29 مارس 2007

الحاج رجع بالسلامة يا بلد



عاد فخامة الحاج محمد حسنى بسلامة الله إلى أرض الوطن محملا بكل ما هو غالى ونفيس، فقد زار الحاج مقام ابو شحلول وقاد شمعتين ودعا للبلد ربنا ينصرها على المندسين، وحلف الحاج عبدالله ابو السعود ما الحاج معاود البلد إلا وف ايده حاجة من ريحة خير عزبة ابو السعود وحمل الكارته بتاع الحاج بما لذ وطاب، حتى ان الكارته نفسها مانفعش تساع الحاجة وجمال بيه فالحاج قالهم تعالو ورايا ف عربية بالنفر الحاجة ربكم الحق كان بدها ترجع ويا الحاج فى الكارته وتسيب جمال بيه لوحده يرجع مع الاشولة بتاع ابو السعود الحاج قالها جاك خابط مره نافوخك مفسى فزى قومى لاحدفك تحت الجحش يدهسك، همى يلا انزلى لاحدفك فى الرشاح وكأى امرأة تراعى بيتها وزوجها وتتفهم طبيعة الحياة الزوجية وافقت الحاجة وودعت ابو جمال حتى وصل لمشارف القرية
بقى ان نقول ان قمة العزب وصلت لمقترحات مهمة بشأن توفيق الروس بين عزبة الفلاسطه وعزبة الاكولتية اللى جايره على ارضهم بس الجماعة الفلاسطة دماغهم ناشفه شوية ومش راغبين يفضوها سيرة ودماغهم والفين بلغة ليرجعوا الارض لالى لهفها الحاج اولمارطى وينعلو سنسفيل جدوده كمان، بس ربكم الحق العمد مش هاين عليهم يزعلوا بعض وجايين على الفلاسطه اكمنهم غلابه بس الحاج حالف يمين طلاق لو الاولمرطى ما رجعش حاجة للفلاسطة يريحهم بيها ليقاطعوه ويعلن انه مش صاحبه كده وده يعنى عشان ينكن ويفضها سيره

الأستاذ جمال يرد على منتقدى الدستور

فى حوار مع عدد من المراسلين الأجانب اليوم رد الاستاذ جمال على منتقدى تعديل مواد دستور العزبة، وقال ردا على سؤال مفاده
PROPOSED AMENDMENT TO ARTICLE 88 UNDERMINES EZBA's ELECTIONS BY REMOVING JUDICIAL OVERSIGHT:
"If you compare it to the existing article, it does have much more detail, much more guarantees, much more specifics on how the process of running elections and supervising the elections should be. It does relegate to the power of the legislation to set up more details. But it does enshrine very important guarantees and very important responsibilities for the judiciary within the new drafting of the article. The drafting that we have does provide guarantees that are not in the existing article."
والكلام ده يا عزبة معناته إن التعديل كان الغرض منه إن النتخابات هاتبقى نزيهة ورسمية، ومانقصدش البت مرات علوان الزفر ولا البت المدعوقه مرات زاكى الهم
فيه ضمانات أكتر وفيه تشريعات أنزه فاهمين يا عزبة الهم، أما من ناحية المادة التانية دى اللى اسمها والله ما فاكر بس رقمها 179 تقريبا
PROPOSED AMENDMENT TO ARTICLE 179 ENSHRINES DRACONIAN EMERGENCY LAW POWERS INTO THE CONSTITUTION:
"This is not something unique to Elezba. All Ezab, especially in the past four or five years, that have went forward to try to put legislation to deal with terrorism, had always had to draw a very fine line, a balance, between powers to combat terrorism and between not infringing civil liberties. Go back and we have seen and we have followed the discussion in each and every country... We believe that this article... offers guarantees and will offer judicial supervision on any powers being given to the authorities to combat terrorism."
طبعا إنتم فرحانين انكم دخلتم الالفية وابن الحاج بيرطن لغات زى الخواجه الفونس بتاع عرابى والغرض يععنى إن المادة دى برضه فيها ضمانات لحماية الحريات المدنية ومنها الاشراف القضائى الجوديشيال سوبرفيجين زى ما نطقها البيه الصغير على أى سلطة تمنح لأى مؤسسة فى مناهضتها للإرهاب، يعنى مكافحته، طبعا العزبة مفهاش ارهاب بس الدستور لازمن يا بلد يغطى المستخبى برضه واحنا منعرفش المستخبى الحاج ربما يعرف احنا لأ

فخامة الحاج يحظى باستقبال تاريخى فى قمة العزب التلتمية

كتب بلبع الرغاى
بدأت قمة العزب رقم تلتمية أعمالها بعزبة أبو سعود مركز محلة مكلوم حجازى، وقد وصلت كارتة الحاج إلى أراضى محلة مكلوم فى تمام الثامنة وخمسة وعشرين دقيقة وواحد وثلاثين ثانية وقابلتها على مشارف عزبة أبو سعود حشود جماهيرية ترفع الورود والاعلام وتهتف بأهازيج النصر وتهنئة الحاج على أول دستور عزباوى ديمقراطى فى منطقة العزب الشرقية، وقد اصطحب الحاج معه فى الكارته الاستاذ جمال نجله وكذلك السيدة الأولى أم جمال، وقد كان فى استقبال فخامته لدى وصوله السيد أمين عام قعدة العزب، عمر أبو موسى، وفخامة الحاج عبدالله أبو السعود والسيدة مراته، وولده من مراته التانية فخد الاصفر، وقد استعدت عزبة أبو السعود لهذا الحدث التاريخى فأضيئت الدوارات ورشت شوارع القرية بماء الورد وعلقت أقراص الجِلة على واجهات البيوت ترحيبا بالضيوف الكرام، واقيم سرادق كبير مزدهر بالانوار وعلقت الميكروفونات فى كل مكان والتى أخذت تبث أغانى أبو دراع ومحمد طه وخضرة محمد خضر الوطنية، وسوف نقوم بموافاتكم بأخبار الحاج فى هذه القمة بالاضافة لتحليل وافى لكلمته المتوقع أن يلقيها فى تمام الحادية عشرة وستة عشر دقيقة واتناشر ثانية وواحد وعشرين جزء من الثانية واتنين فيمتو زويلى وربع،

27 مارس 2007

التهانى تتوالى وجموع الشعب تخرج للشوارع للاحتفال

كتب بلبع الرغاى
تتالت ردود الافعال المرحبة بالانتصار الكبير لحركة التحديث بالعزبة والفكر الجديد بقيادة الحاج أبو جمال، وقد قوبل خبر اعلان نتائج الاستقراع واعلان اختيار الشعب لدستور حديث للعزبة بفرح كبير من قبل جماهير العزبة التواقة لدخول الألفية


وقد أرسل الحاج أحسن فتحى شرور رئيس مجلس الركش صاحب الصورة اللى ع الجنب برقية تهنئة لفخامة الحاج محمد حسني عمدتنا وزعيم البلد كلها.. جاء فيها انه بكل الفخر والاحترام يشرفني ان ارفع لكم بأسم الجماهير العريضة والرفيعة على السواء اسمي آيات التقدير لشخصكم والاعتزاز بزعامتكم والفخر بالانتصار الكاسح في اول استقراع على دستور العزبة الغالية. واكد شرور: ان مجلس الركش علي يقين ان هذا النصر قد جاء تعبيرا صادقا عن ارادة شعب العزبة الذي اختار بعقله حكمتكم وقدرتكم علي قيادة سفينة الوطن والعبور به الي المستقبل.
وبعث حضرة صاحب السمو امير سندنهور الكبرى الشيخ عابد الاحمد الطباخ حفظه الله ببرقية تهنئة الى اخيه صاحب الفخامة الحاج محمد حسني عمدة عزبة أبو جمال وذلك بمناسبة فوز تياره المنادى بتحديث الدستور فى الاستقراع
كما اعرب سموه رعاه الله باسم شعب سندنهور وباسمه عن اخلص تمنياته لفخامته بالتوفيق والنجاح مؤكدا ان هذا الفوز الذي احرز تيار الفكر الجديد عن جدارة واستحقاق انما يعكس الثقة التي يوليها له شعب عزبة أبو جمال الشقيق والتأييد الكبير لسياساته الحكيمة في المجال الداخلي والاقليمى والدولي وخاصة فيما يتعلق بالقضايا العزباوية والتنمية الداخلية.كما اعرب سموه عن تطلعاته الى تعزيز وتقوية العلاقات الثنائية الوطيدة بين العزبتين وتوسيع مجالات التعاون المشترك لخير الشعبين الشقيقين. كما بعث سمو ولي العهد الشيخ نايل العبدالله السالب الطباخ وسمو رئيس مجلس الوزراء الشيخ هايل العبدالله السالب الطباخ حفظهما الله ببرقيتين مماثلتين اعربا فيهما عن اخلص التمنيات بالتوفيق والنجاح لفخامته وبمزيد من التقدم والازدهار لعزبة أبو جمال وشعبها الشقيق في ظل قيادته الحكيمة.

عزبة أبو جمال ..اختارت المستقبل


الجماهير رفضت "الوصاية".. وأيدت التعديلات الدستورية

الشعب استجاب لدعوة الحاج.. وشارك بإيجابية في الاستفتاء

: الاستقراع مر بسلام.. ولم تغلق أي لجنة

الإقبال فاق التوقعات..


اختار شعب عزبة أبو جمال بكل طوائفه وفئاته المستقبل.. وخرجت الملايين للاستفتاء علي التعديلات الدستورية استجابة لدعوة الحاج محمد حسني أبو جمال.. وشارك بايجابية في الاستفتاء وأعلنت الجماهير رفضها الوصايه والتناحة التى حاولت فئة ضالة فرضها.. وأيدت الأغلبية التعديلات الدستورية من أجل مستقبل أفضل لعزبتنا. أشاد المراسلون الأجانب بالتيسيرات التي وفرتها اجهزة الاعلام بقيادة بلبع الرغاى لتغطية الاستقراع بكل حياد وشفافية وديمقراطية.

وقد شهدت عملية الاسقتراع اقبالاً من المواطنين للتعبير عن آرائهم في التعديلات في مناخ اتسم بالحرية والديمقراطية وحيدة تامة من جانب الخفر الذين قاموا بحفظ النظام العام وجرت تحت اشراف قضائي من قرابة ألف من رجال القضاء والنيابة العامة والهيئات القضائية المختلفة. وبدأت الليلة الماضية عمليات فرزالأصوات التي تتم تحت اشراف قضائي تمهيداً لاعلان نتيجة الاستفتاء خلال ساعات بمعرفة اللجنة العليا للانتخابات برئاسة الستاذ جمال والحاج كمال

وقد ظلت طوال الليلة الماضية تتلقي النتائج أولاً بأول من مختلف اللجان العامة بمختلف المحافظات علي مستوي العزبة.

قال الحاج أحمد أبو الشرور كبير مجلس الركش ان ثلة المعارضين يعلمون جيدا ان "ألف باء" الديمقراطية هي المشاركة والمساهمة وان عدم المشاركة يساوي عدم الديمقراطية. وذكر شرور انه لو قرأ المعارضون مواد الدستور جيدا لعلموا انها لبنة قوية نحو مستقبل كبير وعليهم أن يمارسوا هذه الديمقراطية إنما المقاطعة الجوفاء فهي مرفوضة.

كان الحاج قد أدلي بصوته الانتخابي امام لجنة مدرسة العزبة الجديدة الثانوية كما ادلت السيدة الحاجة أم جمال وابنها الاستاذ جمال بأصواتهم أمام نفس اللجنة.

الدستور اتعدل بفوز تاريخى لقوى النور واندحار لقوى الظلام

نعم نعم من جوه الكيس
ده رئيسنا طيب وحريص
شاف الدستور محتاج تنكيس
شاله وف عين عدونا تخميس
إدانا دستور جامد وحديث
ده دستور اخر جمال
قولو معانا يا رجال
دستورنا
ولا فيش زييه
دستورنا
قلوبنا هاتحميه
دستورنا
نقفوا نحييه
ونحى الحاج ابو جمال
يا شعب قوم بقى وانهض
دستور حديث افرح .. اسعد
يا معارض غور ويالا ابعد
تغلبنا.. هأو .. ده بقى محال
ده احنا اسمنا شعب الرجال
حيوا معانا ابو جمال
ابو جمال
ابوجماااااااااااااااال

26 مارس 2007

اللعنة على من يقول يسقط أبو جمال

يا نهار اسود يا بلد هى حصلت
انا اقول تحديث دستور العزبة واعمل فيكم خير وادخلكم الالفية يقوم عيل مايسواش خرية الحمار بتاعى يلم شوية عيال زيه ويلفوا فى البلد ويقولم يسقط أبو جمال يا خى دهده على الطلاق م المصونة أم جمال لو وقع فى إيدى العيال دول لاقطع خبرهم وهارميهم فى الرشاح عشان الغايب يتعظ والحاضر ينكن فى الخرارة اللى هو قاعد فيها
وعلى الطلاق مالمصونة لو اتكرر الموضوع مالا جايب عليكى وطيكى يا بلد

الجماهير تتوافد للاستقراع على الدستور

عاجل من بلبع الرغاى
من أمام مقر الاستفتاء بالوحدة المحلية لقرية عزبة أبو جمال
توافد أبناء عزبتنا العامرة عن بكرة أبو اللى جابهم رجالا وأطفالا وشيوخا ونسوانا وعرايس وحمل كل منهم فى يده يافطة عريضة كتب عليها بلون الدم نعم لدستور أبو جمال وتوجهت مجموعة من المؤيدين لمقهى علوان الذى يجلس عليه المندسين الذين أمهلهم أبو جمال لبعد الاستفتاء وقامت بتدميره حتى لا ينكسر صوت القرية ولا يشق عروتها الفوقانية وقاموا بمطاردة الرافضين فى طرقات القرية وهم يرددون بعلو الصوت أبو جمال الكل فى الكل وقد حاول أبو جمال تهدئة الجماهير لكنهم قالوا له كيف نسكت على من يشكك فى جموطراتية فخامتك

استدراك ثان : أم الحاج كمال ليست غسالة

كتب بلبع الرغاى
تتداول فى القرية شائعة مغرضة ومترضيش ربنا ويروج لها بعض الخبثاء فى عزبتنا العامرة تقول بأن أم الحاج كمال كانت غسالة وأبوه كان كلاف عند العمدة السابق وهذا الكلام خال وعار من الصحة
وقد استاء الحاج من ترديد هذا الكلام وقال: طب ما كلتنا امهاتنا غسالات مين يعنى امه مغسلتش، وأوضحنا لفخامته إن المقصود اهانة أم كمال بيه التى قال أنها من أصول ارستقراطيه وأن أباه كان من كبار ملاك الاراضى فى ناحية مكروب، وعند هذا الحد امتنع الحاج عن التعليق وقال أنا جايب رجلتى ع الفرازة ومش مشكلة ان تكون امه غساله المهم هو ايه دلوقتى

25 مارس 2007

الحاج كمال الشتمونى هو أبو مخترع علم الابوجمالولوجى


استدراك من بلبع الرغاى

سقط سهوا من الخبر أسفله أن نشير إلى أن الحاج كمال الشتمونى من قرية شتمون محلة مكروب محافظة المنوتية وهو والد الاستاذ معتز الحاصل على الدكتوراه فى الفكر الانسانى والاقتصادى والتربوى عند أبو جمال وهو نفسه العالم الجليل الذى طلب أن يكون هناك فرعا علميا اسمه أبوجمالوجى لتداول أفكار أبو جمال التى ستكفل للعالم حال تطبيقها الرخاء والنهضة والتقدم والفخفخة

الحاج كمال الشتمونى صاغ الدستور كما يصاغ الذهب

كتب بلبع الرغاى

كان واجب علينا احقاقا للحق وردا للجميل أن نقول أن السيد كمال الشتمونى هو الذى قاد فريق الصياغة للدستور الجديد للعزبة وهو كما يعرف كافة أهل العزبة ومجاورينها فقيه قانونى لا يشق له غبار عمل ككاتب محامى فى عدة مكاتب كبرى للمحاماة فى مصر الشقيقة وله باع قانونى فى فض المنازعات بالطرق السلمية وغير السلمية ويجيب الحق من عين العفريت حتى ولو مش حق يجيبه برضه وهو مستشار مقرب للحاج ويثق فى قدراته الفذة التى طالما يحتاجها ومنها دوره البارز فى وضع دستورنا الجديد المستفتى عليه فله كل التحية والاعتراف بالجميل


والجدير بالذكر أن الحاج كمال يرأس مجالس العزبة المتخصصة وهو على استعداد للخدمة فى أى موقع يراه الحاج كوطنى غيور ومنافح صلب عن الحق ومنافح زهر عن الظلم تشير بعض التقارير إلى احتمال توليه مجلس الركش فى دورته القادمة بعد التعديلات وفض المجلس باللى فيه
والحاج كمال قاد فريق من خيرة أبناء الوطن نذكر منهم على ابو هلال وفتحى ابو شرور وزكريا ابو العزايم وعمل بجد واخلاص فى تعاون تام مع الرجل الكباره صفوان أبو شريف من مجلس الركش فى عزبة أبو جمال.


الدعوة لمقاطعة الاستفتاء على الدستور تلقى استهجانا واسعا

كتب بلبع الرغاى
ورد إلى فضيلة الحاج ما فحواه أن مجموعة خارجة وقلة منحرفة من الذين اندسوا للأسف فى عزبتنا الآمنة وسمح لهم الحاج بكل طيب خاطر بالعيش بين أهلها وادعوا بأنهم مثقفين وهم من هذه الكلمة فى بين وبون كبيرين، قامت هذه المجموعة بالدعوة لاسقاط الدستور الذى عكفت مجموعة من خيرة رجال العزبة وشرفاءها على وضعه كى تدخل القرية الألفية الجديدة، وحجتهم الواهية أن العزبة لم تشهد فى تاريخها أى انتخابات بالمعنى الدديمقراطي، وقد صرح الحاج بأنه قد طال صبره عليهم وأنه لن تأخذه شفقة ولا رحمة بكل من توسل له نفسه الدنيئة المساس بدستور العزبة وبأمنها واستقرارها
وبعد تدخل من جمال بيه قرر الحاج اعمالا لمبادئ الديمقرطية أن يتركهم فى غيهم ويترك الحكم لشعب العزبة وعندما يقرر الشعب اختيار الدستور سيكون للحاج معهم كلام تانى

تغيير النشيد القومى بعد اقرار الدستور

عكفت مجموعة من كبار مفكرى القرية تحت إشراف مجلس الركش وبتوجيه مباشر من الأستاذ جمال ابن الحاج محمد حسنى على وضع نشيد وطنى جديد للعزبة يعكس الدور الوطنى والتاريخى للحاج راعى النهضة
وقد صاغ كلمات هذا النشيد الشاعر محمد فؤاد نجم ويعكف حاليا على تلحينه الموسيقار عمران الشريعى وهذا مقتطف من هذا النشيد الذى تستغرق تلاوته ما يقرب من نصف الساعة دون تكرار المقاطع
أبو جمال ده حظنا
فضل ونعمة من ربنا
حاجة كبيرة فوق قلبنا
قضا قمنا من النوم لقيناه
فآخدناه
وزعمناه
وفى المحبة غرقناه
وفى مقطع آخر يقول المبدع الكبير الذى استلهم كلمات النشيد الجديد من عبارات التأييد التى قالها أعضاء مجلس الركش الموقر خلال افتتاح الحاج لأعماله مطلع العام الحالى
على إيده العزبة المخفية
هتعلا وتخش الألفية
والخير هيشر م الحنفية
وهانغرق كلنا فى هناه
فأخدناه وحمناه
وفى قلوبنا سكناه
وهو نشيد كما يتضح لكم شديد العزوبة والتعبير ويتواكب والنهضة التى تشهدها عزبتنا العزيزة

الحاج يدعو مواطني العزبة للمشاركة بإيجابية في الاستفتاء

دعا الحاج محمد حسني أبو جمال - فى خطابه الذي ألقاه في الدوار مساء أمس حيث افتتح عددا من المشروعات - كافة الأحزاب السياسية وقوى المجتمع المدني إلى الاسهام بايجابية فى عملية الاستفتاء ، المزمع أجراوه يوم الاثنين القادم. وأكد الحاج على أن التعديلات الدستورية تمثل تطويرا غير مسبوق للبنية الدستورية للعزبة، سيغير وجه الحياة السياسية والبرلمانية والحزبية على أرضها الطاهرة، ويفتح امامها ابوابا جديدة ، مشيرا إلى أن التعديلات الدستورية هى حجر الأساس فى هذه المسيرة الطويلة التى قادها هو وأسلافه فى العمودية. وأوضح أبو جمال أن هذه هي المرة الأولي التي تطرح فيها التعديلات الدستورية على هذا النطاق الواسع ، منذ عام 1980 ، كما تمثل المرة الأولى لمناقشة مقترحات التعديل فى حوار وطني وعلني ممتد وصريح لم تشهده الحياة السياسية فى العزبة منذ دستورها الأول غير المكتوب ومرورا بدستور عام 1923 ، والدساتير اللاحقة قبل ثورة العزبة التى قادها وبعدها. وجدد الحاج على انه تقدم بالتعديلات الدستورية وفق رؤية شاملة للمستقبل وتتوخى المصالح العليا للعزبة والشعب، وليس المصالح الضيقة لنخبة او حزب او فئة. وأشار إلى أنه طالب بهذه التعديلات باقتناع يتجاوب مع التطلعات المشروعة للشعب ومستقبل أجيال تأتى من بعدنا تحمل الامانة والمسئولية وتقوم بدورها فى خدمة الوطن. وأوضح الحاج أبو جمال أنه راعى عند طرح هذه التعديلات، ضرورة تحقيق التوازن الدقيق بين هذه النقلة النوعية فى حياة عزبتنا السياسية، والحفاظ على استقرار العزبة وأمنها ، وتماسك مجتمعها ووحدة ابنائها.
وأضاف الحاج أن التعديلات الدستورية جاءت لتدعم دور نواب الدوار بمجلسيه وهما مجلس الحاجة والواد السدغ ابنها ومجلس الركش ، ولتعزز دور الدوار فى مراقبة أعمال السلطة التنفيذية ، وأداء العمدة شخصياً وأفراد العمودية.
وأكد الحاج أن أمن العزبة واستقرارها وأمان مواطنيها، هو خط أحمر لم ولن يسمح لاحد بتجاوزه. وأوضح الحاج أنه وضع الدستور المقترح - طيلة عشرين شهرا - موضوعا لمناقشات مستفيضة داخل الدوار وخارجه ، فى حوار وطني دعوت اليه ورحبت به وشجعت على استمراره شارك فيه نواب الشعب والمفكرون والمثقفون والاحزاب والمجتمع المدنى والمهتمون بالشأن العام. وأشار الحاج أن الحوار بين الرأي والرأي الآخر ظاهرة صحية ، تعكس الحيوية والاجواء الجديدة التى تشهدها حياتنا السياسية ، والمساحات الواسعة لحرية الرأي والتعبير والصحافة ، وماحققه مجتمع عزبتنا فى تعزيز ثقافة الديمقراطية وتطوير ممارساتها. وأكد أبو جمال بيه انه استمع لافكار ومقترحات عديدة قبل ان يتقدم بالمقترح شهر ديسمبر الماضي لتعديل الدستور ليشهد مجلسي الحاجة وأبنها والركش، مناقشات مستفيضة حولها ، وحوارا ديمقراطيا بين الاغلبية والمعارضة والمستقلين ، موضحا وأنه تابع هذا الحوار باهتمام بالغ. وجدد الحاج التأكيد على أن الدوار اعتمد التعديلات الدستورية الاسبوع الماضي غير أن الكلمة الاخيرة ستبقى للشعب حين تطرح التعديلات للاستفتاء.

22 مارس 2007

الحاجة طالبه تعديل


الست ام جمال طلبت تعديل عاجل فى نص الدستور المطروح للاقتراع فى الاستفتاء وطلبت ان النسوان اللى فى البلد يبقوا لهم حقوق زيهم زى النسوان اللى فى البندر وده لأن المره من دول بتبقى ياعالم لسه والده العيل وجوزها يقولها انزلى ع الغيط وهى ست الكل طبعا شايفه النسوان فى البندر بياخدو راحة لحد ما يربعنوا قلتلها وانت مال اهلك ده انتى البعيدة مخلفتيش غير الجعر ابنك اللى مسمياهولى المحروس وبتزعلى لما حد يقولى يا حسنى من غير ابو جمال وانى راضى ومستكفى متهيجيش بقى على نسوان امه لا اله الا الله وتقوليلى حقوق النسوان

المرة قالت نحتكم للشعب وللجاموطراتية اللى خوتانى بيها بقالها فترة هى والمحروس المستعجل على موتى عشان يورث البلد

المهم قصره قلت ارجعلكوا فى القرار عشان نريح الحاجة سيدة العزبة الاولى

مواد الدستور المطلوب الموافقة عليها


مادة أولى: عزبة أبو جمال عزبة مستقلة عن أيتها ناحية أو كفر أو قرية أو عزبة تانية فى المجاورة دى
مادة تانية: البلد ببهايمها بغيطانها بناسها هى الكل
مادة تالته: الحاج أبو جمال هو الكل فى الكل
مادة رابعة: أم جمال ست الكل
مادة خامسة: جمال هو اللى هايورث الكل
مادة سته: عزبة أبو جمال عضو فاعل فى اتحاد العزب ودخلت خلاص الالفية الجديدة وعصر التطور
مادة سبعة: قضاء عزبة أبو جمال قضاء مستقل، يعنى اللى متخانق مع حد فى حاجة يجى لابو جمال وهو يجيب له حقه من غير ما يقل واللى يحاول كده ولا كده يشوف له سكه تانية يبقى عليه العوض
مادة تامنه: أرض الناحية القبلية بحالها حيازة تخص الحاج ابو جمال أما الناحية البحرية فهى ملك لاهل القرية وشريكهم اللى هو المحروس جمال بيه
مادة تاسعة: محرم تربية أو أكل الارانب عشان الواد جمال بيه بيقرف منها ويثتسنى من ذلك لو حد جاياله الارانب فى زيارة من قرايبه عشان عيب لما نبهدل الضيوف بس حسك عينك يا ضيف تكررها تانى
مادة عاشرة: التعليم هو عماد العزبة وكل واحد لازمن على الاقل ياخد الابتدائية زى المحروس جمال بيه واهم حاجة جودة التعليم والتطوير، يعنى نبقى جميعا طور الله فى برسيمة مش احسن م الجهل يا بلد
مادة حادى عشرة: حقوق المواطن هى الحقوق اللى يقررها الحاج واللى عليه حاجة يروح برضه يدفعها للحاج
مادة ثانية عشرة: البلد زى الفل نضيفة وكويسه وبتحافظ على مواردها وبتبنى الزرايب بالخرسانة المسلحة عشان البهايم متنسرقش
مادة ثالثه عشرة: اهل البلد احرار ابا عن جد وكلهم بيحبوا الحاج وبيخدموه بعيونهم ويشيلوا بلغته فوق روسهم هو والمحروس والست الكبيرة
مادة اربعة عشرة: احلى حاجة فى البلد دى جدعنة ناسها واللى عنده حاجة بيدى اللى معندوش والحاج برضه هو اللى فوق يعنى اللى طابخة طابخة كويسة ومعزمتش ع الحاج تبقى مطلقة من جوزها ومحرمه عليه دنيا واخرة
مادة خمسة عشرة: الدستور ده هدية م الحاج لاهل البلد عشان يحسوا بانهم شعب نضيف متطور ساكن مع الناس بتوع الالفية الجديدة وبينافس

عزبة ابو جمال تدخل الالفية


الوله جمال صحيح طالع لامه وسدغ زيها بس ربكم الحق واخد منى النباهة وبرضه فارق كده ومخه مزهزه اصل العلام بيفرق قاللى يابا احنا لازمن العزبة بتاعتنا تخش الالفية الجديدة قلت له واحنا مالنا ومال الالفية دولم عزبه واحنا عزبه قاللى لأ يابا الالفية الجديدة دى يعنى عصر التقدم والتكنولوجيا قلتله يابن المركوب هو احنا مش فى عصر التقدم والتكنولوجيا مش انى دخلتلك الانطرنيك وجيبتلك محمول بهزاز ورنة نانسى عجرم دى مش الفية جديدة دى ولا يعنى مش الفية

قاللى يابا لازمن البلد تبقى حاجة تانية وخدنى ع اللاب طونب بتاعه وورانى ع الشاشة حاجات كتير وورانى بلاد كتير انى دماغى صراحة لفت وقلتله انتم البركه فيكم تدخلونا الالفية همتك بقى ياولى العهد

بعدها بيومين جابلى فى ايده واد كده صفروت من اياهم قاعد يلعب ع اللاب طونب اللى دافع فيه طفح الكوته وقال ايه فى الاخر قاللى البلد يا حاج بقى لها بلوج قمت هابب فيه وقايله غور يابن المراكيب بلوج ايه اللى يحصل فى البلد قاللى يا حاج هدى خلقك بلوج يعنى مدونه قلت له بطلوا ده واسمعوا ده هو انا كت فهمت الاولانية لما افهم التانية جمال جه وقاللى يا حاج دى حاجة نورى بيها البلد للشعب قلت الله هو الشعب اللى عايش فى المخروبة دى لحد دلوقت ماكنش شايفها قاللى يابا دى علامة تقدم ودى اللى هتدخلنا العهد الجديد قلت لا حول الله احنا مالنا ومال العزب التانية شوية تقوللى الالفية وشويه تقوللى العهد الجديد انت يا جدع انت عاوز تضحك على العزب التانية المهم قعد وفهمنى انها يعنى كده نشرة اكلمكم زى ما باكلمكم دلوقتى وتكلمونى والواد من جدعنته حط فى كل حته فى العزبة كامبيوطر قال ايه عشان نتواصل طب تواثلوا بقى معايا ومرحبا بيكم فى الالفية بتاع عزبة ابو جمال

ونشوفكم فى البلوج

على فكره اللى هايقول لجمال يابن العمده ولا ياجمال حاف كده ولا ياحاج هايطلع عين اهله ده حالف اللى ما يقوله يا جمال بيه أو على الاقل يا أستاذ جمال رسمى كده هاينفخه

لقد أزعر من أنعر يابلد

بلبع الرغاى


ورد إلينا سؤال من واحد رخم عن إيه المخلوق اللى فوق ودان الحاج فى التصويرة الرسمية ويسعدنا إن احنا نقولكم ان ده هو ناقل الاسرار للحاج واللى اسمه بلبع الرغاى وبلبع ده بغبغان كان تايه فى البلد ا لسنة اللى فاتت والعيال جابوهلى اشوفه من حاكم مفيش حاجة تتلاقى فى العزبة الا ما يكونلى نصيب فيها وطلع شبه الغفير بلبع بس ده رغاى حبتين فسميناه بلبع الرغاى ودايما مستقرب ودانى اللى هى كبيرة حبتين وقاعد فوقيها ونط فى التصويرة الرسمى والواد جمال المحروس ابنى قاللى يابا ده يبقى رمز إلى انك بتعرف كل حاجة فى البلد مع انى مفهمتش يعنى ايه رمز بس حسيت كده ان الواد فاهم والعلام برضه بيفرق ده معاه ابتدائية يا بلد

الحاج يشارك فى قمة العزب


اخوانا العمد اصحاب الفخامة والفخفخة والمنجهة قرروا يعملوا قمة عشان نشوف احوال العزب المشتركة وانى قررت ان عزبتنا يعنى بحكم انها الاخت الكبرى للعزب المجاورة انها تشارك فى القمة عشان نشوف حكاية الدساتير ومشروع المجارى ونفض السيرة بتاع البت فتحية بنت ابو ازدحمد اللى عك معاها الواد ناجى ابن سلمان عبيد وما يستجد من اعمال
على فكره دى صورتى بالميولوق الجديد والبدلة القيافة ودى اللى شار بيها على الواد النبيه ابنى جمال ربنا يحميه قاللى يابا فضك م الجلابية والبسلهم الافرانكا ووريهم الناب الازرق قمت متصور كده زى مانتم شايفين
وباركاتكم بقى

قرار بدعوة الناخبين للاستفتاء على الدستور

لإنها عزبة وليها عمدة اللى هو أنا طبعاً وتحكم من مصطبة بحرى تطل على الرشاح بتاع البلد التى هى عزبتى فقد قررت عزبة أبو جمال لصاحبها وعمدتها محمد حسنى الشهير بأبو جمال برضه أن تحدث دستورها الذى وضعه الاباء الموسسون للعزبة عملا وأسوة بالأمم المتقدمة اللى عماله تقول دستور دستور وهذا الدستور الحديث جدا لابد وأن يتمتع بكافة المزايا التى تحظى بها دساتير العزب المتقدمة لذا قررنا نحن الحاج أبو جمال بعد استشارة جمال وامه طبعا لا تدخلونا فى مشاكل مع الفاميليا المقدسة المهم قررنا أن نقوم باستفتاء على الدستور الجديد شكلا ومبضونا وشكلنا لجنة على أعلى مستوى تحت رياستى ورعايتى وحمايتى طبعا تتشكل منى شخصيا ومن أم جمال سيدة العزبة الأولى وولى العهد ربنا يحميه ويباركله فى شبابه الواد جمال وبمشاركة شيخ الخفر عويس الاضبش اللى جابلنا الشاى والقهوة وقعد يتفرج وكان زى عدمه وكمان الشيخ أحسن فتحى أبو شرور بتاع الكتاب اللى عملته كبير مجلس الركش كلكم عارفينه وعضوية كل من الحاج كمال الشتمونى وصفوان بتاع الهلاهوبه والجدع اللى ما يتسمى باينى نسيت اسمه وهو يستاهل يتنسى بصراح المهم أنى والجماعة قعدنا وحطينا الدستور بتاع العزبة على سنجة التحديث والركش
المهم اللى قلتكم أسماؤهم دول مضوا بالموافقة يعنى فاضل نعمل زى البلاد اللى جنبنا المحترمة ولاد الاصول دولهمن ونخش فى استفتا عشان يبقى فيه عندنا بقى البتاع اللى خوتونا به ده بقالهم كام يوم اللى اسمه اللهم صل على النبى أيوه اللى اسمه جاموطراتيه وتخش الجاموطراتيه عزبة أبو جمال عقبال الميه الحلوة قولوا يارب ونبقى من العزب المتقدمة الت يشار اليها بالبنان الوسطى ونقدم ساعتها على كارنيه العضوية بتاع الاتحاد الاروبى ونشوف بقى النسوان الشقر ويمكن كمان نعمل مطار فى الناحية القبلية ناخد بيه أرض ولاد علام.

فيا شعب عزبة أبو جمال قررنا يوم الاثنين الموافق 26 منه كل نفر فيكم يشد بغلته ولا حمارته ويطلع على المشتشفى الميرى ولا البوسته ولا المدرسة ويحط صوته زى ما الخفر هايقولوله

وربنا يبارك فيكم

عمدتكم وراعيكم
أبو جمال