبة

قصيدة إهداء من الشاعر محمد فؤاد أبو نجم بمناسبة عقد قران جمال بيه

2007-04-02T04:40:00.000-07:00

قام الكاتب الكبير محمد فؤاد ابو نجم بكتابة كلمات اغنية تشدو بها كروانة الرشاح نانسى شخرم للاستاذ جمال بيه ابن الحاج بمناسبة الاعلان السعيد عن عقد قران جنابه وقام بتلحينها محمد جمال على العود من مقام هلاهوطه كرد وسيتم بشها على فضائية العزبة قريبا من اخراج نديم لبكى

يا سعت البيه ألفين مبروك
جبنالك الشمع ودبحنا ديوك
وف كل مكان
أكلنا جعان
ودفعنا كمان للى يحبوك
يا جمال يا جمال
ألفين مبروك

يا جمال ماتقول
نيه ورغبة

ليفتكروها

الأوباش كدبة
أصل انت يا بيه
أمل العزبة
ودى تبقى أصول
حرق المحصول
بعد ما دفعنا

فيه الحسبة

يا جمال يا جمال
وان جيت للحج
أنا أصلى بحبك

فوق الحق
ومن غير حلفان
راح اجول الحج
اول ما رأيتك

وسطى ارتج
قلت ده معقول
وجريت على طول
وأنا قلبى يقول
بحبك مشغول

آه يابن الحج

يلعن خاش ابوه
ده اللى يعاندك
هانجيك زاحفين
وده مين قدك
بس انت تقول
يا شايل المحمول
والعزبة تكون

حالا عندك

دى لا فيها كسوف
اعمل معروف
اصل انا ملهوف
اخطب ودك

يا جمال بيه
ألفين مبروك
ربك والله
لاعن حاسدوك
واللى رفضوك
ولاد منيوك
كلهم لمامة

ولا فيش زيك

لا أنا عاوزه فلوس

ولا حتى جاموس

سيبونى كده ابوس

بلغة الحاج

يا سعت البيه

ألفين مبروك

جبنالك الشمع

ودبحنا ديوك

وف كل مكان

أكلنا جعان

ودفعنا كمان

للى يحبوك

يا جمال يا جمال

ألفين مبروك

جمال بيه الشاب ذو الاربعة واربعين يعقد قرانه الشهر القادم

2007-04-02T02:38:00.000-07:00

أثار تقديمنا للاستاذ جمال ابن الحاج تساؤلات العديد من متابعى البلوج مندهشين لان البيه الصغير اشهر م النار على العلم لكن ربكم الحق محدش خد باله من ان ده تمهيد عشان نقولكم ان العزبة اللى افراحها عماله تتوالى من تحديث دستور لحضور فخيم للحاج فى قمة العزب التلتمية اللى رجع منها بالسلامة ومعاه حمولات ياما، الى شفاء الست الكبيرة م الوعكه ربنا يديها الصحة وطولة العمر ومرضناش نقلق البلد بالخبر ده بالمختصر الافراح بتتابع والخير بيجر بعضه يا عزبة الخير، والدليل أهه

صرح جلالة الحاج أن جمال بيه نجله سيعقد قرانه على ربة الصون والعفاف بنت بيت الكرم والحسب الشريف خضرة هانم بنت ابو حسين التى تبلغ من العمر عشرين سنة وبنت بنوت وعندها يجى تمنتاشر فدان قبلى ناحية ميت ابو سويلم وامها الله يرحمها سايبلها اطيان برضك، والحاج ابو حسين اللى شرفه نسب الحاج جه لحد الحاج وهو اللى اتحايل عشان البيه يرضى ببنته، البيه اللى ماكنش مخطط للزواج بسبب انشغاله بسياسيات العزبة وتسيير امورها طبعا فى معية الحاج وتحت اشرافه واوامره لان لابوه ونزل لطوعه بعد ما البت بصراحه عجبت الحاج نفسه واللى يعجب الحاج يعجب ابنه، والخبر السعيد ده مؤكد انه هايسعد البلد وكله يعلق الانوار والزينات ويا طبله دقى

نبذه عن الاستاذ جمال بيه

2007-04-02T01:26:00.000-07:00

تحقيق بقلم بلبع الرغاى

طالبنا عدد من القراء إلقاء مزيد من الضوء على الاستاذ جمال وحياته الخاصة حتى يتعرفوا على وارثهم القادم، وعمدتهم المستقبلى بعد الشر بعد الشر بعد الشر بعد ما يفارقنا الحاج

ادعوله بطولة العمر يا بلد

نرجع مرجوعنا، جمال بيه ابن الحاج محمد حسنى اتعلم علام محصلش قبله ولا هايحصل بعده يا عزبة الهم، اشتهر بأنه يتحرك بحرية في مجتمع اصحاب العزب وزرايب البهايم المليانه بالخيرات وتجار الخردة واصحاب عربيات النقل بالنفر سماسرة محاصيل الجناين يعنى بالمختصر مجتمع رجال الاعمال فى العزبة ومجاورينها، من الأثرياء، ويتلاقى معهم سواء داخل قصورهم على أطراف العزبة أو منتجعاتهم التي يقضون بها عطلات نهاية الأسبوع على شواطئ البحر ين الكبير أو الرياح التوفيقى، ومن خلال أحاديث تتناثر هنا وهناك فإن جمال يشعر في صحبة هؤلاء براحة أكبر من أؤلئك المرافقين الرسميين المحيطين بأبيه، سواء من معاونيه أو الوزراء أو حتى كبار قادة مجلس الركش الحاكم المتربعين على عروشهم منذ ما قبل عمودية حسنى الأب . وقال دبلوماسي موزمبيقى عمل سابقاً في العزبة وحينها التقى جمال بيه عدة مرات "إنه يترك انطباعات إيجابية جداً لدى كل من تعامل معه، فهو يبدو واثقاً من نفسه للغاية، ويفهم أكثر من والده كيف يجب التعامل مع أهل العزب الكبيرة عموماً" .وتصفه مجلة "شبلنجه" الأميركية قائلة إن جمال بيه "بقامته الطويلة وجسده الرياضي المتناسق وملامحه البريئة وابتسامته الجذابة، يبدو أقرب شبها إلى السيدة والدته التي تختلط أصول والدها الشبلنجية، بأخرى من أمها التي تنحدر من منطقة عين الصيرة " . وتمضي المجلة الأميركية التي نشرت تقريراً موسعاً عن جمال بيه قائلة إنه له "أنف حادة، وشعر داكن، وعينان سوداوان، وهو يتحرك بخطوات واثقة تشي بقوة العزيمة، ويحب ارتداء الملابس التي تتفق مع أحداث خطوط الموضة، وإن كان بات يفضل الآن بشكل خاص الحلل الرسمية كالعبايات والجلاليب التي تفصل يدويا من أجود الأصواف الانجليزية، خصوصا صوف ابو عكاز والأحذية الجلد بنعل بوروتان. وعلى الصعيد المهني فان جمال بيه أو جيموس كما تطلق عليه أسرته وأصدقاؤه بدأ حياته مصرفياً ومستشاراً مالياً، قبل أن يؤسس شركة خاصة به تتاجر فى محصول البلد، وقد تخرج في مدرسة التأهيل المهنى في المنوتيه حيث حصل على درجتي الاعدادي المهنية والماجستير في الصواريخ وباعتباره أعزب يقال أنه يتمتع بصحبة الجميلات بتوع البندر ولديه ولع بالكارتات الرياضية الفاخرة .أما الحاج عليّ أبو هلال الموجه السياسي لجمال بيه فقال عنه في تصريح سابق لصحيفة أميركية إن أبرز أوجه القوة في جمال هو إدراكه التام لضرورة الإصلاح، انظر إلى تركيبة العزبة السكانية، إن ثلثي السكان دون سن الخامسة والثلاثين، ويدخل تمنميت خريج سوق العمل كل عام، وهم يشكلون نحو 90 بالمائة من البطالة، ويفهم جمال أيضا مشكلتنا الثانية وهي نتيجة للأولى وهي انتشار التطرف الديني خاصة بين الشباب، لقد أصبح الدين حديثنا الأهم، ونتيجة لذلك أصبحت كل مسألة ترتدي عباءة الدين، كأن يطرح البعض تساؤلات مثل : هل يقر الدين السحت ولطش مواريث الارامل والنسوان هل يقر الدين السياحة، ما هو نمط الحياة الإسلامية الملائم، أصبح الدين يقتحم كل شي، ويدرك جمال هذا جيداً، ويعرف كيف يتعامل مع الأمر .

الحاج رجع بالسلامة يا بلد

2007-03-29T08:04:00.000-07:00

عاد فخامة الحاج محمد حسنى بسلامة الله إلى أرض الوطن محملا بكل ما هو غالى ونفيس، فقد زار الحاج مقام ابو شحلول وقاد شمعتين ودعا للبلد ربنا ينصرها على المندسين، وحلف الحاج عبدالله ابو السعود ما الحاج معاود البلد إلا وف ايده حاجة من ريحة خير عزبة ابو السعود وحمل الكارته بتاع الحاج بما لذ وطاب، حتى ان الكارته نفسها مانفعش تساع الحاجة وجمال بيه فالحاج قالهم تعالو ورايا ف عربية بالنفر الحاجة ربكم الحق كان بدها ترجع ويا الحاج فى الكارته وتسيب جمال بيه لوحده يرجع مع الاشولة بتاع ابو السعود الحاج قالها جاك خابط مره نافوخك مفسى فزى قومى لاحدفك تحت الجحش يدهسك، همى يلا انزلى لاحدفك فى الرشاح وكأى امرأة تراعى بيتها وزوجها وتتفهم طبيعة الحياة الزوجية وافقت الحاجة وودعت ابو جمال حتى وصل لمشارف القرية

بقى ان نقول ان قمة العزب وصلت لمقترحات مهمة بشأن توفيق الروس بين عزبة الفلاسطه وعزبة الاكولتية اللى جايره على ارضهم بس الجماعة الفلاسطة دماغهم ناشفه شوية ومش راغبين يفضوها سيرة ودماغهم والفين بلغة ليرجعوا الارض لالى لهفها الحاج اولمارطى وينعلو سنسفيل جدوده كمان، بس ربكم الحق العمد مش هاين عليهم يزعلوا بعض وجايين على الفلاسطه اكمنهم غلابه بس الحاج حالف يمين طلاق لو الاولمرطى ما رجعش حاجة للفلاسطة يريحهم بيها ليقاطعوه ويعلن انه مش صاحبه كده وده يعنى عشان ينكن ويفضها سيره

الأستاذ جمال يرد على منتقدى الدستور

2007-03-29T03:27:00.001-07:00

فى حوار مع عدد من المراسلين الأجانب اليوم رد الاستاذ جمال على منتقدى تعديل مواد دستور العزبة، وقال ردا على سؤال مفاده

PROPOSED AMENDMENT TO ARTICLE 88 UNDERMINES EZBA's ELECTIONS BY REMOVING JUDICIAL OVERSIGHT:
"If you compare it to the existing article, it does have much more detail, much more guarantees, much more specifics on how the process of running elections and supervising the elections should be. It does relegate to the power of the legislation to set up more details. But it does enshrine very important guarantees and very important responsibilities for the judiciary within the new drafting of the article. The drafting that we have does provide guarantees that are not in the existing article."

والكلام ده يا عزبة معناته إن التعديل كان الغرض منه إن النتخابات هاتبقى نزيهة ورسمية، ومانقصدش البت مرات علوان الزفر ولا البت المدعوقه مرات زاكى الهم

فيه ضمانات أكتر وفيه تشريعات أنزه فاهمين يا عزبة الهم، أما من ناحية المادة التانية دى اللى اسمها والله ما فاكر بس رقمها 179 تقريبا

PROPOSED AMENDMENT TO ARTICLE 179 ENSHRINES DRACONIAN EMERGENCY LAW POWERS INTO THE CONSTITUTION:
"This is not something unique to Elezba. All Ezab, especially in the past four or five years, that have went forward to try to put legislation to deal with terrorism, had always had to draw a very fine line, a balance, between powers to combat terrorism and between not infringing civil liberties. Go back and we have seen and we have followed the discussion in each and every country... We believe that this article... offers guarantees and will offer judicial supervision on any powers being given to the authorities to combat terrorism."

طبعا إنتم فرحانين انكم دخلتم الالفية وابن الحاج بيرطن لغات زى الخواجه الفونس بتاع عرابى والغرض يععنى إن المادة دى برضه فيها ضمانات لحماية الحريات المدنية ومنها الاشراف القضائى الجوديشيال سوبرفيجين زى ما نطقها البيه الصغير على أى سلطة تمنح لأى مؤسسة فى مناهضتها للإرهاب، يعنى مكافحته، طبعا العزبة مفهاش ارهاب بس الدستور لازمن يا بلد يغطى المستخبى برضه واحنا منعرفش المستخبى الحاج ربما يعرف احنا لأ

فخامة الحاج يحظى باستقبال تاريخى فى قمة العزب التلتمية

2007-03-29T01:13:00.000-07:00

كتب بلبع الرغاى

بدأت قمة العزب رقم تلتمية أعمالها بعزبة أبو سعود مركز محلة مكلوم حجازى، وقد وصلت كارتة الحاج إلى أراضى محلة مكلوم فى تمام الثامنة وخمسة وعشرين دقيقة وواحد وثلاثين ثانية وقابلتها على مشارف عزبة أبو سعود حشود جماهيرية ترفع الورود والاعلام وتهتف بأهازيج النصر وتهنئة الحاج على أول دستور عزباوى ديمقراطى فى منطقة العزب الشرقية، وقد اصطحب الحاج معه فى الكارته الاستاذ جمال نجله وكذلك السيدة الأولى أم جمال، وقد كان فى استقبال فخامته لدى وصوله السيد أمين عام قعدة العزب، عمر أبو موسى، وفخامة الحاج عبدالله أبو السعود والسيدة مراته، وولده من مراته التانية فخد الاصفر، وقد استعدت عزبة أبو السعود لهذا الحدث التاريخى فأضيئت الدوارات ورشت شوارع القرية بماء الورد وعلقت أقراص الجِلة على واجهات البيوت ترحيبا بالضيوف الكرام، واقيم سرادق كبير مزدهر بالانوار وعلقت الميكروفونات فى كل مكان والتى أخذت تبث أغانى أبو دراع ومحمد طه وخضرة محمد خضر الوطنية، وسوف نقوم بموافاتكم بأخبار الحاج فى هذه القمة بالاضافة لتحليل وافى لكلمته المتوقع أن يلقيها فى تمام الحادية عشرة وستة عشر دقيقة واتناشر ثانية وواحد وعشرين جزء من الثانية واتنين فيمتو زويلى وربع،

التهانى تتوالى وجموع الشعب تخرج للشوارع للاحتفال

2007-03-27T06:04:00.000-07:00

كتب بلبع الرغاى

تتالت ردود الافعال المرحبة بالانتصار الكبير لحركة التحديث بالعزبة والفكر الجديد بقيادة الحاج أبو جمال، وقد قوبل خبر اعلان نتائج الاستقراع واعلان اختيار الشعب لدستور حديث للعزبة بفرح كبير من قبل جماهير العزبة التواقة لدخول الألفية

وقد أرسل الحاج أحسن فتحى شرور رئيس مجلس الركش صاحب الصورة اللى ع الجنب برقية تهنئة لفخامة الحاج محمد حسني عمدتنا وزعيم البلد كلها.. جاء فيها انه بكل الفخر والاحترام يشرفني ان ارفع لكم بأسم الجماهير العريضة والرفيعة على السواء اسمي آيات التقدير لشخصكم والاعتزاز بزعامتكم والفخر بالانتصار الكاسح في اول استقراع على دستور العزبة الغالية. واكد شرور: ان مجلس الركش علي يقين ان هذا النصر قد جاء تعبيرا صادقا عن ارادة شعب العزبة الذي اختار بعقله حكمتكم وقدرتكم علي قيادة سفينة الوطن والعبور به الي المستقبل.

وبعث حضرة صاحب السمو امير سندنهور الكبرى الشيخ عابد الاحمد الطباخ حفظه الله ببرقية تهنئة الى اخيه صاحب الفخامة الحاج محمد حسني عمدة عزبة أبو جمال وذلك بمناسبة فوز تياره المنادى بتحديث الدستور فى الاستقراع
كما اعرب سموه رعاه الله باسم شعب سندنهور وباسمه عن اخلص تمنياته لفخامته بالتوفيق والنجاح مؤكدا ان هذا الفوز الذي احرز تيار الفكر الجديد عن جدارة واستحقاق انما يعكس الثقة التي يوليها له شعب عزبة أبو جمال الشقيق والتأييد الكبير لسياساته الحكيمة في المجال الداخلي والاقليمى والدولي وخاصة فيما يتعلق بالقضايا العزباوية والتنمية الداخلية.كما اعرب سموه عن تطلعاته الى تعزيز وتقوية العلاقات الثنائية الوطيدة بين العزبتين وتوسيع مجالات التعاون المشترك لخير الشعبين الشقيقين. كما بعث سمو ولي العهد الشيخ نايل العبدالله السالب الطباخ وسمو رئيس مجلس الوزراء الشيخ هايل العبدالله السالب الطباخ حفظهما الله ببرقيتين مماثلتين اعربا فيهما عن اخلص التمنيات بالتوفيق والنجاح لفخامته وبمزيد من التقدم والازدهار لعزبة أبو جمال وشعبها الشقيق في ظل قيادته الحكيمة.